លោកជំទាវ ពុំ ចន្ទីនី ជួបសម្តែងការគួរសម និងប្រគល់បណ្ណថ្លែងអំណរគុណជូន ក្រុមហ៊ុនRoyal Cambodian Limousine Service Co.,Ltd
ភ្នំពេញ៖ នៅរសៀលថ្ងៃទី ២០ ខែតុលា ឆ្នាំ២០២៣ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានជួបសម្តែងការគួរសម និងប្រគល់បណ្ណថ្លែងអំណរគុណជូន ក្រុមហ៊ុនRoyal Cambodian Limousine Service Co.,Ltd ដែលដឹកនាំដោយ លោក Jacob Montross និង សហការី ។ ជំនួបនេះបានប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា។
ក្នុងនាមកាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន, លោកជំទាវ អគ្គលេខាធិការ បានថ្លែងអំណរគុណយ៉ាងជ្រាលជ្រៅចំពោះ ក្រុមហ៊ុនRoyal Cambodian Limousine Service Co.,Ltd ដែលបានជួយឧបត្ថម្ភរថយន្តចំនួន១៥គ្រឿងជូនកាកបាទក្រហមកម្ពុជាសម្រាប់ជាមធ្យោបាយធ្វើដំណើររបស់គណៈប្រតិភូចំនួន ១០ សមាគមជាតិ ដែលអញ្ជើញមកចូលរួមកិច្ចប្រជុំថ្នាក់ដឹកនាំលើកទី២០ និងវេទិកាយុវជនលើកទី២ នៃសមាគមជាតិ កាកបាទក្រហម និងអឌ្ឍចន្ទក្រហម ភូមិភាគអាស៊ីអាគ្នេយ៍កាលពីថ្ងៃទី ១៧-២២ ខែកញ្ញា ឆ្នាំ២០២៣កន្លងទៅ។
ជាមួយគ្នានោះដែរ លោកជំទាវអគ្គលេខាធិការបានពាំនាំប្រសាសន៍ផ្តាំផ្ញើសួរសុខទុក្ខ ពីសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះ លោក Jacob Montross និងសហការី ព្រមទាំងថ្នាក់ដឹកនាំ បុគ្គលិកទាំងអស់ នៃក្រុមហ៊ុន Royal Cambodian Limousine Service Co.,Ltd សូមមានសុខភាពល្អ ធ្វើដំណើរទីជិតទីឆ្ងាយប្រកបដោយសុខសុវត្ថិភាព និង ជោគជ័យគ្រប់ភារកិច្ច។
ជាកិច្ចឆ្លើយតប លោក Jacob Montross និង សហការី ក៏បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលអនុញ្ញាតឲ្យក្រុមហ៊ុនបានចូលរួមចំណែកលើមធ្យោបាយធ្វើដំណើររបស់គណៈប្រតិភូដើម្បីលើកកម្ពស់កិត្តិនាមរបស់កាកបាទក្រហមកម្ពុជា ក្នុងនាមជាម្ចាស់ផ្ទះនៃកិច្ចប្រជុំថ្នាក់ដឹកនាំលើកទី២០ និងវេទិកាយុវជនលើកទី២ នៃសមាគមជាតិ កាកបាទក្រហម និងអឌ្ឍចន្ទក្រហម ភូមិភាគអាស៊ីអាគ្នេយ៍ កាលពីថ្ងៃទី ១៧-២២ ខែកញ្ញា ឆ្នាំ២០២៣ កន្លងទៅនេះ និងនៅតែគាំទ្រការងារមនុស្សធម៌របស់ កាកបាទក្រហមកម្ពុជាបន្តទៀត៕
