ប្រធានាធិបតីអាម៉េរិក លោក ដូណាល់ ត្រាំ ប្រកាស ដកទណ្ឌកម្មលើប្រទេស ស៊ីរី ក្នុងដំណើរទស្សនកិច្ចទៅកាន់អារ៉ាប៊ីសាអូឌីត
រីយ៉ាដ៖ លោក ដូណាល់ ត្រាំ ប្រធានាធិបតីអាម៉េរិក បានចាប់ផ្តើមដំណើរទៅកាន់ប្រទេសឈូងសមុទ្ទកាលពីថ្ងៃអង្គារទី១៣ឧសភា ជាមួយនឹងការប្រកាសដ៏គួរឱ្យភ្ញាក់ផ្អើលមួយថា សហរដ្ឋអាម៉េរិកនឹងដកទណ្ឌកម្មលើប្រទេស ស៊ីរី។
សហរដ្ឋអាម៉េរិក បានយល់ព្រមលក់កញ្ចប់សព្វាវុធដែលមានតម្លៃជិត១៤២ពាន់លានដុល្លារអារ៉ាប៊ីសាអូឌីត។ នេះបើយោងតាមសេតវិមានដែលបានហៅវាថា ជាកិច្ចព្រមព្រៀងសហប្រតិបត្តិការការពារជាតិដ៏ធំបំផុត ដែលរដ្ឋធានីវ៉ាស៊ីនតោនមិនធ្លាប់បានធ្វើ។
ការបញ្ចប់ ទណ្ឌកម្ម លើ ប្រទេស ស៊ីរី នឹង ជា ការ ជំរុញ ដ៏ ធំ មួយ សម្រាប់ ប្រទេស មួយ ដែល ត្រូវ បាន បំផ្លាញ ដោយ សង្រ្គាម ស៊ីវិល ជាង មួយ ទសវត្សរ៍។ ក្រុមឧទ្ទាមដឹកនាំដោយប្រធានាធិបតីបច្ចុប្បន្ន អាម៉េដ អាល់-សារ៉ា បានផ្តួលរំលំប្រធានាធិបតី បាសា អាល់អាសាដ កាលពីខែធ្នូឆ្នាំមុន។
ថ្លែងនៅក្នុងវេទិកាវិនិយោគក្នុងរដ្ឋធានីរីយ៉ាដ លោក ត្រាំ បាននិយាយថា លោកកំពុងធ្វើសកម្មភាពលើសំណើលុបចោលទណ្ឌកម្មរបស់ព្រះអង្គម្ចាស់ ម៉ូហាម៉េដ ប៊ីន សាល់ម៉ាន របស់ប្រទេសអារ៉ាប៊ីសាអូឌីត។ លោក ថា ទណ្ឌកម្ម បាន បម្រើ មុខងារ សំខាន់ មួយ ប៉ុន្តែ ថា ឥឡូវ ដល់ ពេល ដែល ប្រទេស ត្រូវ ដើរ ទៅ មុខ។ ចំណាត់ការនេះតំណាងឱ្យការផ្លាស់ប្ដូរគោលនយោបាយដ៏សំខាន់របស់សហរដ្ឋអាម៉េរិក។
គួររំឭកថា សហរដ្ឋអាម៉េរិកបានប្រកាសថាប្រទេសស៊ីរីជាអ្នកឧបត្ថម្ភរដ្ឋនៃអំពើភេរវកម្មក្នុងឆ្នាំ១៩៧៩ បន្ថែមទណ្ឌកម្មនៅឆ្នាំ២០០៤ និងដាក់ទណ្ឌកម្មបន្ថែមទៀតបន្ទាប់ពីសង្គ្រាមស៊ីវិលបានផ្ទុះឡើងក្នុងឆ្នាំ២០១១។
ទន្ទឹមនឹងនោះ លោក ត្រាំ និង ព្រះអង្គម្ចាស់ អារ៉ាប៊ីសាអូឌីត បាន ចុះ ហត្ថលេខា លើ កិច្ច ព្រម ព្រៀង មួយ ដែល គ្រប ដណ្តប់ លើ វិស័យ ថាមពល ការពារ ជាតិ ការ រុករក រ៉ែ និង វិស័យ ផ្សេង ទៀត។ លោក ត្រាំ បានព្យាយាមពង្រឹងទំនាក់ទំនងជាមួយអារ៉ាប៊ីសាអូឌីត ដើម្បីបង្កើនទំនាក់ទំនងក្នុងតំបន់ជាមួយអ៊ីស្រាអែល និងដើរតួជាអ្នកការពារប្រឆាំងនឹងអ៊ីរ៉ង់។
