មជ្ឈមណ្ឌលហ្វឹកហ្វឺន កងទ័ពជើងគោក ទទួលស្វាគមន៍ គណៈប្រតិភូសាលាយោធភូមិភាគទី៧ កងទ័ពប្រជាជនវៀតណាម

ភ្នំពេញ៖ គណៈប្រតិភូសាលាយោធភូមិភាគទី៧ កងទ័ពប្រជាជនវៀតណាមដឹកនាំដោយលោកវរសេនីយ៍ឯក ប៊ុយ វ៉ាន់យឺ នាយករង សាលាយោធភូមិភាគទី៧ នៃកងទ័ពប្រជាជនវៀតណាម នៅថ្ងៃទី១៩ ខែសីហា ឆ្នាំ២០២២ បានបំពេញទស្សនកិច្ចនៅមជ្ឈមណ្ឌលហ្វឹកហ្វឺន កងទ័ពជើងគោក ពេជ្រនិល។

ឧត្តមសេនីយ៍ទោ មួង វុទ្ធា នាយសេនាធិការរង នាយកមជ្ឈមណ្ឌលហ្វឹកហ្វឺនកងទ័ពជើងគោក បានសម្តែងការស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់គណៈប្រតិភូសាលាយោធភូមិភាគទី៧ កងទ័ពប្រជាជនវៀតណាម ដែលជាសម្ព័ន្ធមេត្រីភពជាមួយមជ្ឈមណ្ឌលហ្វឹកហ្វឺន កងទ័ពជើងគោកថាពិតបានឆ្លុះបញ្ចាំងពីចំណងមិត្តភាព សាមគ្គីភាព ទំនាក់ទំនងកិច្ចសហប្រតិបត្តិការរវាងកងទ័ពប្រទេសទាំងពីរ កម្ពុជា -វៀតណាម និយាយរួម និងនិយាយដោយឡែករវាងសាលាយោធភូមិភាគទី៧ កងទ័ពប្រជាជនវៀតណាម និងមជ្ឈមណ្ឌលហ្វឹកហ្វឺន កងទ័ពជើងគោកកាន់ជិតស្និត រឹងមាំមួយកម្រិតថែមទៀត ។

ឧត្តមសេនីយ៍ទោ មួង វុទ្ធា បានជូនពរដល់លោកវរសេនីយ៍ឯក ប៊ុយ វ៉ាន់យឺ និងសការីទទួលបានជោគជ័យ សុខសុត្ថិភាពក្នុងដំណើរទស្សនកិច្ចនេះ ។

ជាការឆ្លើយតបលោកវរសេនីយ៍ឯក ប៊ុយ វ៉ាន់យឺ បានថ្លែងអំណរគុណដល់ឧត្តមសេនីយ៍ទោ មួង វុទ្ធា និងសហការីបានទទួលប្រតិភូលោកនាពេលនះ ។ លោកវរសេនីយ៍ឯក ប៊ុយ វ៉ាន់យឺ បានកោតសរសើរដល់មជ្ឈមណ្ឌលហ្វឹកហ្វឺនកងទ័ពជើងគោក មានការរីកចម្រើនរួមមាន សំណង់អគារ ព្រមទាំងហេត្ថារចនាសម្ព័ន្ធនានាជាច្រើន ។

នៅក្នុងឱកាសនោះដែរលោកវរសេនីយ៍ឯក ប៊ុយ វ៉ាន់យឺ បានស្នើដល់ឧត្តមសេនីយ៍ទោ មួង វុទ្ធា អញ្ជើញទៅបំពេញទស្សនកិច្ចសិក្សា នៅសាលាយោធភូមិភាគទី៧ ។

កិច្ចសំណេះសំណាល និងពិភាក្សាបានប្រព្រឹត្តិទៅក្រោមបរិយាកាសរីករាយ ស្និតស្នាល ហើយភាគិទាំងពីរសន្យាខិតខំបន្តរិតចំណងសាមគ្គីភាភាពកិច្ចសហប្រតិបត្តិការយូរអង្វែងអមតៈ ៕