សាមគ្គី សហប្រតិបត្តិការ ទទួលខុសត្រូវយ៉ាងអង់អាចក្លាហាន ដើម្បីបង្កើតសហគមន៍រួមវាសនាអាស៊ីប៉ាស៊ីហ្វិក-លោក Xi Jinping ប្រធានរដ្ឋចិនបានអញ្ជើញថ្លែងសុន្ទរកថាក្នុងកិច្ចប្រជុំក្រៅផ្លូវការនៃមេដឹកនាំAPECលើកទី២៩

ព្រឹកថ្ងៃទី ១៨ ខែវិច្ឆិកា ឆ្នាំ២០២២ កិច្ចប្រជុំក្រៅផ្លូវការនៃមេដឹកនាំអង្គការសេដ្ឋកិច្ចនិងសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) លើកទី២៩ បានបើកធ្វើនៅក្រុងបាងកក ប្រទេសថៃ។ លោក Xi Jinping ប្រធានរដ្ឋចិនបានអញ្ជើញថ្លែងសុន្ទរកថាក្រោមចំណងជើងថា« សាមគ្គី សហប្រតិបត្តិការ ទទួលខុសត្រូវយ៉ាងអង់អាចក្លាហាន ដើម្បីបង្កើតសហគមន៍រួមវាសនាអាស៊ីប៉ាស៊ីហ្វិក»។

លោកXi Jinping បានលើកឡើងថា ប្រទេសចិនរីករាយក្នុងការរួមជាមួយប្រទេសទាំងអស់រួមរស់ដោយសន្តិភាពនិងអភិវឌ្ឍជាមួយគ្នាដោយឈរលើមូលដ្ឋាននៃការគោរពគ្នា សមភាពនិងផ្តល់ផលប្រយោជន៍ដល់គ្នា។ ប្រទេសចិននឹងប្រកាន់ខ្ជាប់នូវការបើកទូលាយចំពោះក្រៅប្រទេសដែលមានក្របខណ្ឌកាន់តែធំ មានវិស័យកាន់តែច្រើននិងមានភាពកាន់តែស៊ីជម្រៅ ប្រកាន់ខ្ជាប់នូវការដើរតាមផ្លូវទំនើបកម្មតាមបែបផែនចិន កសាងយន្តការថ្មីផ្នែកសេដ្ឋកិច្ចបែបបើកទូលាយដែលប្រកបដោយកម្រិតកាន់តែខ្ពស់ បន្តចែករំលែកជាមួយពិភពលោកជាពិសេសអាស៊ីប៉ាស៊ីហ្វិកនូវឱកាសអភិវឌ្ឍន៍របស់ប្រទេចិន។

លោកXi Jinping បានលើកឡើងថា ត្រូវតែគាំពារយុត្តិធម៌និងសច្ចភាពអន្តរជាតិ ដើម្បីកសាងអាស៊ីប៉ាស៊ីហ្វិកប្រកបដោយសន្តិភាពនិងស្ថិរភាព។លោកបានអំពាវនាវឱ្យភាគីនានាចាប់ដៃគ្នាកសាងសហគមន៍រួមវាសនាអាស៊ីប៉ាស៊ីហ្វិក និងបង្កើតភាពត្រចះត្រចង់ថ្មីនៃកិច្ចសហប្រតិបត្តិការក្នុងអាស៊ីប៉ាស៊ីហ្វីក។លោកបានលើកឡើងថា សេដ្ឋកិច្ចអាស៊ីប៉ាស៊ីហ្វិកបានកើនឡើងយ៉ាងលឿនក្នុងរយៈពេលរាប់សិនឆ្នាំកន្លងទៅនេះ ប្រការនេះគឺមានអំណោយផលពីបរិយាកាសសន្តិភាពនិងស្ថិរភាព។គន្លឹះសំខាន់មួយគឺការគោរពគ្នាទៅវិញទៅមក សាមគ្គីនិងធ្វើកិច្ចសហប្រតិបត្តិការ ពេលជួបប្រទះបញ្ហា យើងពិគ្រោះពិភាក្សាជាមួយគ្នា ដើម្បីស្វែងរកផលប្រយោជន៍រួមធំបំផុត។យើងត្រូវតែប្រកាន់ខ្ជាប់ទស្សនៈសន្តិសុខប្រកបដោយភាពរួម ចម្រុះ កិច្ចសហប្រតិបត្តិការនិងនិរន្តរភាព គោរពអធិបតេយ្យភាព បូរណភាពទឹកដីរបស់ប្រទេសនានា មិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ គោរពមាគ៌ាអភិវឌ្ឍន៍និងរបបសង្គមដែលប្រជាជននៃប្រទេសនានាបានជ្រើសរើសដោយម្ចាស់ការ ផ្តោតសំខាន់ទៅលើការយកចិត្តទុកដាក់ដោយសមហេតុផលចំពោះផ្នែកសុវត្ថិភាពរបស់ប្រទេសនានា ដោះស្រាយជម្លោះនិងការខ្វែងគំនិតរវាងប្រទេសនិងប្រទេសដោយសន្តិវិធី ដូចជាតាមរយៈកិច្ចសន្ទនានិងកិច្ចពិគ្រោះពិភាក្សាជាដើម។យើងត្រូវចូលរួមយ៉ាងសកម្មនូវអភិបាលកិច្ចសកល ដើម្បីជំរុញឱ្យសណ្តាប់ធ្នាប់អន្តរជាតិវិវឌ្ឍទៅមុខតាមទិសដៅកាន់តែយុត្តិធម៌និងសមហេតុសមផល។

