ឯកឧត្តមរដ្ឋមន្ត្រី កែវ រតនៈ៖ ថវិកា ជាឧបសគ្គក្នុងការអភិវឌ្ឍថាមពលបៃតងរបស់ប្រទេសជាច្រើននៅក្នុងតំបន់

ភ្នំពេញ៖ នៅថ្ងៃទី០៧ ខែមិថុនា ឆ្នាំ២០២៤ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានអញ្ជើញចូលរួមពិភាក្សាជាមួយនឹងរដ្ឋាភិបាល វិស័យឯកជន ក៏ដូចជាភាគីពាក់ព័ន្ធផ្សេងទៀត ក្នុងការជួយដោះស្រាយបញ្ហាគន្លឹះមួយធំ ក្នុងការអភិវឌ្ឍវិស័យថាមពលបៃតងនៅកម្ពុជា ក៏ដូចជានៅក្នុងតំបន់ នៅទីក្រុងម៉ានីល ប្រទេសហ្វីលីពីន តបតាមការអញ្ជើញរបស់ប្រធានធនាគារអភិវឌ្ឍន៍អាស៊ី។

ឯកឧត្តមរដ្ឋមន្ត្រី កែវ រតនៈ បានបញ្ជាក់ថា ការអភិវឌ្ឍថាមពលបៃតងនេះ ត្រូវការថវិការាប់រយលានដុល្លារនៅពេលនេះ ហើយនៅពេលខាងមុខបន្តិចត្រូវការរាប់រយពាន់លានដុល្លារ ដើម្បីធ្វើការអភិវឌ្ឍវារីអគ្គិសនី ថាមពលដើរដោយពន្លឺព្រះអាទិត្យ ថាមពលខ្យល់ ៘ ហើយបញ្ហាគន្លឹះរបស់វាគឺត្រង់ថា ថវិការពិបាករក ដើម្បីបានច្រើនគឺពិបាករកខ្លាំងណាស់ អត្រាការប្រាក់ខ្ពស់ ហើយការបំពេញបែបបទផ្សេងៗ ដើម្បីឲ្យធនាគារផ្តល់ហិរញ្ញប្បទាននោះក៏មានការលំបាក និងស្មុគស្មាញ ដូច្នេះការពិភាក្សាថ្ងៃនេះគឺឈានទៅដោះស្រាយបញ្ហាតែម្ដង។

ឯកឧត្តមរដ្ឋមន្ត្រី សង្ឃឹមថាការជួបជុំថ្ងៃនេះគឺអនុញ្ញាតឲ្យធនាគារអភិវឌ្ឍន៍អាស៊ី និងធនាគារដទៃទៀត ក៏ដូចជាដៃគូឯកជនមានស្ថានភាពបរិស្ថានមួយដែលគេអាចបន្ថយថ្លៃក្នុងការផ្តល់ហិរញ្ញប្បទានឲ្យថាមពលបៃតងនេះកាន់តែមានភាពរហ័សរហួន ហើយនិងអត្រាការប្រាក់ដែលមានលក្ខណៈសមរម្យអាចយកមកអភិវឌ្ឍងាយ។

ឯកឧត្តមរដ្ឋមន្ត្រី បានបន្តថា កម្ពុជាយើងចង់បានថាមពលបៃតងឲ្យបានលើស ៧០ភាគរយ នៅត្រឹមឆ្នាំ២០២០យ៉ាងយូរ ដើម្បីយើងបង្កើតការងារឲ្យបានច្រើននៅក្នុងវិស័យអគ្គិសនីបៃតងនេះ។ ហើយទន្ទឹមនឹងនេះយើងក៏យកអគ្គិសនីដើម្បីអភិវឌ្ឍវិស័យផ្សេងទៀតដើម្បីបង្កើតការងារឲ្យយុវជន យុវនារីយើងបានធ្វើ នេះគឺជាទស្សនវិស័យច្បាស់លាស់របស់សម្ដេចមហាបវរធីបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលចង់ឲ្យកម្ពុជាយើងក្លាយទៅជាប្រទេសគំរូមួយក្នុងការអភិវឌ្ឍវិស័យថាមពលបៃតង ក៏ដូចជាការកសាងសេដ្ឋកិច្ចឲ្យកម្ពុជាយើង ក្នុងន័យសំដៅទៅលើការរកការរីកចម្រើនឲ្យប្រទេសជាតិ និងមាតុភូមិសម្រាប់រយៈពេលអនាគត។

ឯកឧត្តមរដ្ឋមន្ត្រី បានបន្ថែមថា ក្នុងក្របខ័ណ្ឌនៃការជជែកនេះជាការវិជ្ជមានគឺកម្ពុជាយើងបានចូលរួមចំណែកផ្តល់ធាតុចូលយ៉ាងច្រើន ហើយកម្ពុជាយើងក៏គាំទ្រការពង្រីកការតភ្ជាប់បណ្ដាញថាមពលអាស៊ានផងដែរ។ ហើយបញ្ហានេះត្រូវបានធនាគារអភិវឌ្ឍន៍អាស៊ី ក៏ដូចជាដៃគូដទៃទៀតមានការគាំទ្រយ៉ាងក្លៀវក្លា។

ជាមួយនឹងការចូលមកកម្ពុជា ឯកឧត្តមរដ្ឋមន្ត្រី កែវ រតនៈ សង្ឃឹមថាតំបន់ និងដៃគូពាក់ព័ន្ធ រកបានដំណោះស្រាយថ្មី ដែលជំរុញឲ្យការអភិវឌ្ឍថាមពលបៃតងនេះ កាន់តែមានការរីកចម្រើនឆាប់រហ័ស ៕