ឯកឧត្តមបណ្ឌិតសភាចារ្យ ហង់ជួន ណារ៉ុន ដឹកបនាំកិច្ចប្រជុំក្រុមការងារលេខាធិការក្រសួងអប់រំ យុវជន និងកីឡា

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២១ ខែមីនា ឆ្នាំ២០២៤ បានដឹកនាំកិច្ចប្រជុំ ដើម្បីរៀបចំបែងចែកក្រុមការងារលេខាធិការក្រសួងអប់រំ យុវជន និងកីឡា ឱ្យមានប្រសិទ្ធភាពឆ្លើយតបទៅនឹងទំហំការងារបច្ចុប្បន្ន និងអនាគត ដោយមានការចូលរួមពី ឯកឧត្តម លោកជំទាវ មន្ត្រីមកពីគ្រប់អង្គភាពពាក់ព័ន្ធ ក្រោមឱវាទក្រសួង។

មុនឈានដល់ការពិភាក្សា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បញ្ជាក់ឡើងវិញពីកំណែទម្រង់សំខាន់ៗ ក្នុងការងារអប់រំ ដូចជា ៖ (១). មុខងារភារកិច្ច (២). ធនធានមនុស្ស (៣). ជំនាញបច្ចេកទេស (៤). សាលារៀនក្នុងតំបន់ជួបការលំបាក (៥). ការបណ្តុះបណ្ដាលគ្រូ ដោយត្រូវមានក្រុមការងារជាក់លាក់ធ្វើអធិការកិច្ចជាប់ជាប្រចាំ ត្រូវមានយន្តការចុះទៅសួរពិនិត្យតាមដានដោយផ្ទាល់ និងត្រូវដាក់ប្រជុំ ២ ឬ ៣ ដងក្នុងមួយឆ្នាំ។

កិច្ចប្រជុំនេះដែរ ផ្ដោតពិភាក្សាយ៉ាងផុសផុលផ្លាស់ប្តូរ​យោបល់ លើការបែងចែកតួនាទីភារកិច្ច របស់លេខាធិការក្រសួង អប់រំ យុវជន និង កីឡា ឱ្យឆ្លើយតបនឹងតម្រូវការងារ និង ការរៀបចំក្រុមការងារអធិការកិច្ចដើម្បីវាយតម្លៃលទ្ធផលសម្រេចបាន ឆ្លើយតបនឹង យុទ្ធសាស្ត្របញ្ចកោណនិង ចំណុចខ្វះខាតដែលត្រូវកែលម្អបន្ថែមទៀត។

ដើម្បីឱ្យការអនុវត្តផែនការសកម្មភាពការងារ មានភាពរលូន និងល្អប្រសើរឡើង ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានផ្ដល់អនុសាសន៍ ឱ្យក្រុមការងារលេខាធិការ កំណត់បែងចែកឱ្យច្បាស់លាស់នូវភារកិច្ចការទទួលខុសត្រូវរបស់ខ្លួន, រៀបចំប្រព័ន្ធអធិការកិច្ច ដើម្បីតាមដាន វាយតម្លៃ សំដៅកែលម្អជាប្រចាំ , ពិនិត្យមុខងារ និងកំណត់ជំនាញដែលត្រូវការ រួចដាក់ផែនការបណ្តុះបណ្តាលធនធានមនុស្សឱ្យចំគោលដៅ ពិនិត្យមើលប្រសិទ្ធភាពប្រសិទ្ធផលការងារថាឆ្លើយតបកម្រិតណាទៅនឹង វិធានគន្លឹះជំរុញកំណែទម្រង់វិស័យអប់រំ ក៏ដូចជាផែនការយុទ្ធសាស្ត្របញ្ចកោណដំណាក់កាលទី ១ នៃរាជរដ្ឋាភិបាលកម្ពុជា និតិកាលពី ៧នៃរដ្ឋសភា ដែលបានកំណត់កំណែទម្រង់វិស័យអប់រំជាការងារអាទិភាព៕