ភ្នំពេញ៖ នៅទីបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃទី៣០ ខែសីហា ឆ្នាំ២០២២ បានរៀបចំពិធីអប់រំសុខភាព ស្តីពីជំងឺគ្រុនចាញ់ ជូនដល់នាយទាហាន នាយទាហានរង និងពលទាហាន គ្រប់បណ្តាកងឯកភាពចំណុះទីបញ្ជាការ ដែលពិធីនេះស្ថិតក្រោមអធិបតីភាព ឯកឧត្តម ឧត្តមេសេនីយ៍ត្រី អ៊ុ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង ។
លោក វរសេនីយ៍ទោ វេជ្ជបណ្ឌិត សូ សារឿន នាយផ្នែកសុខាភិបាល បានឡើងរាយការណ៍អំពីវឌ្ឍភាពការងារប្រយុទ្ធប្រឆាំងជំងឺគ្រុនចាញ់ ក្នុងឆមាសទី១ ឆ្នាំ២០២២ ខេត្តកំពង់ឆ្នាំង មានអ្នកឆ្លងជំងឺគ្រុនចាញ់សរុបចំនួន ៧៨នាក់ ក្នុងនោះព្យាបាលនៅមន្ទីរបង្អែកកំពង់ឆ្នាំង៤៤នាក់ ស្រុកបរិបូណ៌ ២១នាក់ និងមន្ទីរពេទ្យបង្អែកស្រុកកំពង់ត្រឡាច ១៣នាក់ ។
លោក បានបញ្ជាក់ថាជំងឺគ្រុនចាញ់ ឆ្លងតាមរយៈមូសដែកគោល ដែលជាភ្នាក់ងារចម្លងខាំ និងអាចមានគ្រោះថ្នាក់ដល់អាយុជីវិតប្រសិនបើមិនបានព្យបាលត្រឹមត្រូវ និងទាន់ពេលវេលាទេនោះ ។
លោក សូ សារឿន បានណែនាំអំពីវិធានការពារជំងឺគ្រុនចាញ់មានដូចជា ពេលសំរាក ត្រូវចងមុងអោយបានត្រឹមត្រូវ ប្រើថ្នាំអាបែតដាក់ក្នុងពាងទឹកនិងគ្របឲ្យបានជិត ជាពិសេសត្រូវអនុវត្តការ ហូបស្អាត ផឹកស្អាត រស់នៅស្អាត ធ្វើអនាម័យជុំវិញកន្លែងស្នាក់នៅ និងកាកសំណល់ដែលងាយដក់ទឹកដែលជាជម្រកសម្រាប់មូសញីពងកូនបាន ។
បន្ទាប់ពីស្តាប់របាយការណ៍របស់ លោក វរសេនីយ៍ទោ នាយផ្នែកសុខាភិបាល រួចមក ឯកឧត្តម មេបញ្ជាការ បានបន្ថែមថា ជំងឺគ្រុនចាញ់នាពេលនេះគឺកាត់បន្ថយការចម្លងច្រើន ដោយបងប្អូនកងទ័ពយើង យល់ដឹងខ្ពស់ពីវិធីការពារ នឹងការធ្វើអនាម័យកន្លែងរស់នៅបានស្អាតល្អ ។ ឯកឧត្តម ក៏បានផ្តាំផ្ញើរដល់នាយ-ពលទាហានទាំងអស់ត្រូវតែបន្ត ប្រុងប្រយ័ត្នមិនអាចធ្វេសប្រហែសបានឡើយ ។
ឯកឧត្តម មេបញ្ជាការ បានណែនាំដល់បងប្អូនកងទ័ពទាំងអស់ត្រូវប្រុងប្រយ័ត្នការពារខ្លួន មិនចំពោះតែជំងឺគ្រុនចាញ់ គ្រុនឈាមប៉ុណ្ណោះទេ ប៉ុន្តែនៅមានជំងឺផ្សេងៗជាច្រើនទៀត ជាពិសេសជំងឺកូវីដ-១៩ ជំងឺអ៊ុតស្វា ដែលកំពុងរីករាលយ៉ាងសកម្មនៅលើពិភពលោកនាពេលបច្ចុប្បន្ននេះ និងបន្តអនុវត្តវិធានការ ៣ការពារ៣កុំ របស់សម្តេចតេជោ នាយករដ្ឋមន្ដ្រី និងក្រសួងសុខាភិបាល អោយបានខ្ជាប់ខ្ជួន ។
ជាចុងក្រោយនៃកម្មវិធីក៏មានការចែកនូវសម្ភារៈសម្រាប់ការពារជំងឺគ្រុនចាញ់ គ្រុនឈាម និងសម្ភារៈការពារជំងឺកូវីដ-១៩ ជូនដល់គ្រប់បណ្តាអង្គភាព និងការិយាល័យផ្នែកចំណុះ ព្រមទាំងសមាជិកអង្គពិធីទាំងអស់ផងដែរ ៕
