អភិបាលខេត្តកំពង់ចាម ដឹកនាំក្រុមការងារ ចុះពិនិត្យមើលស្ថានភាព ការបាក់ច្រាំងទន្លេ ដែលធ្វើឲ្យប៉ះពាល់លំនៅដ្ឋាន ពលរដ្ឋប្រមាណ ៤០គ្រួសារ ក្នុងស្រុកស្ទឹងត្រង់

ភ្នំពេញ៖ ឯកឧត្ដម អ៊ុន ចាន់ដា អភិបាលខេត្តកំពង់ចាម នៅថ្ងៃទី១៦ ខែមករា ឆ្នាំ២០២៤ បានអញ្ជើញដឹកនាំក្រុមការងារ មន្ត្រីជំនាញពាក់ព័ន្ធ ចុះពិនិត្យមើលស្ថានភាព ការបាក់ច្រាំងទន្លេ ដែលធ្វើឲ្យប៉ះពាល់លំនៅដ្ឋាន ប្រជាពលរដ្ឋប្រមាណជា៤០គ្រួសារ ដែលរស់នៅតាមបណ្ដោយដងទន្លេមេគង្គ ចាប់ពីឃុំព្រែកក់ រហូតដល់ឃុំខ្ពបតាងួន ក្នុងស្រុកស្ទឹងត្រង់ និងប៉ះពាល់ដល់ផ្លូវបេតុង និងផ្លូវកៅស៊ូមួយចំនួនផងដែរ។

ឯកឧត្ដម អ៊ុន ចាន់ដា បានឲ្យដឹងថា ស្ថានភាពច្រាំងទន្លេ តាមបណ្ដាឃុំមួយចំនួន នៅក្នុងស្រុកស្ទឹងត្រង់ បានបាក់ស្រុត បន្ទាប់ពីទឹកទន្លេបានស្រកទៅវិញ ប្រការនេះ បានធ្វើឲ្យប៉ះពាល់ដល់លំនៅដ្ឋាន របស់ប្រជាពលរដ្ឋប្រមាណជា ៤០ គ្រួសារ និងប៉ះពាល់ដល់ផ្លូវបេតុងនិងផ្លូវក្រាលកៅស៊ូ មួយចំនួនផងដែរ។

ឯកឧត្ដមអភិបាលខេត្ត បានបញ្ជាក់ថា ឃុំដែលរងផលប៉ះពាល់ដោយសារបាក់ច្រាំងទន្លេនេះ មានដូចជា៖ ឃុំព្រែកកក់ ឃុំពាមកោះស្នា ឃុំព្រះអណ្ដូង និងឃុំខ្ពបតាងួន ដែលសរុបប្រវែងច្រាំងទន្លេបាក់ស្រុតនោះ ប្រមាណជាង ១,០០០ ម៉ែត្រ ក្នុងនោះ ឃុំដែលរងការខូចខាតធ្ងន់ធ្ងរ គឺឃុំព្រែកកក់ ដែលអាចប្រឈមនឹងការកាត់ផ្តាច់ផ្លូវបេតុង ធ្វើឱ្យប្រជាពលរដ្ឋក្នុងភូមិ មិនអាចធ្វើដំណើរបាន។

ដោយឡែក នៅក្នុងឃុំព្រះអណ្ដូង បានទទួលរងផលប៉ះពាល់ធ្ងន់ធ្ងរដែរ ប្រវែងប្រហែលជា ១០០ ម៉ែត្រ និងឃុំ ខ្ពបតាងួន ប្រវែងជាង ១០០ ម៉ែត្រផងដែរ ដែលអាចប៉ះពាល់ ដល់លំនៅដ្ឋានប្រជាពលរដ្ឋ និងផ្លូវបេតុង។

ឯកឧត្ដមអភិបាលខេត្ត បានឲ្យដឹងទៀតថា ក្រុមការងារដែលបានចុះពិនិត្យស្ថានភាពបាក់ច្រាំងទន្លេនោះ មានអាជ្ញាធរខេត្ត និងលោកអគ្គនាយកបច្ចេកទេស តំណាងក្រសួងធនធានទឹក និងឧតុនិយម ដើម្បីធ្វើការសិក្សាលើបញ្ហានោះ ជាមួយនឹងក្រសួងសេដ្ឋកិច្ច និងហិរញ្ញវត្ថុ ដើម្បីសុំគោលការណ៍ ពីលោករដ្ឋមន្ត្រីក្រសួងធនធានទឹក ពិនិត្យមើលលទ្ធភាព នៃការជួសជុលស្ដារឡើងវិញច្រាំង ដែលបានបាក់នោះជាបន្ទាន់តែម្តង៕