ឧត្តមសេនីយ៍ទោ សោម ស៊ុន ប្រគល់ភារកិច្ច ជូនមេបញ្ជាការគ្រប់កងឯកភាព និងស្ថាប័នពាក់ព័ន្ធ ក្នុងកិច្ចការពារសន្តិសុខ សុវត្ថិភាព ជូនប្រជាពលរដ្ឋ ក្នុងឱកាសភ្ជុំបិណ្ឌ
ភ្នំពេញ៖ នៅទីបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី១៣ ខែកញ្ញា ឆ្នាំ២០២២ បានរៀបចំកិច្ចប្រជុំផ្សព្វផ្សាយផែនការសហការការពារសន្តិសុខសុវត្ថិភាព ជូនប្រជាពលរដ្ឋ ក្នុងឱកាសបុណ្យកាន់បិណ្ឌនិងភ្ជុំបិណ្ឌ និងផែនការសហការការពារសន្តិសុខ សុវត្ថិភាព ក្នុងឱកាសពិធីប្រណាំងទូកនៅតាមដងស្ទឹងសែន នៅខេត្តកំពង់ធំ ។ ដែលកិច្ចប្រជុំនេះស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ។
លោកវរសេនីយ៍ទោ ស៊ុន សារិន នាយការិយាល័យទី៣ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានផែនការការពារសន្តិសុខ សុវត្ថិភាព ក្នុងឱកាសបុណ្យកាន់បិណ្ឌភ្ជុំបិណ្ឌ និងផែនការសហការការពារសន្តិសុខ សុវត្ថិភាព និងសណ្ដាប់ធ្នាប់ ក្នុងឱកាសពិធីប្រណាំងទូក នៅក្រុងស្ទឹងសែន ខេត្តកំពង់ធំ ផងដែរ។
ឧត្តមសេនីយ៍ទោ សោម ស៊ុន បានផ្សព្វផ្សាយពីសភាពការណ៍សន្តិសុខទូទៅនៅក្នុងខេត្តកំពង់ធំ និងការអភិវឌ្ឍរីកចម្រើនរបស់ប្រទេសកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឱ្យប្រជាជនយើងនៅទូទាំងប្រទេស មានការសប្បាយរីករាយក្រោមដំបូលសុខសន្តិភាពពេញលេញ ។
ឧត្តមសេនីយ៍ទោ សោម ស៊ុន បានប្រគល់ភារកិច្ចបន្ថែមមួយចំនួន គឺ- ទី១៖ ត្រូវចាត់តាំងកម្លាំងចូលរួមក្នុងផែនការសហការការពារសន្តិសុខ សុវត្ថិភាព ក្នុងពិធីបុណ្យកាន់បិណ្ឌ ភ្ជុំបិណ្ឌ និងពិធីប្រណាំងទូកនៅក្នុងក្រុងស្ទឹងសែន ឲ្យទទួលបានសុវត្ថិភាពនិងជោគជ័យ។
ទី២៖ ត្រូវចាត់តាំងកងកម្លាំងប្រចាំការប្រចាំបញ្ជានៅនឹងកន្លែង ក្នុងអង្គភាពនីមួយៗ ដើម្បីអន្តរាគមន៍ដោះស្រាយយថាហេតុផ្សេងៗនិងជួយសង្គ្រោះប្រជាពលរដ្ឋ ដែលជួបគ្រោះមហន្តរាយផ្សេងៗដោយប្រការណាមួយ ។
ទី៣៖ត្រូវបែងចែកកងកម្លាំង ដើម្បីទៅចូលរួមពិធីបុណ្យទានជាមួយក្រុមគ្រួសារតាមទំនៀមទម្លាប់ប្រពៃណីជាតិ និងចាត់តាំងក្រុមការងារទៅសួរសុខទុក្ខដល់យោធិននិងគ្រួសារយោធិន ដែលមានជំងឺកំពុងសម្រាកនៅតាមគេហដ្ឋាននីមួយៗ ឬនៅគិលានដ្ឋាននៃបញ្ជាការដ្ឋានតំបន់សឹករកកំពង់ធំ ។និងទី៤៖ត្រូវបន្តណែនាំអប់រំដល់កងកម្លាំងក្នុងការការពារទប់ស្កាត់ការឆ្លងជំងឺកូវីដ-១៩ ដោយត្រូវអនុវត្តឲ្យបានខ្ជាប់ខ្ជួននូវវិធានការ៣ការពារនិង៣កុំ របស់សម្តេចតេជោ ហ៊ុន សែន ៕
