សម្ដេចតេជោ អំពាវនាវឲ្យម្ចាស់រថយន្តឈ្នួល កុំដំឡើងថ្លៃ និងឲ្យលោក ឃួង ស្រេង ពិនិត្យលទ្ធភាពបញ្ចេញរថយន្តក្រុង ដឹកពលរដ្ឋទៅតាមខេត្តនានា

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងអំពាវនាវ ឲ្យម្ចាស់រថយន្តឈ្នួលទាំងអស់ សូមមេត្តាកុំដំឡើងថ្លៃ ខណៈប្រាប់ឲ្យលោក ឃួង ស្រេង អភិបាលរាជធានីភ្នំពេញ ពិនិត្យលទ្ធភាពបញ្ចេញរថយន្ត ដឹកបងប្អូនប្រជាពលរដ្ឋ ទៅតាមបណ្ដាខេត្តនានា ក្នុងឱកាសបុណ្យភ្ជុំបិណ្ឌខាងមុខ ។

តាមរយៈសារសំឡេងដែលមានរយៈពេលជាង ១២នាទី ផ្ញើជូនជនរួមជាតិ នាថ្ងៃទី១២ កញ្ញានេះ សម្ដេចតេជោ ហ៊ុន សែន បានអំពាវនាវដល់អាជ្ញាធរគ្រប់លំដាប់ថ្នាក់ ពិនិត្យការពារសន្តិសុខឲ្យបានល្អបំផុត សម្រាប់ប្រជាជនដែលទៅធ្វើបុណ្យទាន នៅតាមទីអារាមនានា ក៏ដូចជាទៅកម្សាន្តនៅតាមរម្មណីយដ្ឋាននានា ក្នុងឱកាសបុណ្យភ្ជុំបិណ្ឌ ។

សម្ដេចតេជនាយករដ្ឋមន្ត្រី បញ្ជាក់ថា «ខ្ញុំអំពាវនាវចំពោះម្ចាស់រថយន្តទាំងឡាយ សូមកុំដំឡើងថ្លៃ នៅក្នុងរយៈពេលនៃការធ្វើបុណ្យ ដើម្បីប្រជាជនមានលទ្ធភាពក្នុងការធ្វើដំណើរ ។ សូមឲ្យសាលារាជធានីភ្នំពេញ ពិនិត្យលទ្ធភាពក្នុងការផ្ដល់ មធ្យាបាយដឹកជញ្ជូននៅថ្ងៃភ្ជុំបិណ្ឌ បញ្ចេញរថយន្តទៅតាមបណ្ដាខេត្ត ដូចដែលយើងបានធ្វើ នៅមុនកូវីដ១៩ បានមកដល់ ដើម្បីកាត់បន្ថយនូវការដំឡើងថ្លៃ របស់រថយន្តឈ្នួលទាំងឡាយ» ។

សម្ដេចបន្តថា «សាលារាជធានីភ្នំពេញ មានលទ្ធភាពនឹងធ្វើបែបនោះ ដើម្បីជួយដល់កម្មករ កម្មការិនី ជួយដល់ប្រជាពលរដ្ឋដែលចង់ធ្វើដំណើរ ទៅតាមមូលដ្ឋាននានា ដើម្បីឲ្យពួកគាត់អាចមានលទ្ធភាពធ្វើដំណើរ និងជៀសវាងបាននូវការដំឡើងថ្លៃ នៃការធ្វើដំណើររបស់ម្ចាស់រថយន្តឈ្នួល ឬតាក់ស៊ី» ៕