អាជ្ញាធរភ្នំពេញ ដឹកនាំកម្លាំងចម្រុះចុះពិនិត្យទីតាំងសង្ស័យបង្កប់ល្បែងស៊ីសងមួយកន្លែង ស្ថិតនៅសង្កាត់ស្រះចក
ភ្នំពេញ៖ ដោយមានការបញ្ជាផ្ទាល់ពី ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញនៅថ្ងៃទី ១៩ ខែកញ្ញា ឆ្នាំ ២០២២ លោក សុខ ពេញវុធ អភិបាលរង នៃគណៈអភិបាលរាជធានីភ្នំពេញ បានដឹកនាំកម្លាំងចម្រុះរដ្ឋបាលរាជធានីភ្នំពេញចុះពិនិត្យទីតាំងសង្ស័យបង្កប់ល្បែងស៊ីសងមួយកន្លែងដែលស្ថិតនៅក្នុងអាគារស្នាក់នៅរួមជាន់ទី១៩-២០ ផ្លូវ៦៥ ក្នុងសង្កាត់ស្រះចក ខណ្ឌ ដូនពេញ ។
ប្រតិបត្តិការ នេះមានការចូលរួមពីលោក សុង លី ស្នងការរងនគរបាលរាជធានីភ្នំពេញ លោក ជា ខេមា អភិបាល នៃគណៈអភិបាលខណ្ឌដូនពេញ លោក ទៀង ច័ន្ទ សារ អធិការនគរបាលខណ្ឌដូនពេញ លោក ថោង ពិសិដ្ឋ មេបញ្ជាការ កងរជអាវុធហត្ថ ខណ្ឌដូនពេញ និងមានការសហការសម្របសម្រួលពីលោក គឹម ហុងសាន ព្រះរាជអាជ្ញារងសាលាដំបូងរាជធានីភ្នំពេញ ។
ពេលចុះដល់ទីតាំងក្រុមការងារបានឃេីញថាអ្នកគ្រប់គ្រងទីតាំង និងបុគ្គលិកជនជាតិចិន អ្នកបកប្រែភាសាបានរៀបចំវេចខ្ចប់សម្ភារដែលសង្ស័យប្រព្រឹត្តិល្បែងសុីសងខុសច្បាប់រួចរាល់ អស់ហើយព្រមទាំងបានសហការជាមួយអាជ្ញាធរថែមទៀតផង។
ក្រុមការងារចម្រុះដឹកនាំដោយ ឯកឧត្តម អភិបាលរងរាជធានីភ្នំពេញបានសម្រេចអនុញ្ញាតឲ្យអ្នកគ្រប់គ្រងប្រមូលសម្ភារទាំងនោះចេញពីទីតាំងឲ្យអស់និងបានធ្វើការណែនាំដល់អ្នកគ្រប់គ្រងដូចខាងក្រោម៖
១/ហាមប្រព្រឹត្តិល្បែងសុីសងខុសច្បាប់គ្រប់ប្រភេទ។
២/ហាមជួញដូរ ឬប្រេីប្រាស់គ្រឿងញៀនជាដាច់ខាត។
៣/ត្រូវចូលរួមសហការឲ្យបានល្អជាមួយអាជ្ញាធរមានសមត្ថកិច្ចគ្រ់លំដាប់ថ្នាក់។
៤/ក្នុងករណីមិនអនុវត្តតាមខ្លឹមសារខាងលេី ម្ចាស់ទីតាំងត្រូវទទួលខុសត្រូវចំពោះមុខច្បាប់ព្រះរាជាណាចក្រកម្ពុជាជាធរមាន៕
