ឯកឧត្តមបណ្ឌិត ចែម វីឌ្យ៉ា ទទួលជួប ឯកឧត្តម Vahram Kazhoyan ឯកអគ្គរដ្ឋទូតអាមេនីប្រចាំកម្ពុជា

ភ្នំពេញ៖ ឯកឧត្តមបណ្ឌិត ចែម វីឌ្យ៉ា រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៨ ខែសីហា ឆ្នាំ២០២២ បានទទួលជួប ឯកឧត្តម Vahram Kazhoyan ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋអាមេនីប្រចាំកម្ពុជា នៅទីស្តីការក្រសួង បន្ទាប់ពីឯកឧត្តមឯកអគ្គរដ្ឋទូត បានចូលក្រាបបង្គំគាល់ថ្វាយសារតាំង ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

នៅក្នុងកិច្ចជំនួប ភាគីទាំងពីរបានពិភាក្សាអំពីសក្តានុពលក្នុងកិច្ចសហប្រតិបត្តិការ ដើម្បីពង្រឹងទំនាក់ទំនងប្រទេសទាំងពីរឲ្យកាន់តែជិតស្និទ្ធ ព្រមទាំងបានផ្លាស់ប្តូរយោបល់លើចំណុចអាទិភាពដែលអាចសម្រេចបានក្នុងពេលកម្ពុជាធ្វើជាប្រធានអាស៊ាន និងបានផ្លាស់ប្តូរយោបល់លើបញ្ហាតំបន់ និងអន្តរជាតិផងដែរ។

ក្នុងឱកាសនោះផងដែរ តាមរយៈឯកឧត្តម Vahram Kazhoyan ឯកឧត្តមបណ្ឌិតរដ្ឋលេខាធិការក៏បានចូលរួមរំលែកមរណទុក្ខ និងបង្ហាញក្តីសោកស្តាយ ចំពោះឧបទេវហេតុនៃការផ្ទុះនៅផ្សារ Surmalu ក្នុងរដ្ឋធានី Yerevan កាលពីថ្ងៃទី១៤ ខែសីហា ឆ្នាំ២០២២ ដែលបណ្តាលអោយមានមនុស្សស្លាប់ និងរងរបួសជាច្រើននាក់។