ត្រឹមឆមាសទី១ ឆ្នាំ២០២២ ក្រសួងរៀបចំដែនដី បានចុះបញ្ជី និងចេញបណ្ណកម្មសិទ្ធិ ជូនពលរដ្ឋបានជាង ៦លានបណ្ណ

ភ្នំពេញ៖ ត្រឹមឆមាសទី១ឆ្នាំ ២០២២ ក្រសួងរៀបចំដែនដីនគរូបនីយកម្មនិងសំណង់បានចុះបញ្ជី និងចេញបណ្ណកម្មសិទ្ធិជូនប្រជាពលរដ្ឋបានចំនួនជាង៦លានបណ្ណ ដើម្បីធានាឱ្យពួកគាត់បានកាន់កាប់ដីធ្លីរបស់ខ្លួនស្របច្បាប់ និងកាត់បន្ថយជម្លោះដីធ្លី។

ថ្លែងក្នុងសន្និសីទសារព័ត៌ មាន ស្តីពី «សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងរៀបចំដែនដី នគរូបនីយកម្ម និងសំណង់» នៅព្រឹកថ្ងៃទី២៤ ខែសីហា នាទីស្តីការគណៈរដ្ឋមន្ត្រី ឯកឧត្តម ថេង ចន្ទសង្វា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ក្រសួងបានបន្តខិតខំចុះបញ្ជីដីធ្លីជូនប្រជាពលរដ្ឋ ដើម្បីធានាសុវត្ថិភាពដីនិងអចលទ្រព្យទុកជាទុនសម្រាប់ការវិនិយោគនិងបង្កើនប្រាក់ ចំណូលរបស់ប្រជាពលរដ្ឋនិងវិនិយោគិន ។

ឯកឧត្តមបន្តថា បើគិតពីឆមាសទី១ ឆ្នាំ២០២២ ការ ចុះបញ្ជីនិងចេញបណ្ណកម្មសិទ្ធិជូនប្រជាពលរដ្ឋសម្រេចបាន ៦.៥៨៤.៥៧៨ បណ្ណ ស្មើនឹង៩៤.០៦% នៃក្បាលដីប៉ាន់ស្មានសរុប ៧ លានក្បាលដីក្នុងនោះចុះបញ្ជីដីមានលក្ខណៈជាប្រព័ន្ធបានចំនួន៥.៩៥៩.៥៨២បណ្ណ ចុះបញ្ជីដីដាច់ដោយដុំបានចំនួន ៦២៤.៩៩៦បណ្ណក្នុងនោះដែរ ការចុះបញ្ជីដីរដ្ឋសម្រេចបាន២១២១បណ្ណ ទំហំ៩២១.៩០៣ហិកតាចុះបញ្ជីដីសហគមន៍ជនជាតិដើមភាគតិចបាន ៣៧ សហគមន៍ ទំហំ ៣៨ ៧១៨,៧៥ហិកតា ស្មើនឹង ៩៤៨បណ្ណ ជូនប្រជាពលរដ្ឋ ៣៦៥២គ្រួសារ ។

« វិស័យរដ្ឋបាលដីធ្លីបានចូលរួមសំខាន់ក្នុងការអនុវត្តគោលនយោបាយរបស់រាជរដ្ឋាភិបាលតាមរយៈការចុះបញ្ជីដី ក្រសួងបានធ្វើប្រតិភូកម្មជូនដល់រដ្ឋបាលថ្នាក់ក្រោមជាតិ ពិសេសគឺមន្ទីររៀបចំដែនដីនគរូបនីយ កម្មនិងសំណង់រាជធានីខេត្ត ដែលជាអ្នកប្រតិបត្តិជាមួយ នឹងការិយាល័យភូមិបាលក្នុងស្រុកខណ្ឌ ហើយការចុះបញ្ជីដីធ្លីនេះ នឹងចេញជាបណ្ណកម្មសិទ្ធិជូនដល់ប្រជាពលរដ្ឋនៅទូទាំងប្រទេស ហើយបណ្ណនេះនឹងជួយធានាបាននូវសុវត្ថិភាពដីធ្លីធានាឱ្យបងប្អូនយកបណ្ណនេះធ្វើជាទុនដើម្បីធ្វើការវិនិយោគបន្តទៀត ធ្វើឱ្យគាត់មានភាពច្បាស់លាស់ក្នុងការសម្រេចចិត្តក្នុងការប្រើប្រាស់ដី ។ ការចុះបញ្ជីដីធ្លីក៏មានអត្ថប្រយោជន៍មួយទៀតសម្រាប់ជំរុញចំណូលដល់ថវិកាជាតិដោយសារការដាក់ បញ្ចាំការជួលការផ្ទេរសុទ្ធតែត្រូវបង់ពន្ធប្រថាប់ត្រាចូលរដ្ឋ » ។

ឯកឧត្តមបានបន្តថា ក្រសួងបានរៀបចំដោះស្រាយវិវាទដីធ្លីគ្រប់រូបភាពដោយប្រើ ប្រាស់យន្តការគណៈកម្មការ សូរិយោដី ក្រុមការងារដោះ ស្រាយដីធ្លីវិវាទរបស់ក្រសួងជាមួយក្រុមដោះស្រាយចល័ត និងអាជ្ញាធរជាតិដោះស្រាយទំនាស់ដីធ្លីដែលក្រសួងទទួលដឹកនាំធ្វើឱ្យវិវាទមានការថយចុះធានាបានយុត្តិធម៌នៅក្នុងសង្គម ។

សូមបញ្ជាក់ថា ក្នុងឆ្នាំ ២០២១កន្លងទៅ ក្រសួងចុះបញ្ជីដីជូនប្រជាពលរដ្ឋសម្រេចបាន ៣៣៨.៣៦៣ ក្បាលដី ស្មើនឹង ៤,៨៣% នៃចំនួនក្បាលដីសរុប ៧លានក្បាលដី ក្នុងនោះចុះបញ្ជីដីមានលក្ខណៈជាប្រព័ន្ធបាន ៣៣៥.៦០៨ក្បាលដី និងចុះបញ្ជីដាច់ដោយដុំបានចំនួន ២ ៧៥៥ក្បាលដី ៕ ប្រភព៖ ក្រសួងព័ត៌មាន