មេបញ្ជាការតំបន់ប្រតិបត្តិការសឹកបាត់ដំបង កោតសរសើរ និងវាយតម្លៃខ្ពស់លើកិច្ចខិតខំបំពេញភារកិច្ចរបស់នាយ-ពលទាហាន ផ្នែកសឹករងកំរៀង
ភ្នំពេញ៖ នៅព្រឹកថ្ងៃទី២៨ ខែមីនា ឆ្នាំ២០២៤ នៅទីបញ្ជាការ កងអនុសេនាធំទី១ ផ្នែកសឹករង កំរៀង បានប្រារព្ធពិធីប្រជុំបូកសរុបលទ្ធផលការងារយោធាសន្តិសុខឆ្នាំ២០២៣ និងផ្សព្វផ្សាយផែនការសកម្មភាពការងារយោធាសន្តិសុខឆ្នាំ២០២៤ ក្រោមអធិបតីភាពលោកឧត្តមសេនីយ៍ត្រី ហួម ខ្វែក មេបញ្ជាការ តំបន់ប្រតិបត្ដិការសឹករង បាត់ដំបង។
ក្នុងឱកាសបូកសរុបនោះដែរលោកមេបញ្ជាការ បានពាំនាំពាក្យផ្តាំផ្ញើសួរសុខទុក្ខរបស់ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ និងបានធ្វើការកោតសរសើរដល់កម្លាំងផ្នែកសឹករង កំរៀង ដែលកន្លងមកបានខិតខំប្រឹងប្រែងកសាងអង្គភាព ការចុះជួយសង្គ្រោះប្រជាពលរដ្ឋដែលជួបការលំបាក និងជួបគ្រោះមហន្តរាយផ្សេងៗ រហូតមានការសរសើរពីសំណាក់ប្រជាពលរដ្ឋរស់នៅក្នុងភូមិសាស្ត្រដែលទទួលខុសត្រូវ ហើយឱ្យបន្តអនុវត្តការងារកសាងអង្គភាព ការងារបង្កបង្កើនផល ចិញ្ចឹមសត្វ ដើម្បីផ្គត់ផ្គង់ឱ្យដល់កម្លាំងជួរមុខក្នុងការបំពេញបេសកកម្មល្បាតទាំងយប់ទាំងថ្ងៃតាមខ្សែបន្ទាត់ព្រំដែនតាមផែនការ និងបទបញ្ជារបស់ថ្នាក់លើ។
ឧត្តមសេនីយ៍ត្រី ហួម ខ្វែក ក៏បានផ្សព្វផ្សាយសភាពការណ៍ថ្មីៗ បទបញ្ជា និងសេចក្តីណែនាំ របស់ថ្នាក់លើស្តីពីវិធានការក្នុងការប្រយុទ្ធប្រឆាំងគ្រឿងញៀនដល់នាយទាហាន-ពលទាហាន ព្រមទាំងបានណែនាំបន្ថែមដល់ថ្នាក់ដឹកនាំ ព្រមទាំងនាយទាហាន នាយទាហានរង ពលទាហាន ត្រូវបន្តចូលរួមគោរព និងអនុវត្តនូវផែនការរបស់ថ្នាក់លើបានដាក់ចុះឱ្យបានម៉ឺងម៉ាត់បំផុតក្នុងការទប់ស្កាត់ឱ្យបាននូវរាល់បទល្មើសឆ្លងដែនខុសច្បាប់ផ្សេងៗ។
ជាចុងក្រោយ ឧត្តមសេនីយ៍ត្រី ហួម ខ្វែក បានអញ្ជើញប្រគល់សេចក្តីសម្រេចផ្លាស់ប្តូរមុខងារ ប័ណ្ណសរសើរ លិខិតសរសើរ ជូនដល់នាយទាហាន នាយទាហានរង ពលទាហានដែលមានស្នាដៃឆ្នើមក្នុងការងារ១ឆ្នាំកន្លងមក និងបានប្រគល់ថវិកាចំនួន ១.០០០.០០០រៀល ជូនលោកមេបញ្ជាការ ផ្នែកសឹករង កំរៀងផងដែរ៕
