លោក សុីន សុីសាមុត អធិរាជសម្លេងមាស តន្រ្តីករ និងជាអ្នកចម្រៀង ដែលមានសម្លេងដ៏ពិសិដ្ឋពីកំណើត

ប្រសិនបើលោក សុីន សុីសាមុត នៅរស់រានមានជីវិតមកទល់បច្ចុប្បន្ននេះ លោកមានជន្មាយុ៩០ឆ្នាំគត់ (១៩៣២ – ២០២២)។ លោកកើតឆ្នាំរោង។

កាលនៅរស់រានមានជីវិត លោក សុីន សុីសាមុត ជាតន្រ្តីករ និងជាអ្នកចម្រៀង ដែលមានសម្លេងដ៏ពិសិដ្ឋពីកំណើត។ សម្លេងស្រទន់ប្រកបដោយទឹកដមពីធម្មជាតិរបស់គាត់បានអង្រួនបេះដូងអ្នកស្តាប់គ្រប់ស្រទាប់វណ្ណៈក្នុងសង្គមខ្មែររហូតមកទល់សម័យកាលយើងនេះ។ លោក ស៊ីន ស៊ីសាមុត អាចច្រៀងចម្រៀងចង្វាក់រាំវង់ រាំក្បាច់ សារ៉ាវ៉ាន់ ឡាំលាវ psychedelic rock, garage rock, jazz, bossanova, Latin, blues, cha cha cha, agogo ។ មិនត្រឹមតែជាតន្រ្តីករ និងជាអ្នកចម្រៀងដ៏ល្បីល្បាញប៉ុណ្ណោះទេ ប៉ុន្តែ លោក សុីន សុីសាមុត ក៏ជាអ្នកនិពន្ធបទភ្លេង ជា Bandleader និងជាផលិតករភាពយន្ត (Producer) ថែមទៀតផង។ លោកអាចលេងឧបករណ៍ភ្លេងមានដូចជា វីយ៉ូឡុង mandolin ស្រឡៃ និងផ្លុំបុី។ ចាប់ពីឆ្នាំ១៩៥៧ លោក សុីន សុីសាមុត ចាប់ផ្តើមល្បីឈ្មោះកាន់តែរន្ទឺទូទាំងប្រទេស ជាពិសេសនៅពេលព្រះមហាក្សត្រខ្មែរសព្វព្រះរាជហរទ័យ។ ចំណែកដៃគូច្រៀងចម្រៀងជាមួយគាត់រួមមាន លោកស្រី រស់ សិរីសុទ្ធា ប៉ែន រ៉ន ហ៊ួយ មាស ហែម សុវណ្ណ សូ សាវឿន ហៃ សុខុម ចោម ច័ន្ទតារា ម៉ៅ សារ៉េត កែវ សេដ្ឋា ឈួន ម៉ាឡៃ និងលោកស្រី ប៉ែន រ៉ម (ប្អូនស្រីបង្កើតរបស់លោកស្រី ប៉ែន រ៉ន)។

សូមរំលឹកថា លោក ស៊ីន ស៊ីសាមុត គឺ ជា អ្នក និពន្ធ បទ ចម្រៀង និង ជា អ្នក ចម្រៀង ខ្មែរ ដ៏ ល្បី ល្បាញ នា អំឡុង ទសវត្សន៍ឆ្នាំ៥០ ដល់ទសវត្សន៍ឆ្នាំ៧០។ លោក ស៊ីន ស៊ីសាមុត ទទួលរហស្សនាម ថា អធិរាជ សំឡេង មាស។ លោកបានទទួល មរណភាព ក្នុង ជន្មាយុ៤៤ឆ្នាំ ក្រោមរបប ប្រល័យ ពូជ សាសន៍ ខ្មែរ ក្រហមប៉ុល ពត នៅ ថ្ងៃ ទី១៨ ខែ ឧសភា ឆ្នាំ១៩៧៦ ក្រោយការជម្លៀសចេញពីទីក្រុងភ្នំពេញទៅស្រុកកោះធំ ខេត្តកណ្តាល នាថ្ងៃទី១៧ ខែមេសា ឆ្នាំ១៩៧៥៕

ខ្ញុំសូមឧទ្ទិសអត្ថបទនេះជូនចំពោះលោក ស៊ីន ស៊ីសាមុត។ សូមវិញ្ញាណក្ខ័ន្ធរបស់លោកសុីន សុីសាមុត ទៅកាន់សុគតិភព៕

ដោយៈ ស្ទីវិន សាន់អគ្គនាយករង HNA News