គួរប្រកាន់ខ្ជាប់នូវការបើកទូលាយនិងបរិយាប័ន្ន ដើម្បីកសាង អាស៊ីប៉ាស៊ីហ្វិកដែលមានវិបុលភាពរួម ។ ត្រូវប្រកាន់ខ្ជាប់នូវភាពបើកចំហក្នុងតំបន់ ពង្រឹងការសម្របសម្រួលគោលនយោបាយម៉ាក្រូសេដ្ឋកិច្ច កសាងខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់ក្នុងតំបន់ដែលមានភាពកាន់តែជិតស្និទ្ធ ជំរុញការធ្វើសេរីភាវូបនីយកម្មនិងកិច្ចសម្រួលពាណិជ្ជកម្មនិងការវិនិយោគ ជំរុញដំណើរសមាហរណកម្មសេដ្ឋកិច្ចក្នុងតំបន់ប្រកបដោយស្ថិរភាពនិងកសាងតំបន់ពាណិជ្ជកម្មសេរីអាស៊ីប៉ាស៊ីហ្វិកដែលមានកម្រិតខ្ពស់ ។ ប្រទេសចិនរីករាយក្នុងការសហការជាមួយភាគីពាក់ព័ន្ធ ដើម្បីអនុវត្ត《កិច្ចព្រមព្រៀងស្តីពីភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់》ប្រកបដោយគុណភាពខ្ពស់ នឹងបន្តជំរុញការចូលជាសមាជិក《កិច្ចព្រមព្រៀងគ្រប់ជ្រុងជ្រោយនិងរីកចម្រើនសម្រាប់ភាពជាដៃគូអន្តរប៉ាស៊ីហ្វិក》និង《កិច្ចព្រមព្រៀងស្តីពីភាពជាដៃគូសេដ្ឋកិច្ចឌីជីថល》 ដើម្បីជំរុញការអភិវឌ្ឍបែបរួមបញ្ជូលគ្នាក្នុងតំបន់ ។នៅឆ្នាំ ២០២៣ ប្រទេសចិននឹងពិចារណាបើកធ្វើវេទិកាសហប្រតិបត្តិការអន្តរជាតិ”ខ្សែក្រវាត់និងផ្លូវ”លើកទី៣ ដើម្បីបំពេញកម្លាំងចលចរថ្មីទៅក្នុងការអភិវឌ្ឍនិងវិបុលភាពនៃអាស៊ីប៉ាស៊ីហ្វិកនិងទូទាំងពិភពលោក ។

