ក្រសួងទេសចរណ៍ រៀបចំវគ្គបណ្តុះបណ្តាលអំពី និន្នាការ និងតម្រូវការទេសចរមូស្លីម ដល់ភាគីពាក់ពន្ធក្នុងវិស័យទេសចរណ៍ នៅគោលដៅខេត្តព្រះសីហនុ
ភ្នំពេញ៖ នាថ្ងៃទី១ ខែមីនា ឆ្នាំ២០២៤ ឯកឧត្តម ហោ សារុន រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ចូលរួមជាអធិបតី ក្នុងវគ្គបណ្តុះបណ្តាលអំពីនិន្នាការ និងតម្រូវការ ទេសចរមូស្លីមដល់ភាគីពាក់ពន្ធក្នុងវិស័យទេសចរណ៍ ក្នុងនោះក៏មានការចូលរួមពីសំណាក់ ឯកឧត្ដម ម៉ាង សុីណេត អភិបាលរង តំណាងឯកឧត្តម គួច ចំរេីន អភិបាល នៃគណៈអភិបាលខេត្តព្រះសីហនុ, គណៈអុីមាំខេត្តព្រះសីហនុ, វិស័យឯកជននៃឧស្សាហកម្មទេសចរណ៍ក្នុងតំបន់ព្រះសីហនុ និងភាគីពាក់ពន្ធក្នុងវិស័យទេសចរណ៍ចំនួនសរុបប្រមាណ ១១០នាក់ នៅសណ្ឋាគារ Sea Breeze ក្រុងព្រះសីហនុ ខេត្តព្រះសីហនុ ។
នាឱកាសនោះ ឯកឧត្តម ហោ សារុន បានឱ្យដឹងថា កម្ពុជា រង់ចាំទទួលនិងធ្វើបដិសណ្ឋារកិច្ចភ្ញៀវទេសចរគ្រប់ជាតិសាសន៍ទាំងអស់មកពីជុំវិញពិភពលោក ដូចពាក្យស្លោកមួយថា “កម្ពុជាស្វាគមន៍គ្រប់ភ្ញៀវទេសចរទាំងអស់”។ ក្នុងន័យនេះ ក្រសួងទេសចរណ៍តែងតែយកចិត្តទុកដាក់ស្វែងយល់ និងបំពេញតម្រូវការផ្សេងៗគ្នាតាមប្រភពទីផ្សារទេសចរណ៍នីមួយៗ ដែលក្នុងនោះ ទេសចរណ៍មូស្លីមក៏ជាប្រភពទីផ្សារ និងជាភ្ញៀវទេសចរ ដែលក្រសួងទេសចរណ៍តែងតែគិតគូរផងដែរ។
“វគ្គបណ្តុះបណ្តាលអំពីនិន្នាការ និងតម្រូវការទេសចរណ៍មូស្លីម” ដែលប្រារព្ធធ្វើឡើងនៅពេលនេះ គឺជាសកម្មភាពមួយក្នុងចំណោមសកម្មភាពជាច្រើនទៀត ដែលក្រសួងទេសចរណ៍យកចិត្តទុកដាក់ក្នុងការបំពេញតម្រូវការ និងបង្កើនភាពទាក់ទាញនៅក្នុងចំណោមទីផ្សារទេសចរណ៍មូស្លីម ដើម្បីឆ្លើយតបទៅនឹងនិន្នាការ ក៏ដូចជាទំហំទីផ្សារទេសចរណ៍មូស្លីមដែលមានការកើនឡើងជាបន្តបន្ទាប់។
ការរៀបចំកម្មវិធីនេះឡេីងក្នុងមានបំណងចង់ឲ្យវិស័យឯកជន និងភាគីពាក់ពន្ធក្នុងវិស័យទេសចរណ៍បានយល់ដឹងអំពីតម្រូវការរបស់ភ្ញៀវមូស្លីម ដេីម្បីងាយស្រួលឲ្យមូលដ្ឋានអាជីវកម្មរបស់ពួកគាត់ បានរៀបចំទទួល បដិសណ្ឋារកិច្ចល្អប្រសេីរ ជូនដល់ទេសចរមូស្លីម ជាពិសេសនៅខេត្តព្រះសីហនុ មានភ្ញៀវឥណ្ឌូនេស៊ី ជាច្រេីន ដែលពួកគាត់មានតម្រូវការបែបមូស្លីម។
គួរបញ្ជាក់ផងថា និន្នាការនៃការធ្វើដំណើររបស់ភ្ញៀវទេសចរមូស្លីម យោងតាមទិន្នន័យរបស់ទីភ្នាក់ងារ Global Muslim Travel Index បានបង្ហាញថា ភ្ញៀវទេសចរមូស្លីមអន្តរជាតិមានការកើនឡើងជាបន្តបន្ទាប់ ក្នុងនោះមុនវិបត្តិកូវីដ-១៩ កាលពីឆ្នាំ២០១៩ មានចំនួន១៦០លាននាក់ និងក្នុងដំណាក់កាលនៃការងើបឡើងវិញនៃវិបត្តិកូវីដ-១៩ នេះឃើញថា៖ ក្នុងឆ្នាំ២០២៣ មានចំនួន ១៤០លាននាក់
និងតាមការព្យាករណ៍នឹងកើនឡើង ២៣០លាន នៅឆ្នាំ២០២៦៕
