ឯកឧត្តម ច័ន្ទ សុផល អនុប្រធានគណៈកម្មការទី៤ នៃរដ្ឋសភា ដឹកនាំកិច្ចប្រជុំគណៈកម្មការរៀបចំ ដើម្បីពិភាក្សាចាត់ចែងរៀបចំបុណ្យសព ឯកឧត្តម ប៊ូ ទ្បាំ

ភ្នំពេញ៖ នៅសាលប្រជុំសាលាខេត្តរតនគិរី ឯកឧត្តម ច័ន្ទ សុផល អនុប្រធានគណៈកម្មការមហាផ្ទៃ ការពារជាតិ និងមុខងារសាធារណ: នៃរដ្ឋសភា និងជាប្រធានគណៈកម្មការរៀបចំបុណ្យសព ឯកឧត្តម ប៊ូ ទ្បាំ តំណាងរាស្រ្តមណ្ឌលខេត្តរតនគិរី នាព្រឹកថ្ងៃទី១៤ ខែកញ្ញា ឆ្នាំ២០២២ បានអញ្ជើញដឹកនាំប្រជុំគណៈកម្មការ និងអនុគណៈកម្មការនានា ដើម្បីពិភាក្សាចាត់ចែងរៀបចំបុណ្យសព ឯកឧត្តម ប៊ូ ទ្បាំ សមាជិកគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា និងជាតំណាងរាស្រ្តមណ្ឌលខេត្តរតនគិរី ដែលបានទទួលមរណភាព នៅថ្ងៃទី១២ ខែកញ្ញា ឆ្នាំ២០២២ វេលាម៉ោង ១២:១២នាទីថ្ងៃត្រង់ ក្នុងជន្មាយុ៦៧ ឆ្នាំ ដោយរោគាពាធ នៅមន្ទីរពេទ្យនៃប្រទេសវៀតណាម។

កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្តម លោកជំទាវ អនុប្រធាន សមាជិក សមាជិកា នៃគណៈកម្មការរៀបចំបុណ្យសព ប្រធាន អនុប្រធាន សមាជិក សមាជិកា នៃអនុគណៈកម្មការនានា និងឯកឧត្តម ញ៉ែម សំអឿន អភិបាល នៃគណៈអភិបាលខេត្តរតនគិរី មេបញ្ជាការកងរាជអាវុធហត្ថខេត្ត ស្នងការនគរបាលខេត្ត មេបញ្ជាការរងតំបន់ប្រតិបត្តិការសឹករងខេត្ត និងតំណាងគ្រួសារសព ព្រមទាំងមន្រ្តីអគ្គលេខាធិការដ្ឋានរដ្ឋសភា។

ឯកឧត្តម ច័ន្ទ សុផល បានមានប្រសាសន៍ថា កិច្ចប្រជុំនេះគឺមានគោលបំណងដើម្បីត្រៀមលក្ខណៈរៀបចំបុណ្យសពឱ្យបានសមរម្យទៅតាមប្រពៃណីទំនៀមទម្លាប់ និងកិត្តិយសសេចក្តីថ្លៃថ្នូររបស់ឯកឧត្តម ប៊ូ ទ្បាំ សមាជិកគណៈកម្មការទី៤ នៃរដ្ឋសភា និងជាតំណាងរាស្រ្តមណ្ឌលខេត្តរតនគិរី ៕