ក្រសួងសុខាភិបាល ប្រជុំពិនិត្យ និងពិភាក្សាលើរបាយការណ៍វឌ្ឍនភាពប្រចាំឆមាសទី១ ឆ្នាំ២០២៤ គម្រោងហិរញ្ញប្បទានឥតសំណងមូលនិធិសកល សម្រាប់កម្មវិធីប្រយុទ្ធនឹងជំងឺអេដស៍ របេង និងកម្មវិធីC19RM

ភ្នំពេញ៖ កាលពីថ្ងៃសុក្រ ទី០៩ ខែសីហា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ និងជានាយកគម្រោងមូលនិធិសកល នៃក្រសួងសុខាភិបាល បានដឹកនាំកិច្ចប្រជុំពិនិត្យ និងពិភាក្សាលើរបាយការណ៍វឌ្ឍនភាពប្រចាំឆមាសទី១ ឆ្នាំ២០២៤ គម្រោងហិរញ្ញប្បទានឥតសំណងមូលនិធិសកល សម្រាប់កម្មវិធីប្រយុទ្ធនឹងជំងឺអេដស៍ របេង និងកម្មវិធីC19RM។

គោលបំណង នៃកិច្ចប្រជុំពិភាក្សានេះគឺ៖
– ពិនិត្យវឌ្ឍនភាព នៃការអនុវត្តគម្រោងមូលនិធិសកល (Global Fund) គិតត្រឹមខែមិថុនា ឆ្នាំ២០២៤ សម្រាប់ជំនួយឥតសំណងជុំទី៦និងទី៧ (Grant Cycle 6 &7) នៃសមិទ្ធិផលលើសូចនាករសំខាន់ៗរបស់កម្មវិធីប្រយុទ្ធនឹងជំងឺអេដស៍ របេង និង C19RM និងសង្ខេបសមិទ្ធិផលលើសូចនាករតាមកម្មវិធីនីមួយៗ រួមទាំងការស្រូបចំណាយលើការងារលទ្ធកម្ម និងហិរញ្ញវត្ថុ និងបញ្ហាប្រឈមសំខាន់ៗដែលត្រូវដោះស្រាយ។
– ចែករំលែកព័ត៌មានលម្អិត មតិកែលម្អ/យោបល់ ក៏ដូចជាការបំភ្លឺ និងអនុសាសន៍ពីក្រុមការងារ Technical Review Team (TRT) ហើយយកធាតុចូល/យោបល់ទាំងនោះមកពិចារណា ដើម្បីកែលម្អសម្រាប់ការអនុវត្ត និងរបាយការណ៍ មុននឹងបញ្ជូនទៅមូលនិធិសកល។

កិច្ចប្រជុំនេះ មានការអញ្ជើញចូលរួមពី ឯកឧត្តមសាស្ត្រាចារ្យ ស៊ា ហួង រដ្ឋលេខាធិការ និងជានាយករងគម្រោង ឯកឧត្តម ទា ផល្លា អនុប្រធានអាជ្ញាធរជាតិប្រយុទ្ធនឹងជំងឺអេដស៍ លោកវេជ្ជបណ្ឌិត លន់ ច័ន្ទរស្មី អគ្គនាយករងបច្ចេកទេសសុខាភិបាល និងជាប្រធានគ្រប់គ្រងបច្ចេកទេសគម្រោង ឯកឧត្តម លោក លោកស្រី ប្រធាន និងអនុប្រធាន នាយកដ្ឋានមន្ទីរពេទ្យ នាយកដ្ឋានប្រយុទ្ធនឹងជំងឺឆ្លង នាយកដ្ឋានសវនកម្មផ្ទៃក្នុង នាយកដ្ឋានសុខភាពផ្លូវចិត្ត និងការបំពានគ្រឿងញៀននៃក្រសួងសុខាភិបាល តំណាងក្រសួងសេដ្ឋកិច្ច និងហិរញ្ញវត្ថុ តំណាងអាជ្ញាធរជាតិប្រយុទ្ធនឹងជំងឺអេដស៍  មជ្ឈមណ្ឌលជាតិ មន្ត្រីគម្រោងមូលនិធិសកល ព្រមទាំង ឯកឧត្តម លោក លោកស្រី ជាសមាជិក ពាក់ព័ន្ធទាំងអស់ និងដៃគូអភិវឌ្ឍន៍រួមមាន៖ WHO, UNOPS, UNIADS, US-CDC, CHAI, LFA, KHANA, RHAC, Op-ASHA, CHC, CRS, FI, HACC, Chhouk Sar និងបណ្តាញអ្នកទទួលផលពីគម្រោងមូលនិធិសកល៕