សេតវិមានបានបញ្ជាក់ថា កិច្ចព្រមព្រៀងនេះគ្របដណ្ដប់លើកិច្ចព្រមព្រៀងជាមួយក្រុមហ៊ុនការពារជាតិអាម៉េរិកជាងរាប់សិបសម្រាប់វិស័យនានា រួមទាំងការការពារដែនអាកាស និងមីស៊ីល កងកម្លាំងអាកាស និងលំហ សន្តិសុខដែនសមុទ្ទ និងទំនាក់ទំនង។ វាមិនច្បាស់ទេថា តើកិច្ចព្រមព្រៀងនេះរួមបញ្ចូលយន្តហោះ Lockheed F-35 ដែលត្រូវបានពិភាក្សាដែរឬទេ។
ព្រះអង្គម្ចាស់អារ៉ាប៊ីសាអូឌីតបាននិយាយថា កញ្ចប់ថវិកាសរុបអាចឈានដល់១ពាន់ពាន់លានដុល្លារ នៅពេលដែលកិច្ចព្រមព្រៀងបន្ថែមទៀតត្រូវបានឈានដល់ក្នុងប៉ុន្មានខែខាងមុខ។
អារ៉ាប៊ីសាអូឌីត គឺជាអតិថិជនដ៏ធំបំផុតមួយសម្រាប់សព្វាវុធរបស់សហរដ្ឋអាម៉េរិក ហើយប្រទេសទាំងពីរបានរក្សាទំនាក់ទំនងដ៏រឹងមាំអស់រយៈពេលជាច្រើនទសវត្សរ៍ ដោយផ្អែកលើការរៀបចំដែលព្រះរាជាណាចក្រមួយនេះជាអ្នកផ្តល់ប្រេង ហើយមហាអំណាចផ្តល់សន្តិសុខ។ ប៉ុន្តែទំនាក់ទំនងត្រូវបានតានតឹងបន្ទាប់ពីឃាតកម្មឆ្នាំ២០១៨ លើអ្នកកាសែតអារ៉ាប៊ីសាអូឌីត ចាម៉ាល់ ខាសូគី ដែលមានមូលដ្ឋាននៅសហរដ្ឋអាម៉េរិក ដោយភ្នាក់ងារអារ៉ាប៊ីសាអូឌីតនៅទីក្រុងអ៊ីស្តង់ប៊ុលបានបង្កឱ្យមានចលាចលជាសកល។
ទីភ្នាក់ងារស៊ើបការណ៍សម្ងាត់អាម៉េរិក បានសន្និដ្ឋានថា ព្រះអង្គម្ចាស់ ប៊ីន សាល់ម៉ាន់ បានយល់ព្រមលើប្រតិបត្តិការមួយដើម្បីចាប់ខ្លួន ឬសម្លាប់លោក ខាសូគី ដែលជាអ្នករិះគន់ដ៏លេចធ្លោមួយ ប៉ុន្តែរដ្ឋាភិបាលអារ៉ាប៊ីសាអូឌីតបានបដិសេធការជាប់ពាក់ព័ន្ធណាមួយឡើយ។ លោក ត្រាំ មិន បាន និយាយ អំពី ឧប្បត្តិហេតុ ក្នុង ដំណើរ ទស្សនកិច្ច របស់ លោក ឡើយ។
លោក ត្រាំ នឹងបន្តដំណើរពីរាជ ធានីរីយ៉ាដ ទៅកាន់ប្រទេសកាតានៅថ្ងៃពុធ និងប្រទេសអេមីរ៉ាត់អារ៉ាប់រួមនៅថ្ងៃព្រហស្បតិ៍ ក្នុងដំណើរមួយដែលផ្តោតលើការវិនិយោគជាជាងបញ្ហាសន្តិសុខនៅមជ្ឈិមបូព៌ា។ មេដឹកនាំធុរកិច្ចអាម៉េរិកជាច្រើននាក់បានចូលរួមក្នុងព្រឹត្តិការណ៍នេះ រួមទាំងលោក អេឡុន ម៉ាសក៍ ដែលជាប្រធានក្រុមហ៊ុន Tesla; នាយកប្រតិបត្តិ OpenAI លោក សេម អាលមែន (Sam Altman); នាយកប្រតិបត្តិ BlackRock លោក ឡារី ហ្វីង (Larry Fink) និងនាយកប្រតិបត្តិក្រុមហ៊ុន Blackstone លោក Stephen Schwarzman៕
