ប្រមុខរាជរដ្ឋាភិបាល បង្ហាញក្តីសង្ឃឹមថា ថៅកែក្រុមហ៊ុនធំៗ នឹងអនុវត្តនូវការកសាងទារកដ្ឋាន ទៅតាមលទ្ធភាពដែលអាចធ្វើទៅបាន

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបង្ហាញក្តីសង្ឃឹមថា ថៅកែរោងចក្រធំៗ នឹងកសាងទារកដ្ឋាននៅតាមបណ្តារោងចក្រនានា នៅទូទាំងប្រទេសទៅតាមលទ្ធភាពដែលអាចធ្វើទៅបាន ។

ក្នុងឱកាសអញ្ជើញ សម្ពោធទារកដ្ឋានរោងចក្រ ម៉ាវ៉ល ហ្គាមិន ស្ថិតក្នុងតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ នាថ្ងៃ១០ មីនា សម្តេចធិបតី ហ៊ុន ម៉ាណែត បានណែនាំឱ្យក្រសួងការងារ និងបណ្តុះបណ្តាលវិជ្ជាជីវៈ និងក្រសួងសុខាភិបាលបន្តយកចិត្តទុកដាក់ខ្ពស់បន្ថែមទៀត ចំពោះការងារទារកដ្ឋាន និងថែទាំសុខភាពដល់ទារក និងម្តាយរបស់ពួកគេនៅតាមរោងចក្រសហគ្រាសនានា ខណៈបច្ចុប្បន្នបានរៀបចំទារកដ្ឋាន១៣កន្លែង នៅតាមរោងចក្រសហគ្រាស នៅទូទាំងប្រទេស ។

សម្តេចធិបតី បានថ្លែងកោតសរសើរចំពោះរដ្ឋមន្រ្តីក្រសួងការងារដែលបានខិតខំយកចិត្តទុកដាក់បង្កើតទារកដ្ឋានសម្រាប់ក្រុមស្រ្តីបម្រើការងារ នៅតាមបណ្តារោងចក្រនានានៅទូទាំងប្រទេស ។ សម្តេចធិបតី ប្រកាសថា នៅតាមរោងចក្រសហគ្រាសដែលមានបុគ្គលិកចាប់ពី ១០០នាក់ឡើងទៅ នឹងតម្រូវឲ្យមាននូវទារកដ្ឋាន ខណៈការសម្ពោធដាក់ឱ្យប្រើប្រាស់ទារកដ្ឋាននៃរោងចក្រកាត់ដេរម៉ាវ៉លនេះ គឺជាលើកដំបូងបំផុតនៅកម្ពុជា ៕