ក្រសួងការងារ និងអង្គការ ILO បើកកិច្ចប្រជុំស្តីពីការប្រមូលធាតុចូល សម្រាប់ការសិក្សាដោយវិភាគលើភាព ក្រៅប្រព័ន្ធក្នុងវិស័យសំណង់

ភ្នំពេញ៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ឯកឧត្តម ម៉េង ហុង អគ្គនាយក ប.ស.ស. ស្តីទី នាព្រឹកថ្ងៃទី១១ ខែធ្នូ ឆ្នាំ២០២៣ នេះ ឯកឧត្តមបណ្ឌិតអគ្គនាយករង បានចូលប្រជុំជាមួយជំនាញការខាង អង្គការអន្តរជាតិខាងការងារ (ILO) ដែលដឹកនាំដោយ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ ដើម្បីពិភាក្សាអំពីការប្រមូលធាតុចូលសម្រាប់ការ សិក្សាក្រុមគោលដៅនៃសេដ្ឋកិច្ចក្រៅប្រព័ន្ធ ជាពិសេសកម្មករក្នុងវិស័យសំណង់។

ការរៀបចំឱ្យមានកិច្ចប្រជុំពិភាក្សាពេញមួយព្រឹកនេះ គឺដើម្បីសិក្សាស្វែងយល់អំពីយន្តការ និងវិធីសាស្ត្រ នៃការពង្រីកវិសាលភាពសម្រាប់វិស័យសំណង់ ពិសេសគឺការស្វែងរកនូវបញ្ហាប្រឈមនៃការអនុវត្តច្បាប់ គោលនយោបាយ និងលិខិតបទដ្ឋានគតិយុត្ត ដែលពាក់ព័ន្ធនឹងវិស័យសំណង់ ដែលទាមទារឱ្យមានការយកចិត្តទុកដាក់ផ្តល់ការធានារ៉ាប់រង សន្តិសុខសង្គម រួមចំណែកកាត់បន្ថយភាពក្រីក្រ និងលើកកម្ពស់ស្ថិរភាពសង្គម។

សូមបញ្ជាក់ថា កិច្ចប្រជុំពិភាក្សានេះ ដឹកនាំដោយលោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមពីមន្រ្តីជំនាញនៃ ប.ស.ស តំណាងអង្គការអន្តរជាតិខាងការងារ (ILO) និងតំណាងក្រសួងការងារ និងបណ្តុះបណ្តាលវិជ្ជាជីវៈ សរុបប្រមាណជាង ៣០នាក់ តាមរយៈប្រព័ន្ធ Zoom៕