ឯកឧត្ដម គង់ សោភ័ណ្ឌ អញ្ជើញសែនក្រុងពាលី និងបញ្ចុះបឋមសិលា បើកការដ្ឋានសាងសង់អគារ ទីស្នាក់ការគណបក្សប្រជាជនកម្ពុជា សង្កាត់សិត្បូ
ភ្នំពេញ៖ ឯកឧត្ដម គង់ សោភ័ណ្ឌ ប្រធានក្រុមការងារយុវជនគណបក្សប្រជាជនកម្ពុជាខេត្ត រួមជាមួយ ឯកឧត្តម កឹម បូរី ប្រធានក្រុមការងារគណបក្សចុះសង្កាត់សិត្បូ នាព្រឹកថ្ងៃទី៣ ខែកញ្ញា ឆ្នាំ២០២២ បានធ្វើជាអធិបតីភាព ក្នុងពិធីសែន ក្រុងពាលី និងបញ្ចុះបឋមសិលាបើកការដ្ឋានសាងសង់អគារទីស្នាក់ការគណបក្សប្រជាជនកម្ពុជាសង្កាត់សិត្បូ ក្រុងតាខ្មៅ ខេត្តកណ្តាល។
ក្នុងឱកាសនោះឯកឧត្ដម គង់ សោភ័ណ្ឌ គូសបញ្ជាក់ថា «ការផ្ដួចផ្ដើមសាងសង់អគារទីស្នាក់ការគណបក្ស ប្រជាជនកម្ពុជា សង្កាត់សិត្បូ នាពេលនេះ គឺជានិមិត្តរូបឆ្លុះបញ្ចាំងឲ្យឃើញពីភាពរឹងមាំរបស់គណបក្សប្រជាជនកម្ពុជា ដែលមានរចនាសម្ព័ន្ធចាក់គ្រឹះជ្រៅ តាំងពីថ្នាក់កណ្ដាល រហូតដល់ថ្នាក់មូលដ្ឋាន និងជានិមិត្តរូបនៃការឯកភាព សាមគ្គីភាពរបស់គណបក្សប្រជាជនកម្ពុជា ដែលជាបង្អែកមិនអាចខ្វះបានសម្រាប់ប្រទេសជាតិ និងប្រជាជនកម្ពុជា»។
ជាក់ស្ដែង ពិធីបើកការដ្ឋានសាងសង់អគារទីស្នាក់ការថ្មី របស់គណបក្សប្រជាជនកម្ពុជា សង្កាត់សិត្បូ នាពេលនេះ គឺជាសមិទ្ធផលថ្មីបន្ថែមទៀត ជាមួយនឹងសមិទ្ធផលជាច្រើនទៀត របស់គណបក្សប្រជាជនកម្ពុជាខេត្តកណ្តាល ដែលមានគុណតម្លៃជាប្រវត្តិសាស្ត្រដ៏ឧត្តុង្គឧត្តម នៃការដឹកនាំរបស់គណបក្សប្រជាជនកម្ពុជា។
ដូចនេះ យើងត្រូវចងចាំថា គណបក្សប្រជាជនកម្ពុជា កើតឡើងដោយសារប្រជាជន ដើម្បីប្រជាជន រួមសុខរួមទុក្ខជាមួយប្រជាជន គ្រប់កាលៈទេសៈ ពេលប្រជាជនមានទុក្ខលំបាក គណបក្សមានមុខជានិច្ចជាមួយប្រជាជន ហើយជ័យជម្នះរបស់គណបក្ស គឺជាជ័យជម្នះរបស់ប្រជាជន ផងដែរ ៕