គួរបន្តប្រកាន់ខ្ជាប់ការអភិវឌ្ឍដោយកាបូនទាបនិងបៃតងដើម្បីកសាងអាស៊ីប៉ាស៊ីហ្វិកដ៏ស្រស់ស្អាត។គួរបង្កើនកិច្ចសហប្រតិបត្តិការសេដ្ឋកិច្ចនិងបច្ចេកទេសពន្លឿនការអភិវឌ្ឍដំណាលគ្នារវាងឌីជីថលនិងបៃតងជំរុញការផ្លាស់ប្តូររូបមន្តនិងដំឡើងកម្រិតខាងប្រភពថាមពលរចនាសម្ព័ន្ធឧស្សាហកម្មនិងរចនាសម្ព័ន្ធប្រើប្រាស់ដើម្បីជំរុញសេដ្ឋកិច្ចនិងសង្គមកិច្ចឲ្យអភិវឌ្ឍដោយបៃតង។ឆ្នាំនេះយើងបានរួមគ្នាកំណត់នូវគោលដៅក្រុងបាងកកស្តីពីសេដ្ឋកិច្ចបៃតងវដ្តជីវសាស្ត្រដើម្បីជំរុញទន្ទឹមគ្នារវាងការអភិរក្សបរិស្ថានអេកូឡូស៊ីនិងការអភិវឌ្ឍសេដ្ឋកិច្ច។ភាគីចិននឹងផ្តល់ការឧប្បត្ថម្ភគាំទ្រដើម្បីសម្រេចបាននូវគោលដៅក្រុងបាងកកនេះហើយក៏ស្វាគមន៍បណ្តាប្រទេសអាស៊ីប៉ាស៊ីហ្វិកចូលរួមយ៉ាងសកម្មក្នុងគំនិតផ្តួចផ្តើមអភិវឌ្ឍន៍សកលផងដែរ។

លោក Xi Jinping បានលើកឡើងថា បច្ចុប្បន្ន ជំងឺកូវីដ១៩នៅតែឆ្លងរាលដាល ការស្តារសេដ្ឋកិច្ចពិភពលោកប្រឈមនឹងបញ្ហាគ្រប់បែបយ៉ាង ឯកតោភាគីនិយម ការគាំពារនិយមមានសភាពងើបឡើងខ្លាំង ដែលបានប៉ះពាល់ខ្លាំងដល់ខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់សកល។ អាស៊ីប៉ាស៊ីហ្វិកជាផ្ទះរបស់យើងគ្រប់គ្នា ក៏ជាប្រភពកម្លាំងចលករនៃកំណើនសេដ្ឋកិច្ចពិភពលោកផងដែរ។ រាប់សិបឆ្នាំកន្លងមក កិច្ចសហប្រតិបត្តិការសេដ្ឋកិច្ចក្នុងតំបន់អាស៊ីប៉ាស៊ីហ្វិកបានរីកចម្រើនយ៉ាងខ្លាំង ដែលបង្កើតបានជា “អច្ឆរិយអាស៊ីប៉ាស៊ីហ្វិក” ដែលសកលលោកកត់សម្គាល់។ បច្ចុប្បន្ន សកលលោកបានឈរលើមាត់ផ្លូវបំបែកនៃប្រវត្តិសាស្ត្រម្តងទៀត ឋានៈនៃអាស៊ីប៉ាស៊ីហ្វិកកាន់តែសំខាន់ឡើង តួនាទីនៃអាស៊ីប៉ាស៊ីហ្វិកក៏កាន់តែលេចធ្លោដែរ។ ក្នុងបរិបទថ្មី យើងគួរពួតដៃគ្នាបង្កើតសហគមន៍រួមវាសនាអាស៊ីប៉ាស៊ីហ្វិក ដើម្បីបង្កើតភាពរុងរឿងថ្មីនៃកិច្ចសហប្រតិបត្តិការអាស៊ីប៉ាស៊ីហ្វិក។ យើងគួរប្រកាន់ខ្ជាប់ការរួមជោគវាសនាដើម្បីកសាងអាស៊ីប៉ាស៊ីហ្វិកដែលគាំទ្រគ្នានិងជួយគ្នាទៅវិញទៅមក។ គាំពារឋានៈសំខាន់នៃអង្គការAPECក្នុងកិច្ចសហប្រតិបត្តិការតំបន់ បន្តជំរុញឱ្យទំនាក់ទំនងភាពជាដៃគូអាស៊ីប៉ាស៊ីហ្វិកកាន់តែមានទំនុកចិត្តចំពោះគ្នា រិយាប័ន្ន សហប្រតិបត្តិការនិងឈ្នះ-ឈ្នះ៕