វគ្គសិក្ខាសាលាផ្សព្វផ្សាយច្បាប់ស្ដីពី ការហាមឃាត់អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម
បន្ទាយមានជ័យ៖ លោកជំទាវឧត្តមសេនីយ៍ទោ សុខុន ស្រីល័ក្ខ នាយកនាយកដ្ឋានហ្វឹកហ្វឺន និងបណ្ដុះបណ្ដាលជំនាញ តំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍ បណ្ឌិត ផន ណារ៉ា អគ្គលេខាធិការនៃអគ្គលេខាដ្ឋាន អាជ្ញាធរជាតិអាវុធគីមី លោក ឃូ ពៅ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាល នៃគណៈអភិបាលខេត្ត បានអញ្ជើញជាអធិបតីភាព បើកវគ្គសិក្ខាសាលាផ្សព្វផ្សាយច្បាប់ស្ដីពី ការហាមឃាត់អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម ដោយមានការចូលរួមពី លោក លោកស្រី អភិបាល អភិបាលរងក្រុង-ស្រុក មន្ទីរអង្គភាពពាក់ព័ន្ធ កងកម្លាំងប្រដាប់អាវុធ មន្ត្រីរាជការ នាព្រឹកថ្ងៃទី១៣ ខែមិថុនា ឆ្នាំ២០២៥ ធ្វើឡើងនៅសាលប្រជុំ (ក) សាលាខេត្តបន្ទាយមានជ័យ។
លោក ឃូ ពៅ អភិបាលរងខេត្ត បានមានប្រសាសន៍ថា ដើម្បីឆ្លើយតបទៅនិងសភាពការបច្ចុប្បន្ន ស្តីពីការរត់ប្រណាំងសព្វាវុធ នៅក្នុងសង្គ្រាមវាងប្រទេសរុស្ស៊ី និងប្រទេសអ៊ុយក្រែន មានការប្រើប្រាស់សព្វាវុធទំនើបៗ មានផ្ទុកសារធាតុគីមី និងសារធាតុអ៊ុយរានញ៉ូម ដែលធ្វើឱ្យប៉ះពាល់ដល់អាយុជីវិត មនុស្សសត្វ និងជាពិសេសអាវុធប្រល័យលោក នៅឧបទ្វីបកូរ៉េ កូរ៉េខាងជើង បានបង្កើននូវសមត្ថភាពអាវុធនុយក្លេអ៊ែរ ដោយធ្វើការសាកល្បងបានជោគជ័យ នូវប្រភេទម៉ីស៊ីលយៈចម្ងាយ មធ្យម និងឆ្ងាយ ដែលអាចនាំក្បាលនុយក្លេអ៊ែរចំនូវគោលដៅកំណត់។ ប៉ុន្តែរយៈចុងក្រោយនេះនៅឧបទ្វីបកូរ៉េ បានទទួលនូវភាពធូរស្រាលដោយសារជំនួបរវាងលោក ដូណាល់ត្រាំ ប្រធានាធិបតីសហរដ្ឋអាមេរិក និង លោក គឹម ជុងអ៊ុន ប្រធានាធិបតីកូរ៉េខាងជើង ហើយជំនួបនេះធ្វើឱ្យទំនាក់ទំនងបងប្អូនកូរ៉េទាំងពីរបានខិត គៀកគ្នា។
លោក ឃូ ពៅ អភិបាលរងខេត្ត បានបន្តថា ទោះបីជាព្រះរាជាណាចក្រកម្ពុជាយើង មិនមែនជាអ្នកផលិតនូវរាល់សារធាតុគីមី និងសំភារៈគីមីក៏ពិតមែន ប៉ុន្តែកម្ពុជាបាននាំចូលយ៉ាងច្រើនគួរឱ្យកត់សំគាល់ ដូចនេះធ្វើឱ្យមានការគំរាមកំហែង និងផលប៉ះពាល់ដល់ ប្រទេសយើង។ ដូចនេះ ដើម្បីទប់ស្កាត់ បង្ការ និងបង្ក្រាបនៅ រាល់ហានិភ័យ អាជ្ញាធរជាតិអាវុធគីមី បានចុះធ្វើការស្រាវជ្រាវតាមបណ្តាខេត្ត តាមព្រំដែនរុករកឃើញនូវគ្រាប់បែកគីមី (ទសវត្ស៦០-៧០) នៅបណ្តាខេត្ត មួយចំនួនដូចជា ខេត្តមណ្ឌលគីរី ខេត្តត្បូងឃ្មុំ ខេត្តស្វាយរៀង បានបង្ហាញឱ្យឃើញនូវគ្រោះមហន្តរាយ ដល់ សុខភាពសាធារណៈយ៉ាងធ្ងន់ធ្ងរ បង្ករនូវជម្ងឺជាច្រើនប្រភេទ កុមារក្បាលធំ យុវវ័យមួយចំនួនមានសុខភាព ខុសប្រក្រតី។
