ឯកឧត្តម ចាយ បូរិន អញ្ជើញផ្សព្វផ្សាយនីតិវិធី នៃដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ដល់អាជ្ញាធរដែនដី និងមន្រ្តីពាក់ព័ន្ធ នៅមូលដ្ឋានស្រុកក្រូចឆ្មារ
ភ្នំពេញ៖ ឯកឧត្តម ចាយ បូរិន តំណាងរាស្រ្តមណ្ឌលខេត្តត្បូងឃ្មុំ និងជាប្រធានគណៈកម្មការច្បាប់បទបញ្ជានិងនីតិវិធីខេត្ត បានអញ្ជើញជាអធិបតី ពិធីផ្សព្វផ្សាយការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ សម្រាប់បោះឆ្នោតជ្រើសតាំងតំណាងរាស្ដ្រ នីតិកាលទី៧ នៃរដ្ឋសភា
នៅព្រឹកថ្ងៃទី៣ ខែកញ្ញា ឆ្នាំ២០២២ នៅស្រុកក្រូចឆ្មារ ខេត្តត្បូងឃ្មុំ។
ពិធីនេះមានការអញ្ជើញចូលរួមពីសំណាក់ឯកឧត្តម ស៊ាក ឡេង ប្រធានក្រុមប្រឹក្សាខេត្តត្បូងឃ្មុំ និងដោយមានការចូលរួមពីក្រុម
ការងារយុវជន-មេភូមិ-អនុភូមិ-ស្មៀនឃុំ- មេឃុំ និងក្រុមអ្នកច្បាប់ក្នុងមូលដ្ឋានស្រុកក្រូចឆ្មារចំនួន ៣០៦នាក់ ។
ឯកឧត្តម ចាយ បូរិន បានពាំនាំនូវការផ្តាំផ្ញើសួរសុខទុក្ខពីសំណាក់ សម្តេច ឯកឧត្តម លោកជំទាវ ដែលជាថ្នាក់ដឹកនាំរដ្ឋសភា-
រាជរដ្ឋាភិបាល ជូនអង្គពិធីទំាងមូលដោយក្តីនឹករលឹក។
ឯកឧត្តមប្រធានគណៈកម្មការច្បាប់បានចែករំលែកបទពិសោធន៍ ចំណេះដឹង និងផ្សព្វផ្សាយនូវឯកសារចាំបាច់មួយចំនួនដែលពាក់ព័ន្ធនឹងការពិនិត្យបញ្ជីឈ្មោះ និងការចុះឈ្មោះបោះឆ្នោតជ្រើសតាំងតំណាងរាស្ដ្រនីតិកាលទី៧ នៃរដ្ឋសភា ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ជូនដល់សមាជិកសមាជិកាចូលរួមទាំងអស់បានយល់ដឹងអំពីច្បាប់និងបទបញ្ជានីតិវិធី ស្របតាមប្រតិទិន គ.ជ.ប ដើម្បីមានមូលដ្ឋានយកទៅអនុវត្តតាមភារកិច្ចរបស់ខ្លួនឱ្យបានកាន់តែប្រសើរឡើងថែមទៀត។
ឯកឧត្តមក៏បានរម្លឹកដល់អាជ្ញាធរដែនដីនិងអ្នកពាក់ព័ន្ធនៅក្នុងមូលដ្ឋានស្រុកក្រូចឆ្មារទាំងអស់ត្រូវសហការគ្នារៀបចំឯកសារ បែបបទ អនុវត្តតាមប្រតិទិន (គ.ជ.ប) ជូនដល់បងប្អូនប្រជាពលរដ្ឋដែលមិនទាន់បានចុះឈ្មោះក្នុងបញ្ជីបោះឆ្នោតឆ្នាំ២០២២ ដូចជាអ្នកទើបតែផ្លាស់ប្តូរទីលំនៅ អ្នកគ្មានអត្តសញ្ញាណប័ណ្ណសញ្ជាតិខ្មែរ អ្នកទើបគ្រប់អាយុ ១៨ ឆ្នាំ ឱ្យបានទៅចុះឈ្មោះគ្រប់ៗគ្នាក្នុងបញ្ជីបោះឆ្នោតឆ្នាំ២០២២ តាមប្រតិទិន គ.ជ.ប ជាពិសេសការពិនិត្យបញ្ជីឈ្មោះនិងការចុះឈ្មោះដែលមានរយៈពេល៥០ថ្ងៃ ដោយគិតចាប់ពីថ្ងៃទី២០ ខែតុលា រហូតដល់ថ្ងៃទី៨ ខែធ្នូ ឆ្នាំ២០២២ ព្រោះថាបើគ្មានឈ្មោះក្នុងបញ្ជីបោះឆ្នោតទេ មានន័យថាបងប្អូនមិនអាចចូលរួមបោះឆ្នោតជ្រើសតាំងតំណាងរាស្រ្ត នីតិកាលទី៧ នៃរដ្ឋសភា នៅក្នុងឆ្នាំ២០២៣ បានឡើយ។ ដូច្នេះប្រជាពលរដ្ឋដែលគ្រប់អាយុបោះឆ្នោតត្រូវតែបំពេញការតព្វកិច្ចពិនិត្យបញ្ជីឈ្មោះនិងចុះឈ្មោះបោះឆ្នោតឆ្នាំ២០២២ ឱ្យបានគ្រប់ៗគ្នា។
ក្នុងឱកាសនោះដែរ ឯកឧត្តមតំណាងរាស្ត្រ បានជំរុញលើកទឹកចិត្តដល់អាជ្ញាធរគ្រប់លំដាប់ថ្នាក់នៅក្នុងមូលដ្ឋានស្រុកក្រូចឆ្មារទាំងអស់ត្រូវបន្តផ្សព្វផ្សាយអប់រំឲ្យបងប្អូនប្រជាជន យើងទៅចាក់វ៉ាក់សាំងនៅតាមមន្ទីរពេទ្យបង្អែកនៅក្នុងមូលដ្ឋានរបស់ខ្លួនពីដូសទី១-ទី២ និងដូសជំរុញឲ្យបានគ្រប់ៗគ្នា ដោយមិនប្រកាន់និន្នាការនយោបាយ-សាសនា តាមគោលនយោបាយរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាដែលបានដាក់ចេញនូវនយោបាយចាក់វ៉ាក់សាំងតាមយុទ្ធសាស្ត្រផ្ការីក និងត្រូវបន្តចូលរួមអនុវត្តតាមវិធានការសុខាភិបាល គឺ ៣កុំ ៣ការពារឲ្យបានខ្ជាប់ខ្ជួន ដើម្បីឈានទៅបញ្ចប់ការរីករាលដាលនៃជំងឺកូវីដ-១៩ នៅក្នុងប្រទេសយើង ៕
