វ៉ាស៊ីនតោន៖ ប្រធានាធិបតីអាម៉េរិក លោក ដូណាល់ ត្រាំ បានឱ្យដឹងថា លោកបានជួបពិភាក្សាជាមួយប្រធានាធិបតីចិន លោក ស៊ី ជីនពីង តាមរយៈការហៅទូរសព្ទ ចាប់តាំងពីចូលកាន់តំណែងកាលពីថ្ងៃទី២០ ខែមករា ប៉ុន្តែមិនបានផ្តល់ព័ត៌មានលម្អិតអំពីប្រធានបទនៃការសន្ទនារបស់ពួកគេនោះទេ។
លោក ត្រាំ បានអត្ថាធិប្បាយនៅក្នុងបទសម្ភាសមួយដែលត្រូវបានចាក់ផ្សាយនៅលើទូរទស្សន៍ Fox News កាលពីថ្ងៃចន្ទទី១០ ខែកុម្ភៈ។ នៅពេលសួរថាតើលោកបានជួបពិភាក្សាជាមួយមេដឹកនាំចិនចាប់តាំងពីការឡើងកាន់តំណែងរបស់ប្រធានាធិបតីសហរដ្ឋអាម៉េរិកដែរឬទេ? លោក ត្រាំ បានឆ្លើយថា៖«បាទ ខ្ញុំបាននិយាយជាមួយគាត់ ហើយខ្ញុំបាននិយាយជាមួយក្រុមការងាររបស់គាត់ផងដែរ»។ លោកបានបន្ថែមថា៖«យើងមានទំនាក់ទំនងផ្ទាល់ខ្លួនល្អណាស់»។ យ៉ាងណាមិញ លោកប្រធានាធិបតី ត្រាំ មិនបានផ្តល់ព័ត៌មានលម្អិតអំពីពេលវេលាពិតប្រាកដនៃការហៅទូរសព្ទនេះបានកើតឡើងឬអ្វីដែលត្រូវបានពិភាក្សានោះទេ។
លោក ត្រាំ បាននិយាយកាលពីសប្តាហ៍មុនថា លោកមិនប្រញាប់ប្រញាល់និយាយជាមួយលោក ស៊ី ដើម្បីព្យាយាមបញ្ចៀសសង្គ្រាមពាណិជ្ជកម្មថ្មីរវាងប្រទេសដែលមានសេដ្ឋកិច្ចធំជាងគេទាំងពីរនោះទេ។ ការសន្ទនារវាងមេដឹកនាំមហាអំណាចទាំង២ ត្រូវបានគេមើលឃើញថាមានសារសំខាន់ចំពោះការបន្ធូរបន្ថយហានិភ័យនៃសង្គ្រាមពាណិជ្ជកម្ម។ សូមរំឭកថា លោក ត្រាំ និងលោក ស៊ី បានជជែកពិភាក្សាគ្នាក្នុងការហៅទូរសព្ទ មុនពេលលោក ត្រាំ ចូលកាន់តំណែងក្នុងខែមករា ហើយបានពិភាក្សាគ្នាអំពីបញ្ហាជាច្រើនរួមមាន ទិកតុក ពាណិជ្ជកម្ម និងតៃវ៉ាន់។
គួរបញ្ជាក់ថា រដ្ឋធានីវ៉ាស៊ីនតោន និងប៉េកាំង មានទំនាក់ទំនងតានតឹងអស់ជាច្រើនឆ្នាំជុំវិញភាពខុសគ្នាលើបញ្ហារាប់ជំពូក រាប់ចាប់ពីពន្ធ ពន្ធពាណិជ្ជកម្ម និងសន្តិសុខតាមអ៊ីនធឺណិត រហូតដល់តៃវ៉ាន់ ហុងកុង សិទ្ធិមនុស្ស និងប្រភពដើមនៃជំងឺកូវីដ១៩៕
