រដ្ឋបាលខេត្តតាកែវ រៀបចំសិក្ខាសាលាបណ្ដុះបណ្ដាលតម្រង់ទិសស្ដីពីការគ្រប់គ្រងរដ្ឋបាល ឃុំ សង្កាត់ ដល់ សមាជិក សមាជិកា ក្រុមប្រឹក្សាឃុំ សង្កាត់ ដែលទើបជាប់ឆ្នោតថ្មី

តាកែវ៖ ឯកឧត្តម អ៊ូច ភា អភិបាលខេត្តតាកែវ នៅព្រឹកថ្ងៃចន្ទ ទី២២ ខែសីហា ឆ្នាំ២០២២នេះ បានអញ្ជើញជាអធិបតីភាព ក្នុងពិធីបើកអង្គសិក្ខាសិលា វគ្គបណ្តុះបណ្តាលតម្រង់ទិសស្តីពីការគ្រប់គ្រងរដ្ឋបាលឃុំ សង្កាត់ ដល់សមាជិក សមាជិកា ក្រុមប្រឹក្សា ឃុំ សង្កាត់ ចំនួន ២៨១នាក់ នៅមូលដ្ឋានខេត្តតាកែវ ដែលទើបតែជាប់ឆ្នោតថ្មីៗនេះ ដែលបានរៀបចំធ្វើឡើងរយះពេល ២ថ្ងៃ ចាប់ពីថ្ងៃទី ២២ ដល់ថ្ងៃទី២៣ ខែសីហា នៅសាលប្រជុំរដ្ឋបាលខេត្តតាកែវ និងក៏ការអញ្ជើញចូលរួមពី លោក ស៊ន ផានី អនុប្រធាននាយកដ្ឋានបណ្តុះបណ្តាល នៃសាលាជាតិរដ្ឋបាលមូលដ្ឋានក្រសួងមហាផ្ទៃ ព្រមទាំង សមាជិក សមាជិក ក្រុមប្រឹក្សាឃុំ សង្កាត់។

មានប្រសាសន៍បើកអង្គសិក្ខាសាលាដ៏មានសារៈសំខាន់នេះដែរ ឯកឧត្តម អ៊ូច ភា អភិបាលខេត្តតាកែវ បានលើកឡើងថា ដើម្បីជាការលើកកម្ពស់គណនេយ្យភាព ចំពោះប្រជាពលរដ្ឋនៅមូលដ្ឋាន តាមរយៈការអភិវឌ្ឍសេដ្ឋកិច្ចមូលដ្ឋាន និងការបម្រើសេវាសាធារណៈប្រកបដោយប្រសិទ្ធភាព និងប្រសិទ្ធភាព មានលក្ខណៈឆ្លើយតប សមធម៌ និងបរិយាប័ន្ន ដែលជារបៀបវារៈនយោបាយដ៏សំខាន់បំផុតដែលក្រុមប្រឹក្សានីមួយៗ នៅរដ្ឋបាល ថ្នាក់ក្រោមជាតិ ត្រូវយកចិត្តទុកដាក់សម្រេចឱ្យបាននៅក្នុងអាណត្តិការងារ ក្នុងក្របខ័ណ្ឌ នៃធនធាន និងសមត្ថកិច្ចដែលខ្លួនមាន បន្ថែមលើការយល់ដឹងរបស់ក្រុមប្រឹក្សាឃុំ សង្កាត់ ដែលទើបតែជាប់ឆ្នោតថ្មីមួយចំនួន ពាក់ព័ន្ធនឹងកម្មវិធីកំណែទម្រង់វិមជ្ឈការ និងវិសហមជ្ឈការ ជាពិសេសលិខិតបទដ្ឋានគតិយុត្ត សម្រាប់គ្រប់គ្រងរដ្ឋបាលថ្នាក់ក្រោមជាតិនៅមានកំរិតនៅឡើយដែលទាមទារឱ្យមានវគ្គបណ្តុះបណ្តាលតម្រង់ទិសសម្រាប់ពួកគាត់ ពិសេសលើការបម្រើសេវាសាធារណះជូនបងប្អូនប្រជាពលរដ្ឋកាន់តែមានតម្លាភាព លឿន និងឆាប់រហ័ស ៕