ឯកឧត្តម ខូយ រីដា ជួបសំណេះសំណាល ជាមួយលោកគ្រូ អ្នកគ្រូ និងប្រកាសតែងតាំង នាយកបណ្តោះអាសន្ន នៃវិទ្យាល័យពោធិ៍សាត់
ភ្នំពេញ៖ នៅរសៀលថ្ងៃទី២៥ ខែមេសា ឆ្នាំ២០២៤នេះ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ នៅសាលប្រជុំបណ្តាល័យសាមគ្គី វិទ្យាល័យពោធិ៍សាត់ បានអញ្ជើញជាអធិបតី ក្នុងពិធីជួបសំណេះសំណាល ជាមួយលោកគ្រូ អ្នកគ្រូ និងប្រកាសតែងតាំង នាយកបណ្តោះអាសន្ន នៃវិទ្យាល័យពោធិ៍សាត់។
យោងលិខិតបង្គាប់ការ លេខ១២៧/០៤ អយកខ.បក របស់មន្ទីរអប់រំ យុវជន និងកីឡាខេត្តពោធិ៍សាត់ ចុះថ្ងៃទី០៨ ខែមេសា ឆ្នាំ២០២៤ ត្រូវបានបង្គាប់ការ លោក ជា ឡេងឃួន អត្តលេខ ១៦៨១៥០០០៧១ ឋានន្តរស័ក្តិជាគ្រូបង្រៀនកម្រិតឧត្តម ដើមខ្សែពិសេស ថ្នាក់លេខ៤ នៃក្របខ័ណ្ឌគ្រូបង្រៀនកម្រិតឧត្តម បច្ចុប្បន្នជានាយករងវិទ្យាល័យ ឱ្យកាន់តួនាទីជានាយកបណ្តោះអាសន្ន នៃវិទ្យាល័យពោធិ៍សាត់ ជំនួសលោក ជិន ផល្លា ដែលត្រូវចូលនិវត្តន៍។
ឆ្លៀតក្នុងឱកាសនោះ ឯកឧត្តម ខូយ រីដា ក៏បានប្រគល់ប័ណ្ណសរសើរ ដល់គណៈគ្រប់គ្រងវិទ្យាល័យ និងប្រកាសផ្តល់ដំណើរទស្សនកិច្ចសិក្សា សម្រាប់បុគ្គលិកអប់រំ ក្នុងក្រុងពោធិ៍សាត់ ទៅខេត្តព្រះសីហនុ ឬខេត្តសៀមរាប នៅដើមខែឧសភា ឆ្នាំ២០២៤ខាងមុខនេះ ដោយចាប់ផ្តើមដំបូង គឺវិទ្យាល័យពោធិ៍សាត់ផងដែរ៕
