ស្លាប់ ២នាក់ ក្នុងករណីយន្តហោះធុនតូច ២គ្រឿងបុកគ្នានៅកណ្តាលលម្ហអាកាសា ជិតអាកាសយានដ្ឋានក្នុងរដ្ឋអារីហ្សូណា
វ៉ាស៊ីនតោន៖ មនុស្ស២នាក់បានស្លាប់ បន្ទាប់ពីយន្តហោះធុនតូចពីរគ្រឿងបុកគ្នានៅកណ្តាលលម្ហអាកាសា នៅជិតអាកាសយានដ្ឋានក្នុងរដ្ឋអារីហ្សូណា (Arizona) នៃសហរដ្ឋអាម៉េរិក កាលពីថ្ងៃពុធទី១៩កុម្ភៈ (ម៉ោងក្នុងតំបន់)។
យោងតាមព័ត៌មានបឋមពីក្រុមប្រឹក្សាសុវត្ថិភាពដឹកជញ្ជូនជាតិអាម៉េរិក (NTSB) យន្តហោះ Cessna 172S និងយន្តហោះ Lancair 360 MK II បានបុកគ្នានៅជិតអាកាសយានដ្ឋានតំម៉ារ៉ាណា(Marana) ភាគពាយព្យនៃទីក្រុងទុចសុន(Tucson)។ ជាមួយគ្នា ព័ត៌មានបឋមបានបង្ហាញថា យន្តហោះខ្នាតតូចទាំងពីរបានបុកគ្នាកណ្តាលអាកាសា ក្រោយយន្តហោះ Lancair 360 MK កំពុងហោះឡើងចេញពីផ្លូវរត់មួយក្នុងចំណោមផ្លូវរត់ពីរនៅឯព្រលានយន្តហោះ ជួនចំពេលពេលយន្តហោះ Cessna 172S ចុះចតដោយចៃដន្យ។ បន្ទាប់មកយន្តហោះទាំងពីរ ក៏បានបុកគ្នានៅជិតកន្លែងផ្លូវរត់មួយទៀតក្បែរនោះ។
រដ្ឋបាលអាកាសចរណ៍សហព័ន្ធ(FAA) អះអាងថា យន្តហោះទាំងពីរបានបុកគ្នានៅម៉ោងប្រហែល៨ៈ២៥នាទី (ម៉ោងក្នុងតំបន់) កាលពីថ្ងៃពុធទី១៩ ខែកុម្ភៈ។ សេចក្តីថ្លែងការណ៍បានបង្ហាញថា៖«មានមនុស្ស២នាក់ជិះនៅលើយន្តហោះ Lancair ហើយមានមនុស្ស២នាក់ជិះនៅលើយន្តហោះ Cessna 172»។ គួរឱ្យសង្វេគណាស់ មនុស្ស ២នាក់ត្រូវបានបង់ជីវិតនៅក្នុងឧបទ្ទវហេតុនេះ។ អាកាសយានដ្ឋានត្រូវបានបិទ ខណៈការស៊ើបអង្កេតកំពុងបន្ត។ គួរជម្រាបថា អាកាសយានដ្ឋានក្នុងតំបន់ម៉ារ៉ាណា គឺជាវាលលម្ហល្វឹងល្វើយដែលមិនអាចគ្រប់គ្រងបាន ពោលគឺមិនមានប៉មត្រួតពិនិត្យចរាចរណ៍ផ្លូវអាកាសទេ។ អ្នកបើកយន្តហោះតែងតែប្រើប្រេកង់ប្រឹក្សាចរាចរណ៍ទូទៅ ដើម្បីប្រកាសពីទីតាំងរបស់ពួកគេទៅកាន់អ្នកបើកយន្តហោះផ្សេងទៀត ដែលស្ថិតនៅក្នុងបរិវេណព្រលានយន្តហោះ។
សូមជម្រាបថា ការបុកគ្នាយ៉ាងសាហាវនេះ កើតឡើងបន្ទាប់ពីមានឧប្បត្តិហេតុជារឿយៗទាក់ទងនឹងបញ្ហាអាកាសចរណ៍នាពេលថ្មីៗ។ ឧទ្ធម្ភាគចក្រមួយគ្រឿង បានបុកជាមួយយន្តហោះដឹកអ្នកដំណើររបស់ក្រុមហ៊ុនអាកាសចរណ៍ American Airlines នៅឯអាកាសយានដ្ឋានជាតិ Ronald Reagan Washingto កាលពីថ្ងៃទី២៩ ខែមករា ដោយបានផ្តាច់ជីវិតមនុស្សទាំងអស់គ្មានសល់សូម្បីតែម្នាក់ ទាំងអ្នកនៅលើយន្តហោះ និងឧទ្ធម្ភាគចក្រ សរុបទាំងអស់ចំនួន៦៧នាក់។ ថ្មីៗនេះ យន្តហោះពេទ្យខ្នាតតូច medevac បានធ្លាក់ក្នុងទីក្រុង Philadelphia របស់សហរដ្ឋអាម៉េរិក ដោយបានសម្លាប់មនុស្សទាំងអស់នៅលើយន្តហោះ និងមនុស្សម្នាក់ទៀតនៅលើផ្ទៃដី។
ផ្ទួនៗគ្នា ក៏ស្រាប់តែមានឧប្បត្តិហេតុធ្លាក់យន្តហោះមួយគ្រឿងនៅជិតទីក្រុង Nome នៃរដ្ឋ Alaska បានសម្លាប់មនុស្ស១០នាក់។ ក្រោយមកមានយន្តហោះឯកជនមួយគ្រឿង បានជ្រួសចេញពីផ្លូវរត់នៅទីក្រុង Scottsdale នៃរដ្ឋអារីហ្សូណា និងបានសម្លាប់អ្នកបើកបរយន្តហោះម្នាក់។ ក្ដៅៗ កាលពីថ្ងៃចន្ទក្នុងសប្តាហ៍នេះ យន្តហោះនៃជើងហោះហើរក្នុងតំបន់ Delta Air Lines ក្នុងទីក្រុងតូរូនតូ បានក្រឡាប់ផ្ងារជើងទ្រមេឃ ប៉ុន្តែសំណាងល្អ មនុស្សទាំង៨០នាក់នៅលើយន្តហោះបានរួចផុតពីសេចក្តីស្លាប់៕
