ឧត្ដមសេនីយ៍ឯក សុខ លីហួត និងឧត្ដមសេនីយ៍ទោ ហាស់ សុត្ថា បើកកិច្ចប្រជុំត្រួតពិនិត្យ សេចក្ដីព្រាងរបាយការណ៍ខែសីហា និងលើកទិសដៅបន្ដ
ភ្នំពេញ៖ ឯកឧត្ដម ឧត្ដមសេនីយ៍ឯក សុខ លីហួត អគ្គនាយករង និងលោក ឧត្ដមសេនីយ៍ទោ ហាស់ សុត្ថា ប្រធាននាយកដ្ឋានជនបរទេសអន្ដោប្រវេសន្ដជាអ្នកវិនិយោគឯកជន នៅថ្ងៃទី២៦ ខែសីហា ឆ្នាំ២០២២ បានបើកកិច្ចប្រជុំត្រួតពិនិត្យ សេចក្ដីព្រាងរបាយការណ៍ខែសីហា និងលើកទិសដៅបន្ដ ដោយមានការចូលរួមពី លោក-លោកស្រី អនុប្រធាននាយកដ្ឋាន នាយ-នាយរងការិយាល័យ និងនាយផ្នែក ។
ក្នុងកិច្ចប្រជុំនេះលោកនាយការិយាល័យទាំង០៤ ចំណុះឲ្យនាយកដ្ឋាន និងប្រធានក្រុមចម្រុះអធិការកិច្ចហត្ថពលបរទេស បានលើកឡើងពីការសម្រេចបាននូវការងារ និងភារកិច្ច ដែលនាយកដ្ឋានប្រគល់ជូន និងបានលើកឡើងពីបញ្ហាប្រឈមនានាដែលកើតមានដើម្បីដាក់ជូនថ្នាក់ដឹកនាំពិនិត្យសម្រេច។
លោក ឧត្ដមសេនីយ៍ទោ ប្រធាននាយកដ្ឋាន បានមានមតិណែនាំឲ្យមានការខិតខំប្រឹងប្រែងបន្ដ ដើម្បីឲ្យការងារតាមការិយាល័យ និងក្រុមចម្រុះអធិការកិច្ចហត្ថពលបរទេសនីមួយៗ ប្រព្រឹត្ដិទៅកាន់តែមានប្រសិទ្ធិភាពខ្ពស់។
ជាទីបញ្ចប់ឯកឧត្ដម ឧត្ដមសេនីយ៍ឯក សុខ លីហួត អគ្គនាយករង បានមានមតិបូកសរុប និងណែនាំដល់ឲ្យមន្ដ្រីគ្រប់រូប ត្រូវត្រួតពិនិត្យពលករបរទេសដែលធ្វើការខុសច្បាប់ឲ្យបានម៉ត់ចត់ និងត្រូវអនុវត្ដតួនាទីភារកិច្ចរបស់ខ្លួនប្រកបដោយការទទួលខុសត្រូវខ្ពស់៕
