ឯកឧត្តម សាយ សំអាល់៖ ការសម្រេចចិត្តដ៏ត្រឹមត្រូវមករួមរស់ជីវភាពនយោបាយជាមួយគណបក្សប្រជាជនកម្ពុជា ជាក្ដីសង្ឃឹមសម្រាប់យើងទាំងអស់គ្នា

ភ្នំពេញ៖ ឯកឧត្តម សាយ សំអាល់ សមាជិកគណៈកម្មាធិការកណ្ដាល និងជាប្រធានក្រុមការងារចុះមូលដ្ឋានខេត្តព្រះសីហនុ បានលើកឡើងថា ការសម្រេចចិត្តដ៏ត្រឹមត្រូវមករួមរស់ជីវភាពនយោបាយជាមួយគណបក្សប្រជាជនកម្ពុជា ជាក្ដីសង្ឃឹមសម្រាប់យើងទាំងអស់គ្នា។

ឯកឧត្តមមានប្រសាសន៍បែបនេះ ក្នុងឱកាសអញ្ជើញជាអធិបតីក្នុងពិធីបញ្ចូលសមាជិកថ្មីគណបក្សប្រជាជនកម្ពុជា ឃុំបិតត្រាំង ឃុំរាម ឃុំសាមគ្គី និងឃុំទឹកល្អក់ ស្រុកព្រៃនប់ ខេត្តព្រះសហីហនុ ប្រព្រឹត្តទៅនាថ្ងៃទី៥ ខែកុម្ភៈ ឆ្នាំ២០២៣។

ថ្លែងនាឱកាសនោះ ឯកឧត្តម សាយ សំអាល់ បានសម្ដែងនូវការអបអរសាទរដល់សមាជិក សមាជិកាគណបក្សប្រជាជនកម្ពុជា ដែលទើបត្រូវបានបញ្ចូលថ្មីទាំងអស់និងថ្លែងអំណរគុណចំពោះការសម្រេចចិត្តដ៏ត្រឹមត្រូវក្នុងការមករួមរស់ជីវភាពនយោបាយជាមួយគណបក្សប្រជាជនកម្ពុជា។

ជាមួយគ្នានេះដែរ ឯកឧត្តម ក៏បានសង្កត់ធ្ងន់ថា នេះគឺជាការសម្រេចចិត្តដ៏ត្រឹមត្រូវ ដើម្បីចូលរួមកសាងសង្គមកម្ពុជា ជាមួយគណបក្សប្រជាជនកម្ពុជា ដែលជាគណបក្សតែមួយគត់បានរួមរស់ជាមួយប្រជាជនកម្ពុជានៅគ្រប់ដំណាក់កាល និងគ្រប់កាលៈទេសៈ និងដែលបានលះបង់ និងបានរួមគ្នាកសាងសង្គមកម្ពុជា តាំងពីចំណុចសូន្យ ឆ្ពោះទៅវឌ្ឍនាភាព និងក្ដីសង្ឃឹម រហូតដល់មានអ្វីៗដូចសព្វថ្ងៃ។ កម្រិតជីវភាពប្រជាពលរដ្ឋ គុណភាពជីវិតកាន់តែប្រសើរ និងការអភិវឌ្ឍលើគ្រប់វិស័យយ៉ាងឆាប់រហ័ស ស្ដែងចេញតាមរយៈកំណើនសេដ្ឋកិច្ចជាង២ទស្សវត្សជាប់ៗគ្នាក្នុងរង្វង់៧,៥% និងការលេចចេញនូវសមិទ្ធផលជាតិធំៗជាច្រើន ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា ដែលជាមគ្គុទេសដ៏ឆ្នើមរបស់កម្ពុជា។

ឯកឧត្តម បានគូសបញ្ជាក់ថា ចំណុចយុទ្ធសាស្រ្តរបស់កម្ពុជា គឺរក្សាឲ្យបានដាច់ខាត សន្ដិភាព។ សន្ដិភាព គឺតម្លៃស្នូល អាចឲ្យកម្ពុជាយើងបន្តដំណើរ កសាងនូវវិបុលភាពសង្គម មានសិទ្ធិសេរីភាពនិងការរស់រានមានជីវិត មានការអភិវឌ្ឍប្រទេស និងមានអ្វីៗគ្រប់យ៉ាង។ ការសម្រេចចិត្តយ៉ាងត្រឹមត្រូវមករួមរស់ជីវភាពនយោបាយជាមួយគណបក្សប្រជាជនកម្ពុជា គឺជាការរួមគ្នារក្សាឲ្យបាននូវសុខសន្តិភាព ស្ថេរភាពនយោយបាយ។

ទន្ទឹមនេះដែរ ឯកឧត្តមបានក្រើនរម្លឹកថា ក្នុងនាមជាសមាជិក សមាជិកាគណបក្ស យើងត្រូវចេះស្វែងយល់នូវស្ថានភាពវិវឌ្ឍន៍សកល និងស្ថានភាពសង្គមកម្ពុជាយើងផ្ទាល់ ថាតើយើងស្ថិតនៅចំណុចណា ហើយតើយើងគួរធ្វើអ្វីខ្លះទៅថ្ងៃមុខ និងជៀសវាងការញាក់ខ្សែពីក្រុមណាមួយដែលនាំឲ្យបង្អាក់ដំណើរកម្ពុជា ឬខូចឧត្តមប្រយោជន៍ជាតិ។

ឯកឧត្តម សាយ សំអាល់ ក៏បានយកឱកាសនេះ ថ្លែងអំណរគុណយ៉ាងជ្រាលជ្រៅដល់សមាជិក សមាជិកាក្រុមការងារគ្រប់ជាន់ថ្នាក់ ជាពិសេសក្រុមការងារនៅហ្នឹងមូលដ្ឋាន ដែលបានលះបង់ ចូលរួមអស់ពីកម្លាំងកាយចិត្តដើម្បីបុព្វហេតុជាតិ ដែលជាក្ដីសង្ឃឹមសម្រាប់យើងទាំងអស់គ្នា៕