នាឱកាសនេះផងដែរ លោកជំទាវឧត្តមសេនីយ៍ទោ សុខុន ស្រីល័ក្ខ នាយក នាយកដ្ឋានហ្វឹកហ្វឺន និងបណ្ដុះបណ្ដាលជំនាញ បានមានប្រសាសន៍ថា តាមការសិក្សាបានបង្ហាញថា សារធាតុគីមីជាង១៣.០០០០ ប្រភេទ ត្រូវបានផលិត និងចរាចរណ៍នៅ លើទីផ្សារពិភពលោក សម្រាប់បម្រើនៅក្នុងវិស័យជាច្រើន។ ក្នុងចំណោមសារធាតុគីមីទាំងនោះ មានតែប្រភេទ សារធាតុគីមីតិចតួចប៉ុណ្ណោះ ដែលបានដាក់ស្លាកសញ្ញាត្រឹមត្រូវ បានសិក្សាអំពីផលប៉ះពាល់ និងដឹងអំពីប្រភព នៃការធ្វើចរាចរណ៍។ ការប្រើប្រាស់ ឬការស្តុកទុកសារធាតុគីមី និងការបោះចោលសំណល់ មិនបានត្រឹមត្រូវ តាមលក្ខណៈបច្ចេកទេស នឹងបង្កផលប៉ះពាល់អវិជ្ជមានដល់បរិស្ថាន និងសុខភាពសាធារណៈ ដូចជា ការធ្វើឲ្យ ខូចគុណភាពដី ការបំពុលទឹក និងខ្យល់ ព្រមទាំងការបង្កឲ្យកើតមានជំងឺរ៉ាំរ៉ៃ ជំងឺមហារីក ការប៉ះពាល់ដល់ការ បង្កកំណើត ឬការលូតលាស់របស់ទារក។ដើម្បីឆ្លើយតបទៅនឹងបញ្ហានេះ គឺតម្រូវឲ្យមានកិច្ចសហការពីគ្រប់ភា គឺតាមរយៈការអនុវត្តអនុសញ្ញាអន្តរជាតិ និងវិធានការថ្នាក់ជាតិ។
លោកជំទាវឧត្តមសេនីយ៍ទោ សុខុន ស្រីល័ក្ខ នាយក នាយកដ្ឋានហ្វឹកហ្វឺន និងបណ្ដុះបណ្ដាលជំនាញ បានបញ្ជាក់ថា ព្រះរាជាណាចក្រកម្ពុជាដើម្បីអនុវត្តលើការងារនេះយើងមានច្បាប់ជាតិឬលិខិតបទដ្ឋានគតិយុត្ត ដែលមានគោលដៅហាមឃាត់ដាច់ខាត នូវការផលិត ការកែច្នៃ ការទទួលផ្ទេរ ការរក្សាទុក ការដឹកជញ្ជូន ការប្រើប្រាស់អាវុធគីមី អាវុធនុយក្លេអ៊ែរ អាវុធជីវសាស្ត្រ អាវុធវិទ្យុសកម្ម និងសារធាតុគីមី ដែលទាក់ទងនឹងការផលិតអាវុធ។ ច្បាប់និងលិខិតទាំងនោះមានគោលបំណងដើម្បីធានាសន្តិសុខ សណ្តាប់ធ្នាប់សាធារណៈ ការពារបរិស្ថាន សុខមាលភាពរបស់ប្រជាពលរដ្ឋ ព្រមទាំងរួមចំណែកការពារសន្តិសុខ សន្តិភាព តំបន់និងលើពិភពលោក។ ទន្ទឹមនឹងនេះ យើងមានលិខិតបទដ្ឋានអន្តរជាតិដែលកម្ពុជាជារដ្ឋហត្ថលេខី បានផ្តល់សច្ចាប័នរួមមានសន្ធិសញ្ញា អនុសញ្ញា ដែលលិខិតបទដ្ឋានគតិយុត្តទាំងនោះមានគោលដៅ ហាមឃាត់លើការបង្កើត ការផលិត ការប្រើប្រាស់ អាវុធគីមី និងការបំផ្លាញអាវុធទាំងនោះ។ ដើម្បីជាយន្តការលើការអនុវត្ត រាជរដ្ឋាភិបាលកម្ពុជាបានរៀបចំបង្កើត អាជ្ញាធរអាវុធគីមី នុយក្លេអ៊ែរ ជីវសាស្ត្រ និងវិទ្យុសកម្ម ដែលហៅកាត់ថា “អាជ្ញាធរជាតិអាវុធគីមី ដែលស្ថាប័ននេះបង្កើតឡើង ដើម្បីជាចំណុចប្រសព្វរបស់ជាតិ ក្នុងការទាក់ទងឱ្យមានប្រសិទ្ធភាពជាមួយអង្គការ និងជាមួយរដ្ឋភាគីដទៃទៀត និងដើម្បីគ្រប់គ្រងទប់ស្កាត់ការរីកសាយភាយអាវុធនុយក្លេអ៊ែរ ជីវសាស្ត្រ និងវិទ្យុសកម្មផងដែរ៕
