ក្រសួងទេសចរណ៍ លើកលែងកាតព្វកិច្ចស្នើសុំចំណាត់ថ្នាក់ មណ្ឌលកម្សាន្តទេសចរណ៍មនុស្សពេញវ័យ

ភ្នំពេញ៖ ក្រសួងទេសចរណ៍សម្រេចលើកលែងកាតព្វកិច្ចស្នើសុំ ចំណាត់ថ្នាក់អាជីវកម្មមណ្ឌលកម្សាន្ត ទេសចរណ៍មនុស្សពេញវ័យ (ក្លឹបកម្សាន្ត KTV ខារ៉ាអូខេ រង្គសាល-ឌីស្កូតែក និងបៀរហ្កាឌិន) ក្នុងគោលបំណង ជំរុញដល់ការបើកដំណើរការអាជីវកម្មជាប្រភេទសហគ្រាសធុនតូច និងមធ្យម ក្នុងដំណាក់កាលនៃការ ងើបឡើងវិញនៃវិស័យទេសចរណ៍ក្នុងនិងក្រោយវិបត្តិជំងឺកូវីដ-១៩ ចាប់ពីថ្ងៃចេញប្រកាសនេះតទៅ។

យោងតាមប្រកាសរបស់ក្រសួងទេសចរណ៍បានឲ្យដឹងថា អាជីវកម្មប្រភេទខាងលើនេះ មានជម្រើស (ដោយស្ម័គ្រចិត្ត) ក្នុងការស្នើសុំការវាយតម្លៃចំណាត់ថ្នាក់អាជីវកម្ម មណ្ឌលកម្សាន្តទេសចរណ៍មនុស្សពេញវ័យ (ក្លឹបកម្សាន្ត KTV ខារ៉ាអូខេ រង្គសាល-ឌីស្កូតែក និងបៀរហ្កាឌិន) តាមលក្ខខណ្ឌអាជីវកម្មរបស់ខ្លួន។

គួរបញ្ជាក់ថា ប្រកាសនេះអនុវត្តតាមសេចក្តីជូនដំណឹងលេខ ៣៦ សជណ.ហធ ចុះថ្ងៃទី២១ ខែមករា ឆ្នាំ២០២១ របស់ទីស្តីការគណៈរដ្ឋមន្រ្តី ស្តីពីលទ្ធផលកិច្ចប្រជុំគណៈកម្មាធិការលើកស្ទួយសហគ្រានធុនតូច និងមធ្យមលើកទី២៕