ក្រសួងបរិស្ថាន សម្ដែងការសោកស្តាយជាខ្លាំងចំពោះការបាត់បង់កូនដំរីព្រៃមួយក្បាល និងអំពាវនាវដល់គ្រប់ភាគីចូលរួមអភិរក្សសត្វព្រៃ

ភ្នំពេញ៖ ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យរងក្រសួងបរិស្ថាន បានសម្ដែងការសោកស្តាយជាខ្លាំងចំពោះការបាត់បង់កូនដំរីព្រៃមួយក្បាលនៅថ្ងៃទី២៦ ខែមករានេះ និងបានអំពាវនាវដល់គ្រប់ភាគីចូលរួមអភិរក្សសត្វព្រៃ។

កូនដំរីព្រៃមួយក្បាលត្រូវបានគេប្រទះឃើញបាត់បង់ជីវិតនៅបរិវេណ ក្នុងភូមិជីក្លប់ ឃុំសុខសាន្ត ស្រុកកកោះញែក ខេត្តមណ្ឌលគិរី ។កូនដំរីព្រៃមួយក្បាលនេះត្រូវបានគេប្រទះឃើញវាដេកស្លាប់ និងមានស្លាកស្នាមអាវុធ បុកចំឆ្អឹងជំនីឆ្វេងខាងឆ្វេង។

ថ្លែងប្រាប់អង្គភាពសារព័ត៌មាន Hotnews Asia នៅយប់ថ្ងៃទី២៦ មករានេះ ឯកឧត្តម ខ្វៃ អាទិត្យា បានបញ្ជាក់ថា សមត្ថកិច្ចមន្ទីរបរិស្ថានខេត្តមណ្ឌលគីរី នគរបាលស្រុកកោះញែក បានធ្វើកោស័វិច្ឆ៧យ រហូតមកដល់ពេលនេះ គេមិនទាន់អាចសន្និដ្ឋាន បាននៅឡើយ ថាកូនដំរីព្រៃនេះស្លាប់ដោយការបាញ់ ដោយគ្រាប់កាំភ្លើងកែច្នៃឬផ្លែព្រួញនោះទេ ហើយ ការពិនិត្យពីមន្រ្តីជំនាញ និងសមត្ថកិច្ចស្រុកកោះញែក រកមិនឃើញមានគ្រាប់ជាប់នៅក្នុងខ្លួនដំរីនោះឡើយ។

ឯកឧត្តម ខ្វៃ អាទិត្យា តំណាងឱ្យក្រសួងបរិស្ថាន បានសម្ដែងការសោកស្តាយជាខ្លាំងក្នុងការបាត់បង់សត្វព្រៃដ៏កម្រមួយនេះក្នុងតំបន់ការពារធម្មជាតិនៅកម្ពុជា និងសូមអំពាវនាវដល់សមត្ថកិច្ច គ្រប់ភាគីចូលរួមអភិរក្សសត្វព្រៃ ក៏ដូចជាការពារធនធានធម្មជាតិកម្ពុជា និងស្វែងរកជនដៃដល់ មកថ្កោលទោសតាមផ្លូវច្បាប់។

ឯកឧត្ដមបន្តថា កន្លងមកនេះ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានដាក់ចេញ ការអនុវត្តច្បាប់ឲ្យបានដាច់ខាត ដោយមិនលើកលែង ចំពោះអ្នកប្រព្រឹត្តបទល្មើសធនធានធម្មជាតិ ដើម្បីធានាប្រសិទ្ធភាព នៃកិច្ចការពារបរិស្ថាននិងការគ្រប់គ្រងធនធានធម្មជាតិ ចំនួន៤ រួមមាន៖ ១-ក្រសួងបរិស្ថានជំរុញការអនុវត្តច្បាប់១០០% និងបញ្ចប់នូវវប្បធម៌ អប់រំ ណែនាំ និងចុះកិច្ចសន្យា ហើយដោះលែង ចំពោះអ្នកប្រព្រឹត្តបទល្មើសធនធានធម្មជាតិ។ ២- ក្រសួងបរិស្ថាន សហការជាមួយគណៈបញ្ជាការឯកភាពរដ្ឋបាលរាជធានី-ខេត្ត ជាពិសេសជាមួយអាជ្ញាធរដែនដីគ្រប់លំដាប់ថ្នាក់ ឲ្យបានស្អិតរមួត ដើម្បីទប់ស្កាត់បទល្មើសធនធានធម្មជាតិ នៅតាមតំបន់ការពារធម្មជាតិ។ ៣-សហការជាមួយអង្គភាពប្រឆាំងនឹងអំពើពុករលួយ និងបញ្ជាការដ្ឋានកងរាជអាវុធហត្ថលើផ្ទៃប្រទេស ធ្វើការបង្រ្កាបនិងទប់ស្កាត់បទល្មើសធនធានធម្មជាតិ បន្ថែមលើកិច្ចសហការជាមួយអាជ្ញាធរមូលដ្ឋាន ដែលបានអនុវត្តកន្លងមក និង៤-ជំរុញការដាំដើមឈើឲ្យច្រើនជាងការកាប់ ដើម្បីរក្សានូវកំណើន ជាពិសេសការជំរុញ ការដាំស្តារព្រៃឈើ ដែលជាទិសដៅអាទិភាព បង្កើនគម្របព្រៃឈើឲ្យបាន៦០% នៅឆ្នាំ២០៥០ ស្របតាមយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា និងលើកកម្ពស់ជីវភាពប្រជាពលរដ្ឋ នៅតាមសហគមន៍ រួមទាំងការអភិរក្សជីវចម្រុះដោយចីរភាព។

ឯកឧត្តម ខ្វៃ អាទិត្យានាំពាក្យរងក្រសួងបរិស្ថានបានបន្ថែមថា ដំរីអាស៊ី ត្រូវបានចាត់បញ្ចូលជាប្រភេទជិតផុតពូជនៅក្នុងបញ្ជីក្រហមរបស់អង្គការសហភាពអន្ដរជាតិដើម្បីការអភិរក្សធម្មជាតិ (IUCN)។

ឯកឧត្ដមបានបញ្ជាក់ទៀតថា នៅក្នុងប្រទេសកម្ពុជាបច្ចុប្បន្ននេះ ដំរីអាស៊ីភាគច្រើនរស់នៅក្នុងតំបន់ជួរភ្នំក្រវាញ តំបន់ខ្ពង់រាបខាងជើងបឹងទន្លេសាប និងតំបន់ខ្ពង់រាបភាគខាងកើតក្នុងខេត្តមណ្ឌលគិរី រតនគិរី និង ស្ទឹងត្រែង ដែលជាតំបន់ជីវៈចម្រុះដ៏សំបូរបែប ប្រព័ន្ធអេកូទ្បូស៊ី ដែលមានសក្តានុពលខ្ពស់និងមានទីជម្រាលអំណោយផលដល់ការរស់នៅរបស់សត្វដំរី និងសត្វព្រៃផ្សេងៗទៀត៕