ឯកឧត្ដមបណ្ឌិតសភាចារ្យ ហង់ជួន ណារ៉ុន អញ្ជើញបំពាក់គ្រឿងឥស្សរិយយសការងារជូនបុគ្គលិកអប់រំ នៃមន្ទីរអប់រំខេត្តបាត់ដំបង
ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៦ សីហា បានអញ្ជើញជាអធិបតីភាពក្នុងពិធី បំពាក់គ្រឿងឥស្សរិយយសការងារជូនបុគ្គលិកអប់រំ នៃមន្ទីរអប់រំ យុវជន និងកីឡា ខេត្តបាត់ដំបង ចំនួនសរុប៥២០រូប ក្នុងនោះមេដាយព្រះរាជាណាចក្រកម្ពុជាថ្នាក់សេនា ចំនួន០១រូប មេដាយមុនីសារាភ័ណ្ឌថ្នាក់សេនា ចំនួន០៤រូប មេដាយមុនីសារាភ័ណ្ឌថ្នាក់អស្សឫទ្ធិ ចំនួន០៦រូប មេដាយមាស ចំនួន១០៨រូប មេដាយប្រាក់ ចំនួន១៥៩រូប និងមេដាយសំរឹទ្ធ ចំនួន២៤២រូប នៅវិទ្យាស្ថានគរុកោសល្យបាត់ដំបង។
ថ្លែងក្នុងពិធីនេះ ឯកឧត្ដមរដ្ឋមន្ត្រី បានថ្លែងអំណរគុណដល់លោកគ្រូ អ្នកគ្រូ ទាំងអស់ដែលចូលរួមយ៉ាងយកចិត្ដទុកដាក់ក្នុងការបង្ហាត់បង្រៀនសិស្សអំឡុងពេលនៃការរីករាលដាលជំងឺកូវីដ១៩ ជាពិសេសការបង្រៀនពីចម្ងាយតាមរយៈប្រព័ន្ធអនឡាញ។
ឯកឧត្ដមរដ្ឋមន្ត្រី ក៏បានលើឡើងថា នេះជាឧត្តមានុវត្តន៍មួយសម្រាប់ក្រសួងអប់រំក្នុងការបង្រៀនពីចម្ងាយតាមប្រព័ន្ធអនឡាញ៕
