ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានថ្លែងថា កម្ពុជាប្រើជំហានគីង្គក់ តែកម្ពុជាដើរទៅមុខជានិច្ច បច្ចុប្បន្នមិនធ្វើត្រឹមតែផ្នែកកសិកម្មប៉ុណ្ណោះទេ ក៏អាចដំឡើងរថយន្តបានផងដែរ។
ក្នុងឱកាសអញ្ជើញសម្ពោធ ដាក់ឱ្យដំណើរការខ្សែច្រវាក់ផលិតកម្មថ្មី និងរោងចក្រ ដំឡើង គ្រឿង បង្គុំរថយន្ត Ford របស់ក្រុមហ៊ុនRMA Cambodia ស្ថិតនៅក្នុងស្រុកក្រគរ ខេត្តពោធិ៍សាត់ នៅព្រឹកថ្ងៃទី២២ ខែមេសា ឆ្នាំ២០២៥នេះ សម្ដេចធិបតី បានថ្លែងថា រាជរដ្ឋាភិបាល បានធ្វើរឿងច្រើនណាស់ ដើម្បីជំរុញភាពរីកចម្រើននៅខេត្តកំពង់ឆ្នាំង និងពោធិ៍សាត់ ដំបូងបំផុត គឺការធ្វើឱ្យមានសុខសន្តិភាព និងការសាងសង់ផ្លូវជាតិជាច្រើនខ្សែ។
សម្តេចធិបតី នាយករដ្ឋមន្ត្រីបញ្ជាក់ទៀតថា ការរក្សាបានសុខសន្តិភាព ការវិនិយោគលើហេដ្ឋារចនាសម្ព័ន្ធ ធ្វើឱ្យខេត្តកំពង់ឆ្នាំង ខេត្តពោធិ៍សាត់ មិនមែនជាខេត្តដែលគេទៅហួស មកហួសទៀតនោះឡើយ គឺក្លាយជាខេត្តមានឧស្សាហកម្មច្រើន កន្លែងទេសចរណ៍ច្រើន និងមានមូលដ្ឋានការងារច្រើនផងដែរ៕
