លោក ពូទីន បានប្រគល់រថយន្តដែលផលិតដោយរុស្ស៊ីដល់លោក គីម ជុងអ៊ុន ក្នុងការបង្ហាញទំនាក់ទំនងរបស់ពួកគេ

សេអ៊ូល៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានផ្តល់អំណោយដល់មេដឹកនាំកូរ៉េខាងជើង លោក គីម ជុងអ៊ុន នូវរថយន្តផលិតពីរុស្ស៊ី សម្រាប់ប្រើប្រាស់ផ្ទាល់ខ្លួនរបស់គាត់ ក្នុងការបង្ហាញអំពីទំនាក់ទំនងពិសេសរបស់ពួកគេ នេះបើតាមប្រព័ន្ធផ្សព្វផ្សាយរដ្ឋរបស់ប្រទេសកូរ៉េខាងជើងបានរាយការណ៍កាលពីថ្ងៃអង្គារ។

របាយការណ៍មិនបានបញ្ជាក់ថាតើរថយន្តប្រភេទណា ឬត្រូវដឹកជញ្ជូនដោយរបៀបណានោះទេ។ ប៉ុន្តែក្រុមអ្នកសង្កេតការណ៍បាននិយាយថា វាអាចបំពានលើសេចក្តីសម្រេចរបស់អង្គការសហប្រជាជាតិ ដែលហាមឃាត់ការផ្គត់ផ្គង់វត្ថុប្រណីតដល់ប្រទេសកូរ៉េខាងជើង ក្នុងគោលបំណងដាក់សម្ពាធឱ្យប្រទេសនេះបោះបង់ចោលអាវុធនុយក្លេអ៊ែររបស់ខ្លួន។

ទីភ្នាក់ងារសារព័ត៌មានកណ្តាលកូរ៉េបានឲ្យដឹងថា ប្អូនស្រីរបស់លោក គីម ជុងអ៊ុន គឺលោកស្រី Kim Yo Jong និងមន្ត្រីកូរ៉េខាងជើងម្នាក់ទៀតបានទទួលយកអំណោយកាលពីថ្ងៃអាទិត្យ ហើយនាងបានថ្លែងអំណរគុណដល់បងប្រុសរបស់នាងទៅកាន់លោកពូទីន។ លោកស្រី Kim Yo Jong ក៏បានឲ្យដឹងផងដែរថា អំណោយនេះបង្ហាញពីទំនាក់ទំនងផ្ទាល់ខ្លួនពិសេសរវាងមេដឹកនាំ។

កូរ៉េខាងជើង និងរុស្ស៊ីបានជំរុញកិច្ចសហប្រតិបត្តិការរបស់ពួកគេយ៉ាងខ្លាំងចាប់តាំងពីលោក គីម ជុងអ៊ុន បានធ្វើដំណើរទៅកាន់ប្រទេសរុស្ស៊ីកាលពីខែកញ្ញាឆ្នាំមុនសម្រាប់កិច្ចប្រជុំកំពូលជាមួយលោកពូទីន។

យោងតាមទីភ្នាក់ងារសារព័ត៌មានរដ្ឋ Tass របស់រុស្ស៊ី Aurus គឺជាម៉ាករថយន្តប្រណីតរបស់រុស្ស៊ីដំបូងគេ ហើយវាត្រូវបានប្រើប្រាស់នៅក្នុងរថយន្តរបស់មន្ត្រីកំពូលៗ រួមទាំងលោក Putin ចាប់តាំងពីលោកបានប្រើប្រាស់រថយន្ត Limousine Anrus ជាលើកដំបូងក្នុងអំឡុងពិធីសម្ពោធរបស់លោកក្នុងឆ្នាំ២០១៨។

លោក គីម ជុងអ៊ុន មានវ័យ ៤០ឆ្នាំ ត្រូវបានគេដឹងថា មានរថយន្តទំនើបៗផលិតពីបរទេសជាច្រើន ដែលគេជឿថាត្រូវបានរត់ពន្ធចូលប្រទេសរបស់គាត់ ដោយបំពានលើដំណោះស្រាយរបស់អង្គការសហប្រជាជាតិ។

ប្រភព៖ Time

ប្រែសម្រួលដោយ៖ ឡាយ លីហួ