វគ្គបំប៉នបែបចម្រុះ សម្រាប់គ្រូឧទ្ទេសសាលាគរុកោសល្យ និងវិក្រឹតការខេត្ត ស្ដីពីបំណិន ICT និងគរុកោសល្យសតវត្សទី២១ សម្រាប់បរិវត្តកម្មការអប់រំ

ភ្នំពេញ៖ វគ្គបំប៉នបែបចម្រុះ (Blended INSET) សម្រាប់គ្រូឧទ្ទេសសាលាគរុកោសល្យ និងវិក្រឹតការខេត្ត ស្ដីពីបំណិន ICT និងគរុកោសល្យសតវត្សទី ២១ សម្រាប់បរិវត្តកម្មការអប់រំនៅកម្ពុជា ក្រោមការរៀបចំដោយនាយកដ្ឋានបណ្តុះបណ្តាលនិងវិក្រឹតការ និងនាយកដ្ឋានបច្ចេកវិទ្យាព័ត៌មាន នៃក្រសួងអប់រំ យុវជន និងកីឡា គាំទ្រថវិកាដោយភាពជាដៃគូសម្រាប់ការអប់រំ (GPE3) តាមរយៈអង្គការយូណេស្កូ និងសហការផ្តល់ជំនួយបច្ចេកទេសដោយវិទ្យាស្ថានបើកទូលាយ។

វគ្គបំប៉ននេះរៀបចំជា ៤ ម៉ូឌុល ក្នុងនោះមានម៉ូឌុល ICT និងម៉ូឌុលគរុកោសល្យចំនួន ៣ ដោយមានសិក្ខាកាមចូលរួមជាគ្រូឧទ្ទេសនៅសាលាគរុកោសល្យ និងវិក្រឹតការខេត្តទាំង ១៦ សរុបចំនួន ២៨៥ នាក់លើមុខជំនាញ៖ បំណិនឌីជីថលសម្រាប់ការរៀន និងបង្រៀនពីចម្ងាយ ដូចជាការធ្វើកិច្ចការតាមប្រព័ន្ធអនឡាញ ទាញយក និងដាក់បញ្ជូនឯកសារ តាមរយៈប្រព័ន្ធ Moodle eLearning របស់ក្រសួងអប់រំ យុវជន និងកីឡា គោលវិធីភាពជាដៃគូសម្រាប់ការអភិវឌ្ឍវិជ្ជាជីវៈគ្រូបង្រៀន ស្តាយរៀននិងបង្រៀន VARK ការវាយតម្លៃក្នុងដំណើរសិក្សា ការសួរសំណួរតាមក្របខណ្ឌទ្រឹស្តីប៊្លូម វិធីធ្វើ្ ឱ្យសិស្សប្រើអស់សក្តានុពល វិធីបង្រៀនតាមបែបរិះរក និងការសិក្សាតាមបែបបញ្ញតិ។

សកម្មភាពបំប៉នត្រូវបែកចែកជាពីរ៖ ទី១ ការបំប៉នជួបមុខផ្ទាល់នៅតាមសាលាគរុកោសល្យ និងវិក្រឹតការ និង ទី២ ស្វ័យសិក្សាអនឡាញតាមប្រព័ន្ធ Moodle eLearning របស់ក្រសួង អយក។ វគ្គបំប៉ននេះចូលរួមដោយផ្ទាល់ក្នុងការពង្រឹងសម្ថភាព និងពង្រីកវិសាលភាពការអប់រំបែបឌីជីថល និងជំរុញការប្រើប្រាស់វិធីសាស្រ្តបង្រៀនបែបសកម្មធានាទទួលបានលទ្ធផលសិក្សាខ្ពស់ ៕