រថភ្លើងដឹកអ្នកដំណើរស្រីលង្កា១គ្រឿង ក្រឡាប់ចេញពីផ្លូវ បន្ទាប់ពីបុកទម្លុះហ្វូងសត្វដំរី

កូឡុំបូ៖ រថភ្លើងដឹកអ្នកដំណើរស្រីលង្កាមួយគ្រឿងបានក្រឡាប់ចេញពីផ្លូវ កាលពីថ្ងៃព្រហស្បតិ៍ទី២០ ខែកុម្ភៈ បន្ទាប់ពីបានបុកទម្លុះហ្វូងសត្វដំរី។ យ៉ាងណា មិនមានអ្នកដំណើរណាម្នាក់រងរបួសនោះទេ ប៉ុន្តែសត្វដំរី៦ក្បាលបានងាប់យ៉ាងណោចអាអ័មនៅក្នុងឧបទ្ទវហេតុដ៏អាក្រក់បំផុតនេះ។

រថភ្លើងល្បឿនលឿនមួយគ្រឿងកំពុងធ្វើដំណើរនៅជិតតំបន់អភិរក្សសត្វព្រៃនៅទីក្រុងហាបារ៉ាណា (Habarana) ចម្ងាយប្រហែល១៨០គីឡូម៉ែត្រភាគខាងកើតនៃរដ្ឋធានីកូឡុំបូ នៅពេលដែលរថភ្លើងនោះបានបុកហ្វូងសត្វដំរី កំពុងដើរឆ្លងកាត់ផ្លូវដែក។ ជុំវិញឧប្បត្តិហេតុនេះ ប៉ូលិសបានអះអាងថា៖«រថភ្លើងបានធ្លាក់ចេញពីផ្លូវ ប៉ុន្តែមិនមានអ្នកស្លាប់ ឬរបួសធ្ងន់ធ្ងរទេ។ យ៉ាងណា សត្វដំរី៦ក្បាលបានងាប់ក្នុងថ្លុកឈាម ខណៈ២ក្បាលទៀតកំពុងត្រូវបានព្យាបាលរបួស»។

ឃ្លីបវីដេអូមួយបង្ហាញឱ្យឃើញដំរីមួយក្បាលឈរយាមកូនដំរីដែលកំពុងរងរបួសដេកដួលក្បែរផ្លូវដែក ជាមួយនឹងប្រម៉ោយរួញចូលគ្នា។ គួររំឭកថា កូនដំរី២ក្បាល និងមេមានផ្ទៃពោះមួយក្បាលបានងាប់ក្នុងឧបទ្ទវហេតុដូចគ្នា កាលពីខែកញ្ញា ឆ្នាំ២០១៨។ ចាប់តាំងពីពេលនោះមក អាជ្ញាធរបានបញ្ជាឱ្យអ្នកបើកបររថភ្លើងគោរពល្បឿនកំណត់ ដើម្បីកាត់បន្ថយការបង្កគ្រោះថ្នាក់ដល់សត្វដំរីនៅពេលឆ្លងកាត់តំបន់ដែលពួកគេឆ្លងកាត់។ អនុរដ្ឋមន្ត្រីក្រសួងបរិស្ថានស្រីលង្កា បានរំឭកថា មនុស្ស១៥០នាក់ត្រូវបានស្លាប់ និងដំរី ៤៥០ក្បាលត្រូវបានងាប់ នៅក្នុងការប៉ះទង្គិចគ្នារវាងមនុស្ស និងសត្វក្នុងឆ្នាំ២០២៣។ នេះគឺជាការកើនឡើងលើសឆ្នាំ២០២២ នៅពេលដែលមនុស្សចំនួន១៤៥នាក់ ត្រូវបានស្លាប់ និងដំរីចំនួន៤៣៣ក្បាលត្រូវបានសម្លាប់។ នេះបើយោងតាមទិន្នន័យផ្លូវការ។

គួរជម្រាបថា ការសម្លាប់ ឬធ្វើបាបសត្វដំរី គឺជាបទល្មើសព្រហ្មទណ្ឌនៅក្នុងប្រទេសស្រីលង្កា ជាដែនកោះមានដំរីព្រៃប្រមាណ៧០០០ក្បាល ដោយសត្វទាំងនោះចាត់ទុកថាជាសម្បត្តិជាតិ ដោយសារតែពួកវាមានសារសំខាន់នៅក្នុងវប្បធម៌ព្រះពុទ្ធសាសនា។ ដំរីអាស៊ីត្រូវបានទទួលស្គាល់ថា ជាសត្វជិតផុតពូជដោយអង្គការសហភាពអន្តរជាតិសម្រាប់ការអភិរក្សធម្មជាតិ។ តាមការប៉ាន់ប្រមាណ ដំរីចំនួន២៦០០០ក្បាលរស់នៅក្នុងព្រៃ ភាគច្រើននៅក្នុងប្រទេសឥណ្ឌា ហើយមួយចំនួនរស់នៅអាស៊ីអាគ្នេយ៍ ដែលនៅរស់រានមានជីវិតជាមធ្យមពី៦០ទៅ៧០ឆ្នាំ៕