សមាជិកសភាកម្ពុជា ចូលរួមយ៉ាងសកម្មនៅក្នុងកិច្ចខិតខំប្រឹងប្រែងជាសកលក្នុងការទប់ស្កាត់ការប្រើប្រាស់អាវុធនុយក្លេអ៊ែរ និងអាវុធប្រល័យលោក

ភ្នំពេញ៖ នាព្រឹកថ្ងៃទី១៤ ខែតុលា ឆ្នាំ២០២៤ ឯកឧត្ដមបណ្ឌិត សម តារា អនុប្រធានគណៈកម្មការទី១ នៃរដ្ឋសភា និងលោកជំទាវ ខេង សំវ៉ាដា អនុប្រធាន គណៈកម្មការទី៧ នៃរដ្ឋសភា បានអញ្ជើញ ចូលរួម កិច្ចប្រជុំ របស់ គណៈកម្មការអចិន្ត្រៃយ៍ ស្តីពីសន្តិភាព និងសន្តិសុខអន្តរជាតិ នៃសហភាព អន្តរសភា (IPU149th) អំពី «ក្រុមសភានិយាយភាសាបារំាងAPF» ដែលមានសមាជិកចំនួន៣០នាក់ មកពី២០ប្រទេសអញ្ជើញចូលរួម។

អង្គប្រជុំបានពិភាក្សាអំពីសារៈសំខាន់នៃការទូតសភា ការថយចុះនៃការ ប្រើប្រាស់ភាសាបារាំង និងឥទ្ធិពល នៃបញ្ញាសប្បនិម្មិត មកលើប្រទេសកំពុង អភិវឌ្ឍន៍ និងប្រទេសដែលមានការអភិវឌ្ឍតិចតួច។ ជាមួយគ្នានេះ ប្រទេស វៀតណាមក៏បានលើកឡើងពីការត្រៀមរៀបចំកិច្ចប្រជុំរបស់ «ក្រុមសភា និយាយ ភាសាបារំាង APF» ដែលគ្រោងនឹងធ្វើឡើងនៅ ខែមករា ឆ្នាំ២០២៥ ខាងមុខ នេះ ផងដែរ។

ក្នុងឱកាសនោះ ឯកឧត្ដមបណ្ឌិត សម តារា បានធ្វើបទអន្តរាគមន៍លើប្រធានបទ ស្តីអំ ពី “តួនាទីសភាពាក់ព័ន្ធនឹងសន្តិសុខនុយក្លេអ៊ែរ”ដោយឯកឧត្តម បានលើក ឡើង ពីបញ្ហាប្រឈមនៃការគំរាមកំហែងឥទ្ធិពលនុយក្លេអ៊ែរ ប៉ះពាល់ មកលើ ពិភពលោក។

ឯកឧត្តមបណ្ឌិត បានគូសបញ្ជាក់ពីកិច្ចខិតខំប្រឹងប្រែង និងតួនាទី សំខាន់ របស់សមាជិកសភា ក្នុងការអនុម័តច្បាប់ ហើយប្រមុខរាជរដ្ឋាភិបាល កម្ពុជា ក៏បានចុះហត្ថលេខា ផ្តល់សច្ចាប័នលើលិខិតូបករណ៍/ច្បាប់អន្តរជាតិ និងអនុសញ្ញាអន្តរជាតិជាច្រើន ដើម្បីគាំទ្រយ៉ាងពេញទំហឹង ហាមឃាត់ ការប្រើប្រាស់ អាវុធនុយក្លេអ៊ែរ និងអាវុធប្រល័យលោក ដើម្បីចូលរួម ក្នុងការ ធានាបានសុវត្ថិភាព សន្តិសុខ និងការការពារប្រជាពលរដ្ឋទាំងក្នុងតំបន់ និងពិភពលោក៕