ឧត្តមសេនីយ៍ត្រី ហួម ខ្វែក ក្រើនរំលឹកដល់នាយ-ពលទាហាន ខិតខំអនុវត្តន៍តួនាទី ភារកិច្ចដោយការទទួលខុសត្រូវខ្ពស់
ភ្នំពេញ៖ ឧត្តមសេនីយ៍ត្រី ហួម ខ្វែក មេបញ្ជាការតំបន់ប្រតិបត្តិការសឹករងបាត់ដំបង បាននក្រើនរំលឹកដល់នាយ-ពលទាហាន គ្រប់អង្គភាពចំណុះតំបន់ប្រតិបត្តិការសឹករងបាត់ដំបងទាំងត្រូវខិតខំអនុវត្តន៍តួនាទី ភារកិច្ចខ្លួនដោយការទទួលខុសត្រូវខ្ពស់ ។
ឧត្តមសេនីយ៍ត្រី ហួម ខ្វែក បានមានប្រសាសន៍បែបនេះ ខណៈឯកឧត្តមរួមទាំងឧត្តមសេនីយ៍ត្រី ម៉ុក ឌីណា មេបញ្ជាការរង និងជាមេបញ្ជាការទិសបីស្រុកជាប់ព្រំដែន ព្រមទាំងក្រុមការងារ បានចុះត្រួតពិនិត្យការងារកសាងអង្គភាពរបស់វរសេនាតូចលេខ១-ផ្នែកសឹករង សំពៅលូន, ភ្នំព្រឹក, កំរៀង និងពិនិត្យលេណដ្ឋាន តាមចំណុចឈរជើងរបស់អង្គភាពចំណុះតំបន់ប្រតិបត្តិការសឹករង បាត់ដំបង តាមខ្សែបន្ទាត់ព្រំដែនកម្ពុជា-ថៃ ក្នុងភូមិសាស្ត្រទទួលខុសត្រូវនាថ្ងៃទី០២ ខែកញ្ញា ឆ្នាំ២០២២ ។
ឧត្តមសេនីយ៍ត្រី ហួម ខ្វែក បានជំរុញដល់បណ្តាអង្គភាពចំណុះឲ្យខិតខំកសាងអភិវឌ្ឍន៍អង្គភាព ដើម្បីឲ្យកងទ័ពមានអគារស្នាក់នៅសមរម្យ កន្លែងធ្វើការស្អាត មានផ្ទះបាយរួម ត្រូវខិតខំធ្វើការបង្កបង្កើនផល ចិញ្ចឹមសត្វ និងច្នៃប្រឌិតបន្ថែមដើម្បីធានាដល់ការហូបចុករបស់កងទ័ពបានគ្រប់គ្រាន់។
ព្រមទាំងបានក្រើនរំលឹកដល់កម្លាំងទាំងអស់ដែលកំពុងឈរជើងតាមខ្សែបន្ទាត់ព្រំដែន ត្រូវបង្កើនទំនាក់ទំនងល្អ ត្រូវជួបពិភាក្សា និងដោះស្រាយបញ្ហាការងារកង្វល់ដែលកើតឡើងនៅតំបន់ព្រំដែនជាមួយកងទ័ពថៃ ដោយសន្តិវិធីដើម្បីរក្សាឲ្យបាននូវស្ថិរភាព មិត្តភាព កិច្ចសហប្រតិបត្តិការ និងសន្តិសុខ ។
ក្នុងឱកាសនេះដែរឧត្តមសេនីយ៍ត្រី ហួម ខ្វែក បានណែនាំដល់កងកម្លាំងទាំងអស់ដែលកំពុងបំពេញបេសកកម្មការពារតាមខ្សែបន្ទាត់ព្រំដែនកម្ពុជា-ថៃ ត្រូវបន្តយកចិត្តទុកដាក់ថែរក្សាសុខភាព និងចូលរួមអនុវត្តនូវវិធានការ ៣កុំ ៣ការពារ ឲ្យបានជាប្រចាំដើម្បីជៀសផុតពីជំងឺឆ្លងកូវីដ-១៩ ៕
