ឯកឧត្តម នូ ផល្លា អញ្ជើញចូលរួមកាន់បិណ្ឌវេនទី៣ នៅវត្តដំណាក់ ក្រុងសៀមរាប ខេត្តសៀមរាប
ភ្នំពេញ៖ ដោយមានជំនឿជឿជាក់ទៅលើព្រះពុទ្ធសាសនា និងដើម្បីជួយផ្គត់ផ្គង់ទំនុកបម្រុងដល់ព្រះសង្ឃគង់ចាំព្រះវស្សា និងរួមចំណែកថែរក្សានូវបុណ្យប្រពៃណីជាតិ ឯកឧត្តម នូ ផល្លា តំណាងរាស្រ្តមណ្ឌលខេត្តសៀមរាប និងលោកជំទាវបានអញ្ជើញចូលរួមក្នុងពិធីកាន់បិណ្ឌវេនទី៣ វត្តដំណាក់ ក្រុងសៀមរាប ខេត្តសៀមរាប នាព្រឹកថ្ងៃទី១៣ ខែកញ្ញា ឆ្នាំ២០២២។
ក្នុងឱកាសនោះដែរ ឯកឧត្តម នូ ផល្លា និងលោកជំទាវ ព្រមទាំងពុទ្ធបរិស័ទ បានបូជាទៀនធូបផា្កភ្ញីចំពោះព្រះរតនត្រ័យសមាទានសីល ធ្វើកិច្ចនមស្ការ ព្រមទាំងបាននាំយកនូវបច្ច័យទេយ្យទានគ្រឿងឧបភោគបរិភោគ ភេសជ្ជៈ ផ្លែឈើ ជាច្រើនមុខទៅប្រគេនព្រះសង្ឃ ដើម្បីឧទ្ទិសនូវផលាអានិសង្ឃជូនទៅដល់វិញ្ញាណក្ខន្ធបុព្វការីជន មានមាតាបិតាជីដូនជីតា ញាតិការទាំង៧សណ្ដាន។ ទេយ្យទានប្រគេនព្រះសង្ឃមាន អង្ករ ១០០គីឡូក្រាម ត្រីខ ១កេស ទឹកក្រូច៥កេស ទឹកសុទ្ធ៥កេស និងបច្ច័យ ២លានរៀល ជូនលោកតា លោកយាយ ៣០នាក់ ក្នុងម្នាក់ៗទទួលបានក្រណាត់សមួយដុំ ថវិកា ២ម៉ឺនរៀល។
សូមជម្រាបថា ពិធីបុណ្យកាន់បិណ្ឌឆ្នាំ២០២២នេះ គឺប្រព្រឹត្តទៅចាប់ពីថ្ងៃ១រោច ដល់ថ្ងៃ១៤រោច ខែភទ្របទ ឆ្នាំខាល ចត្វាស័ក ត្រូវនឹងថ្ងៃទី១១ ដល់ថ្ងៃទី២៤ ខែកញ្ញា ឆ្នាំ២០២២។ នេះជាពេលវេលាមួយដែលបងប្អូនប្រជាពលរដ្ឋពុទ្ធបរិស័ទគ្រប់ទិសទី មានឱកាសក្នុងការធ្វើបុណ្យទាន សន្សំកុសល និងជួបជុំសាច់ញាតិបងប្អូន នៅតាមទីកន្លែងជិតឆ្ងាយ ជាពិសេសតាមទីវត្តអារាមនានា ៕
