គណបក្សប្រឆាំងរបស់កូរ៉េខាងត្បូង គ្រោងនឹងបោះឆ្នោតម្តងទៀត ដើម្បីចោទប្រកាន់លោកប្រធានាធិបតី Yoon Suk-yeol ជុំវិញការប្រកាសច្បាប់អាជ្ញាសឹករបស់លោក

សេអ៊ូល៖ គណបក្សប្រឆាំងដ៏សំខាន់របស់ប្រទេសកូរ៉េខាងត្បូងបានឲ្យដឹងកាលពីថ្ងៃអាទិត្យថា ខ្លួននឹងជំរុញឱ្យមានការបោះឆ្នោតមួយផ្សេងទៀតដើម្បីចោទប្រកាន់លោកប្រធានាធិបតី Yoon Suk-yeol ជុំវិញការប្រកាសច្បាប់អាជ្ញាសឹករបស់លោក។

លោក Lee Jae-myung មេដឹកនាំគណបក្សប្រជាធិបតេយ្យកូរ៉េបាននិយាយនៅក្នុងសុន្ទរកថាតាមទូរទស្សន៍ថា លោកYoon ត្រូវតែលាលែងពីតំណែងភ្លាមៗ ឬត្រូវចោទប្រកាន់ដោយមិនបង្អង់យូរ។

លោកបានបន្ថែមថា នៅថ្ងៃទី១៤ ខែធ្នូ គណបក្សប្រជាធិបតេយ្យរបស់យើងនឹងចោទប្រកាន់លោក Yoon ក្នុងនាមប្រជាជន។

ការលើកឡើងនេះបានកើតឡើងមួយថ្ងៃបន្ទាប់ពីលិកប្រធានាធិបតី Yoon បានរួចផុតពីការចោទប្រកាន់ក្នុងសភា ខណៈសមាជិកភាគច្រើននៃគណបក្សកាន់អំណាចរបស់លោកធ្វើពហិការមិនចូលរួមការបោះឆ្នោត។

បន្ទាប់ពីការប្រកាសរបស់លោក Lee មេដឹកនាំគណបក្សអំណាចប្រជាជនដែលកំពុងកាន់អំណាច លោក Han Dong-hoon បានឲ្យដឹងថា ការលាលែងពីតំណែងដោយរបៀបរៀបរយ គឺប្រសើរជាងការចោទប្រកាន់ដែលនាំមកនូវភាពមិនច្បាស់លាស់។

នៅព្រឹកថ្ងៃដដែល លោក Han និងលោកនាយករដ្ឋមន្ត្រី Han Duck-soo បានចេញសេចក្តីថ្លែងការណ៍រួមមួយ ដោយបញ្ជាក់ថា គណបក្សកាន់អំណាចនឹងស្វែងរកការបញ្ចប់អាណត្តិប្រធានាធិបតីរបស់លោក Yoon ហើយថាលោក Yoon នឹងមិនពាក់ព័ន្ធនឹងកិច្ចការផ្ទៃក្នុង និងកិច្ចការបរទេសរបស់ប្រទេសឡើយ មុនពេលលោកចុះចេញពីតំណែង។

ប៉ុន្តែប្រធានរដ្ឋសភាលោក Woo Won-shik មកពីគណបក្សប្រឆាំងដ៏សំខាន់មួយផងដែរបានបរិហារការរៀបចំថាជា មិនធម្មនុញ្ញ និង ក្រអឺតក្រទម។

លោក Woo បានបន្តថា វានឹងក្លាយជាការរំលោភបំពានយ៉ាងធ្ងន់ធ្ងរលើរដ្ឋធម្មនុញ្ញ ប្រសិនបើនាយករដ្ឋមន្ត្រី និងគណបក្សកាន់អំណាចរួមគ្នាអនុវត្តអំណាចប្រធានាធិបតី ដោយកត់សម្គាល់ថា ការចោទប្រកាន់គឺជានីតិវិធីច្បាប់តែមួយគត់ដើម្បីព្យួរប្រធានាធិបតីពីការបំពេញមុខងាររបស់គាត់។