សម្តេចធិបតី ហ៊ុន ម៉ាណែត៖ កម្ពុជាបញ្ជូនជនដៃដល់ ដែលសម្លាប់លោក លិម គិមយ៉ា ទៅឲ្យថៃ គឺដើម្បីបញ្ជាក់ភាពស្អាតស្អំ និងតម្លាភាពរបស់រាជរដ្ឋាភិបាល

ភ្នំពេញ៖ សម្តេចធិបតី ហ៊ុន ម៉ាណែត បានថ្លែងបន្តថា ការបញ្ជូនខ្លួនជនដៃដល់ទៅឱ្យប្រទេសថៃ គឺដើម្បីបញ្ជាក់ពីភាពស្អាតស្អំ និងតម្លាភាពរបស់រាជរដ្ឋាភិបាលកម្ពុជា ដែលមិនមានជាប់ពាក់ព័ន្ធអ្វីទៅនឹងអំពើឃាតកម្មលើអតីតតំណាងរាស្រ្តនោះឡើយ ហើយមិនតែប៉ុណ្ណោះរាជរដ្ឋាភិបាលកម្ពុជាក៏បានសហការយ៉ាងសកម្មដើម្បីធ្វើកិច្ចការងារនេះជាមួយភាគីថៃផងដែរ។

នាឱកាសអញ្ជើញជាអធិបតីសម្ពោធសមិទ្ធផលនានា ក្នុងភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នៅថ្ងៃទី២០ ខែមករា ឆ្នាំ២០២៥ សម្តេចបវរធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលកម្ពុជា និងសម្តេចតេជោ ហ៊ុន សែន មិនជាប់ពាក់ព័ន្ធ និងមិននៅពីក្រោយឃាតកម្មបាញ់សម្លាប់លោក លិម គិមយ៉ា ដូចការចោទប្រកាន់របស់ក្រុមប្រឆាំងឡើយ។ សម្តេច ចោទសួរថា តើរាជរដ្ឋាភិបាលល្ងង់ណាស់ឬ បើសិនរាជរដ្ឋាភិបាលនៅពីក្រោយរឿងនេះ តើចាប់បញ្ចូនជនសង្ស័យជាឃាតករ ទៅឱ្យអាជ្ញាធរថៃស៊ើបធ្វើអី?

សម្តេចធិបតី បន្ថែមថា រាជរដ្ឋាភិបាលកម្ពុជា មិនគាំទ្រ និងថ្កោទោសចំពោះការបាញ់ប្រហារនេះ។ សម្ដេច ក៏បានផ្តាំផ្ញើដល់អ្នកនយោបាយកុំធ្វើយកករណីនេះធ្វើអាជីវកម្មរបស់ខ្លួន ដូចករណីកន្លងមក។

សម្តេចបវរធិបតី គូសបញ្ជាក់ថា ការចោទប្រកាន់លើរាជរដ្ឋាភិបាលកម្ពុជា ពិតជាអយុត្តិធម៌ណាស់ ហើយ សម្តេច ក៏ចង់ដឹងដែរថា រឿងឃាតកម្មនេះយ៉ាងម៉េច ហើយអ្នកណាជាមេឃ្លោងនៅពីក្រោយរឿងរ៉ាវនេះ។ សម្ដេច ថា កម្ពុជា បញ្ជូនខ្លួនជនដៃដល់ បាញ់សម្លាប់លោក លិម គិមយ៉ា ទៅឱ្យភាគីថៃ ព្រោះចង់បង្ហាញថា រាជរដ្ឋាភិបាលមិនពីក្រោយករណីនេះដូចការចោទប្រកាន់ឡើយ ៕