ឧបនាយករដ្ឋមន្ត្រី ហ៊ុន ម៉ានី ទទួលជួបក្រុមនិស្សិតកម្ពុជា ដែលជានិស្សិតជ័យលាភីអាហារូបករណ៍រដ្ឋាភិបាលអូស្ត្រាលីឆ្នាំ២០២៥

ភ្នំពេញ៖ ជាតំណាងដ៏ខ្ពង់ខ្ពស់របស់សម្តេចមហាបវរធិបតីនាយករដ្ឋមន្ត្រី ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានទទួលជួបក្រុមនិស្សិតកម្ពុជាជាជ័យលាភីអាហារូបករណ៍រដ្ឋាភិបាលអូស្ត្រាលីឆ្នាំ២០២៥ ចំនួន៦២ រូប ដែលសម្របសម្រួល និងអមដំណើរដោយឯកឧត្តម Derek Yip ឯកអគ្គរដ្ឋទូតអូស្រ្តាលីប្រចាំកម្ពុជា កាលពីព្រឹកថ្ងៃទី១២ ខែធ្នូ ឆ្នាំ២០២៤ នៅសាលាភូមិន្ទរដ្ឋបាល។

គោលបំណងនៃជំនួបសំណេះសំណាលនេះ លើសពីជួបសម្តែងការគួរសម និងជម្រាបលា តែជាឱកាសដែលក្រុមនិស្សិតអាចទទួលអនុសាសន៍ណែនាំ តម្រង់ទិសមុនចាកចេញទៅស្វែងរកនូវចំណេះដឹង ដើម្បីចូលរួមក្នុងការអភិវឌ្ឍប្រទេសជាតិ។

ផ្តើមពីការទទួលបានកិច្ចស្វាគមន៍យ៉ាងកក់ក្តៅពីសំណាក់ឯកឧត្តមឧបនាយករដ្ឋមន្ត្រី ឯកឧត្តមឯកអគ្គរដ្ឋទូតអូស្ត្រាលី បានបង្ហាញនូវសេចក្តីសោមនស្សរីករាយ ដែលបានចូលរួមជាមួយក្រុមនិស្សិតកម្ពុជានាឱកាសនេះ ស្របពេលដែលឆ្នាំនេះជាខួប៣០ឆ្នាំនៃកម្មវិធីអាហារូបករណ៍អូស្ត្រាលីនៅកម្ពុជា។ ឯកឧត្តមក៏បានគូសបង្ហាញនូវកិច្ចខិតខំប្រឹងតាមរយៈកិច្ចសហប្រតិបត្តិការ និងជំនួបដោយផ្ទាល់រវាងថ្នាក់ដឹកនាំកំពូលនៃប្រទេសទាំងពីរ ដែលឈានដល់ការពង្រីកឱកាសអាហារូបករណ៍បន្ថែមជូនដល់និស្សិតកម្ពុជា។

ឯកឧត្តមឧបនាយករដ្ឋមន្រ្តី បានថ្លែងអំណរគុណរាជរដ្ឋាភិបាលអូស្រ្តាលី និងស្ថានទូតអូស្ត្រាលីប្រចាំកម្ពុជា ដែលបានផ្តោតការយកចិត្តទុកដាក់លើលើកកម្ពស់សមត្ថភាពធនធាមនុស្សតាមរយៈឱកាសអាហារូបករណ៍ ដែលជាផ្នែកមួយចូលរួមជាមួយរាជរដ្ឋាភិបាលកម្ពុជា ក្នុងការផ្តល់បរិយាកាស និងពង្រីកឱកាសជាបន្តបន្ទាប់ជូនដល់មន្ត្រីរាជការ និងយុវជនជាសិស្សនិស្សិត ដើម្បីអភិវឌ្ឍចំណេះដឹង និងសមត្ថភាពរបស់ខ្លួន ស្របតាមគោលនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ឯកឧត្តមឧបនាយករដ្ឋមន្រ្តី ក៏បានគូសបញ្ជាក់អំពីចក្ខុវិស័យវែងឆ្ងាយរបស់សម្តេចមហាបវរធិបតី ក្នុងការកែទម្រង់រដ្ឋបាលសាធារណៈ ព្រមទាំងវិធានការគន្លឹះទាំង៣ ដែលក្រសួងមុខងារសាធារណៈជាសេនាធិការក្នុងការអនុវត្ត។

ទន្ទឹមនេះ ឯកឧត្តមឧបនាយករដ្ឋមន្រ្តី បានកោតសរសើរ និងបង្ហាញការសាទរប្រកបដោយមោទនភាពចំពោះនិស្សិតកម្ពុជាជាជ័យលាភីគ្រប់រូបដែលនឹងទៅសិក្សានៅប្រទេសអូស្ត្រាលី នៅពេលខាងមុខ។ បើទោះជ័យលាភីនីមួយៗ មកពីវិស័យផ្សេងៗគ្នា មិនថាវិស័យរដ្ឋ វិស័យឯកជន អង្គការក្រៅរដ្ឋាភិបាល សមាគមន៍ និងមជ្ឈដ្ឋានផ្សេងៗ តែសម្រាប់ឯកឧត្តមឧបនាយករដ្ឋមន្ត្រី ក៏ដូចជាថ្នាក់ដឹកនាំក្រសួងមុខងារសាធារណៈ ដែលមានវត្តមានក្នុងជំនួបនេះ និស្សិតជ័យលាភីគ្រប់រូបគឺជាធនធានដ៏សំខាន់ និងចាំបាច់របស់កម្ពុជា។

ក្នុងជំនួបនេះ បានចែករំលែកនូវបទពិសោធ និងទស្សនៈមួយចំនួនពីការទៅបន្តការសិក្សានៅក្រៅប្រទេស ដែលខ្លួនធ្លាប់បានឆ្លងកាត់ និងជំរុញចិត្តដល់និស្សិតទាំងអស់ត្រូវខិតខំរៀនសូត្រ ក្រេបយកចំណេះវិជ្ជាពីសាលា ក្នុងតួនាទីជាអ្នកផ្សព្វផ្សាយ ដោយចាត់ទុកខ្លួនជាឯកអគ្គរាជទូតក្នុងភាពតំណាងជាតិកម្ពុជា តាមរយៈការចូលរួមផ្សព្វផ្សាយពីវប្បធម៌ដ៏ល្អផូរផង់របស់ប្រទេសកម្ពុជា ទៅកាន់មជ្ឈដ្នានខាងក្រៅ ដើម្បីកសាងកេរ្តិ៍ឈ្មោះ និងលើកកម្ពស់កិត្យានុភាពរបស់ប្រទេសកម្ពុជា។