ភ្នំពេញ៖ ដោយទទួលបានការអនុញ្ញាតពីសំណាក់ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នារសៀល ថ្ងៃសុក្រ ទី២៦ ខែសីហា ឆ្នាំ២០២២នេះ លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម នៃ ប.ស.ស. បានពន្យល់ថា «កម្មករ និងនិយោជក ត្រូវបង់ភាគទានម្នាក់២ភាគរយ សម្រាប់ការអនុវត្តប្រាក់សោធន»។
ការពន្យល់នេះធ្វើឡើងក្នុងឱកាសលោកអញ្ជើញធ្វើបទបង្ហាញស្តីពី “របបសន្តិសុខសង្គមផ្នែកប្រាក់សោធន” ជូនដល់ថ្នាក់ដឹកនាំ និងបុគ្គលិក ក្រុមហ៊ុនវឌ្ឍនៈ ប្របភើធី អិលធីឌី។
លោកបានបន្តទៀតថា ការអនុវត្តប្រាក់សោធននេះតម្រូវឲ្យមានកាតព្វកិច្ចបង់ភាគទានចំនួន ៤ភាគរយ ក្នុងនោះនិយោជកបង់ ២ភាគរយ និងកម្មករនិយោជិតបង់ ២ភាគរយ។
លោកបានបន្ថែមទៀតថា៖ និយោជកបង់ ២ភាគរយនេះ គឺជាកាតព្វកិច្ច ហើយការបង់របស់និយោជកនេះជាការជួយលើកទឹកចិត្តដល់កម្មករនិយោជិតនៅក្នុងរោងចក្ររបស់គាត់ឲ្យមានការស្ងប់ចិត្តក្នុងការបំពេញការងារ ព្រោះថាកម្មករដឹងថាទៅថ្ងៃអនាគត ខ្លួនទទួលបានប្រាក់សោធននៅពេលដែលគាត់ចាស់ទៅ។ ដែលធ្វើឲ្យគាត់សប្បាយចិត្ត និងពេញចិត្តក្នុងការធ្វើការងារនាំឲ្យការផលិតមានការកើនឡើងខ្ពស់ និងវិន័យការងារកាន់តែល្អថែមទៀត។
លោកបានបញ្ជាក់ទៀតថា៖ ចំណែកកម្មករនិយោជិតវិញក៏ត្រូវមានកាតព្វកិច្ចបង់ ២ភាគរយនៃប្រាក់ខែជាប់ភាគទានរបស់គាត់ដែរ។ ដោយឡែកផលប្រយោជន៍ដែលគាត់ទទួលបានមកវិញគឺចំណែករបស់ខ្លួនដែលបានបង់ រួមទាំងចំណែករបស់និយោជកសរុប៤ភាគរយ។
លោកបានគូសបញ្ជាក់ថា អ្វីដែលសំខាន់នោះ នៅពេលដែលកម្មករនិយោជិតដល់អាយុចូលនិវត្តន៍ ពួកគាត់ក៏ទទួលបានសេវាថែទាំងសុខភាពផងដែរ។
សូមបញ្ជាក់ថា៖ បទបង្ហាញខាងលើរៀបចំដោយក្រុមហ៊ុនវឌ្ឍនៈ ប្របភើធី អិលធីឌី (VATTANAC PROPERTIES LTD) សហការជាមួយបេឡាជាតិសន្តិសុខសង្គម ស្ថិតនៅអគារវឌ្ឍនៈកាពីតាល ដោយមានវត្តមានចូលរួមប្រមាណជាង ២០០នាក់៕
