ក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ របស់ក្រសួងការងារ បើកកិច្ចប្រជុំបូកសរុបលទ្ធផលការងារសម្រេចបាន និងលើកទិសដៅអនុវត្តបន្ត

ភ្នំពេញ៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាអនុប្រធានក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ តំណាង ឯកឧត្តម ម៉េង ហុង អគ្គនាយក ប.ស.ស.ស្ដីទី បានចូលរួមកិច្ចប្រជុំបូកសរុបលទ្ធផលការងារសម្រេចបានប្រចាំខែឧសភា និងលើកទិសដៅការងារអនុវត្តបន្តសម្រាប់ខែមិថុនា ក្រោមអធិបតីភាព ឯកឧត្តម កត្តា អ៊ន រដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ របស់ក្រសួងការងារ និងបណ្ដុះបណ្ដាលវិជ្ជាជីវៈ នៅសាលប្រជុំនាយកដ្ឋាន ស.អ ស្នាក់ការកណ្ដាល ប.ស.ស. រាជធានីភ្នំពេញ នារសៀលថ្ងៃទី៤ ខែមិថុនា ឆ្នាំ២០២៤នេះ។

ក្នុងកិច្ចប្រជុំប្រចាំខែខាងលើ ឯកឧត្តមប្រធានក្រុមការងារ បានកោតសរសើរចំពោះក្រុមការងារប្រតិបត្តិការផ្ដល់ព័ត៌មាន ប្រព័ន្ធ Call Center ១២៨៦ និង១២៩៧ ដែលបានខិតខំបំពេញការងារយ៉ាងរលូនប្រកបដោយភាពល្អប្រសើរ ដែលការបំពេញការងារប្រកបដោយប្រសិទ្ធភាពនេះ ធ្វើឱ្យមានការកោតសរសើរពីស្ថាប័ននានា ដែលក្នុងនោះក្រុមការងារប្រតិបត្តិការផ្ដល់ព័ត៌មានត្រូវត្រៀមខ្លួន ក្នុងការទទួលធ្វើទស្សនកិច្ចសិក្សាពីស្ថាប័ននានាផងដែរ។

ឯកឧត្តមប្រធានក្រុមការងារ បានផ្ដាំផ្ញើដល់ក្រុមការងារប្រតិបត្តិការផ្ដល់ព័ត៌មាន ត្រូវពង្រឹងស្មារតីប្រកបដោយភាពរីករាយ ទុកភាពសៅហ្មងមួយឡែក ដើម្បីទទួលមតិរិះគន់ ចម្ងល់ និងផ្តល់ព័ត៌មានត្រឡប់ទៅកាន់សមាជិក ក៏ដូចជាសាធារណជនឱ្យបានរហ័ស ច្បាស់លាស់ ដើម្បីជាប្រយោជន៍បងប្អូនប្រជាពលរដ្ឋ ក៏ដូចជាប្រយោជន៍របស់ស្ថាប័ន និងប្រទេសជាតិទាំងមូល។

បើតាមរបាយការណ៍របស់លោក អ៊ុក សំអូន ប្រធានក្រុមការងារប្រតិបត្តិការផ្ដល់ព័ត៌មាន បានបង្ហាញឱ្យដឹងថា ប្រព័ន្ធ Call Center ១២៨៦ និង១២៩៧ សម្រាប់ខែឧសភានេះ ការហៅចូលមានកើនឡើង បើធៀបនឹងខែមេសាកន្លងទៅ ទន្ទឹមជាមួយនឹងហៅចូលកើនឡើងនេះ ការខកខានការទទួល មានការថយចុះ ដោយសារក្រុមការងារព្យាយាមក្នុងការឆ្លើយតបឱ្យបានឆាប់រហ័ស ច្បាស់លាស់ និងទាន់ពេលវេលា។

ទន្ទឹមជាមួយគ្នានេះ សូមបងប្អូនសាធារណជន ដែលទំនាក់ទំនងមកកាន់ ប្រព័ន្ធ Call Center ១២៨៦ និង១២៩៧ សូមព្យាយាមអត់ធ្មត់ក្នុងការរង់ចាំក្រុមការងារផ្ដល់ព័ត៌មានជូន សូមកុំចាកចេញមុនពេលទទួលបានព័ត៌មានពាក់ព័ន្ធនិងវិស័យការងារ សន្ដិសុខសង្គម និងបណ្ដុះបណ្ដាលវិជ្ជាជីវៈ ព្រោះការហៅមកកាន់លេខទូរស័ព្ទ ១២៩៧ និង ១២៨៦ ពុំមានគិតថ្លៃពីគ្រប់ប្រព័ន្ធទូរស័ព្ទ៕