សម្តេចធិបតី អំពាវនាវដល់ម្ចាស់សត្វពាហនៈទាំងអស់ ត្រូវគ្រប់គ្រងសត្វរបស់ខ្លួនឱ្យបានត្រឹមត្រូវ កុំឱ្យសត្វដើរកាត់ផ្លូវ ដែលបង្កជាគ្រោះថ្នាក់ដល់អ្នកធ្វើដំណើរ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវដល់ម្ចាស់សត្វពាហនៈទាំងអស់ ត្រូវគ្រប់គ្រងសត្វរបស់ខ្លួនបានត្រឹមត្រូវ កុំឱ្យសត្វទាំងនោះដើរកាត់ផ្លូវ ដែលបង្កជាគ្រោះថ្នាក់ចរាចរណ៍ដល់អ្នកធ្វើដំណើរ។
ក្នុងឱកាសអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ ផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិលេខ៤១ ប្រវែងសរុប ២០១,៣៨៥គីឡូម៉ែត្រ នៅថ្ងៃអង្គារ ទី២៩ ខែមេសា ឆ្នាំ២០២៥ សម្តេចបវរធិបតី ហ៊ុន ម៉ាណែត បានថ្លែងអំពាវនាវដល់ប្រជាពលរដ្ឋ អ្នកប្រើប្រាស់ផ្លូវថ្នល់ ត្រូវចូលរួមគោរពច្បាប់ចរាចរណ៍ផ្លូវគោកទាំងអស់គ្នា ហើយកុំបើកបរលើសល្បឿនកំណត់ និងប្រយ័ត្នសត្វពាហនៈផងដែរ។
សម្តេចបវរធិបតី បន្ដថា គ្រោះថ្នាក់ការបាត់បង់ជីវិតដោយគ្រោះថ្នាក់ចរាចរណ៍ ជាឃាតករសម្លាប់មនុស្សច្រើនជាងនៅកម្ពុជា នាពេលប៉ុន្មានឆ្នាំនេះ ក្រោយពីសង្គ្រាម។ សម្ដេច រំលឹកថាកាលមុនវៃគ្នាមានគ្រាប់កាំភ្លើង បាញ់គ្នាចប់សង្គ្រាមមានគ្រាប់មីន បានសម្លាប់មនុស្សច្រើននាក់ តែគ្រោះថ្នាក់ចរាចរណ៍ច្រើនជាង។
សូមរំលឹកថា យោងតាមរបាយការណ៍ប្រចាំឆ្នាំ២០២៤ របស់ក្រសួងសាធារណការ និងដឹកជញ្ចូន បានឱ្យដឹងថា កាលឆ្នាំ២០២៤ ករណីគ្រោះថ្នាក់ចរាចរណ៍ផ្លូវគោកមានចំនួន ២ ៨៤៤ លើក បានបង្កឱ្យមានមនុស្សស្លាប់ចំនួន ១ ៥០៩នាក់ ដែលចំនួនគ្រោះថ្នាក់ចររាចរណ៍ផ្លូវគោកក្នុងឆ្នាំ២០២៤ បានថយចុះចំនួន ១៤% បើធៀបនឹងឆ្នាំ ២០២៣៕
