លោកជំទាវ ញ៉ែប សុភាព ដឹកនាំគណៈប្រតិភូក្រសួងសង្គមកិច្ច ជួបពិភាក្សាការងារ ពាក់ព័ន្ធនឹងការបញ្ចប់អំពេីហិង្សាលេីកុមារ

ភ្នំពេញ៖ នាថ្ងៃទី៦ ខែវិច្ឆិកា ឆ្នាំ២០២៤ ដោយទទួលបានការចាត់តាំងជាតំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា លោកជំទាវ ញ៉ែប សុភាព រដ្ឋលេខាធិការ ដឹកនាំគណៈប្រតិភូនៃក្រសួង ស.អ.យ. ក្រុមប្រឹក្សាជាតិកម្ពុជាដើម្បីកុមារ ក្រសួងអប់រំ យុវជន និងកីឡា ជួបពិភាក្សាការងារតាមការស្នេីសុំរបស់លោកស្រី Najat Maalla M’jid តំណាងពិសេសនៃអគ្គលេខាធិការទទួលបន្ទុកអំពេីហិង្សាលេីកុមារនៃអង្គការសហប្រជាជាតិ។

ការពិភាក្សានេះលោកជំទាវ ញ៉ែប សុភាព និងប្រតិភូកម្ពុជា ក៏បានចែករំលែកកិច្ចខិតខំប្រឹងប្រែងរបស់កម្ពុជា ក្នុងការបង្ការទប់ស្កាត់ និងឆ្លេីយតបចំពោះអំពេីហិង្សាលេីកុមារ ក្នុងនាមជាប្រទេសដៃគូសកលដេីម្បីបញ្ចប់អំពេីហិង្សាលេីកុមារ តាមរយ:ការពង្រឹងការអនុវត្តច្បាប់ គោលនយោបាយ ផែនការសកម្មភាព រួមទាំងការរៀបចំសេចក្តីព្រាងច្បាប់ស្តីពីកិច្ចការពារ កុមារ។ ជាការឆ្លេីយតប លោកស្រី Najat បានកោតសរសេីរនូវកិច្ចខិតខំប្រឹងរបស់កម្ពុជាក្នុងកម្រិតប្រទេស តំបន់ និងកម្រិតសកល ដេីម្បីបញ្ចប់អំពេីហិង្សាលេីកុមារ ព្រមជាមួយគ្នានេះ លោកស្រីបានបញ្ជាក់ជំហរក្នុងការបន្តជួយគាំទ្រកម្ពុជា ក្នុងការពង្រឹងការអនុវត្តច្បាប់ គោលនយោបាយ ផែនការសកម្មភាព ដេីម្បីបញ្ចប់អំពេីហិង្សាលេីកុមារ សំដៅសម្រេចបានស្របតាមគោលដៅអភិវឌ្ឍន៍ប្រកបដោយចីរភាព ២០៣០។

ក្នុងថ្ងៃជាមួយគ្នានេះ ប្រតិភូកម្ពុជាបានចូលរួមកម្មវិធី Satellite Event ដែលជាព្រឹត្តិការណ៍ អមសន្និសីទថ្នាក់រដ្ឋមន្ត្រីលេីកទី១ ស្តីពីការបញ្ចប់អំពេីហិង្សាលេីកុមារ ដែលត្រូវបានរៀបចំនៅសណ្ឋាគារ Hilton និង សាល សន្និសីទ Agora conference , Bogota ប្រទេសកូឡុំប៊ី ដែលកម្មវិធីនេះ រៀបចំដោយបណ្តាទីភ្នាក់ងារ អង្គការសហប្រជាជាតិ និងអង្គការមិនមែនរដ្ឋាភិបាលអន្តរជាតិ ដែលធ្វេីការងារទាក់ទងនឹងកិច្ចការពារកុមារ ការថែទាំជំនួស ជាពិសេសកិច្ចការពារកុមារពីអំពេីហិង្សា លេីកុមារ និងការរំលោភបំពានផ្សេងៗមកលេីកុមារ។

កម្មវិធី Satellite Event នេះ សម្រាប់ប្រតិភូកម្ពុជា បានចួលរួមធ្វេីជាវាគ្មិន រួមមាន៖
១.លោកជំទាវ សឿ សុជាតា អនុរដ្ឋលេខាធិការ ក្រសួងអប់រំ យុវជន និងកីឡា ចែករំលែកបទពិសោធន៍ពាក់ព័ន្ធ ការកសាង គោលនបាយ និងយុទ្ធសាស្ត្រការទៅរៀនប្រកបដោយសុវត្ថិភាពតាមរយ:សាលារៀនមួយជាតំបន់សុវត្ថិភាព ។
២.លោក ភី ណូ ប្រធាននាយកដ្ឋានកិច្ចការពារកុមារនៃអគ្គនាយកដ្ឋានសេវាសង្គមកិច្ច ក្រសួងស.អ.យ. ចែករំលែកមេរៀនបទពិសោធន៍ និងការអនុវត្តល្អរបស់កម្ពុជា ក្នុងការលេីកកម្ពស់ការថែទាំជំនួសចំពោះកុមារ ដោយបញ្ចូលទៅក្នុងកិច្ចខិតខំប្រឹងប្រែងក្នុងសកលលោក ដេីម្បីបញ្ចប់អំពេីហិង្សាលេីកុមារ។

ក្រៅពីចូលរួមជាវាគ្មិន ប្រតិភូកម្ពុជា បានចូលរួមស្តាប់ការចែករំលែកក្នុងកម្មវិធី Satellite Event ផ្សេងទៀត តាមប្រធានបទដូចជា ការបញ្ចប់ការដាក់ទណ្ឌកម្មលេីរាងកាយចំពោះកុមារ ដែលរៀបចំដោយអង្គការ ChildFund Aliance អង្គការ Save the Children និងអង្គការ WHO ជាដេីម៕