ភ្នំពេញ៖ ឯកឧត្តម ដួង ពៅ អភិបាលរងខេត្ត តំណាងដ៏ខ្ពស់ខ្ពស់ឯកឧត្ដម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង និងលោកស្រី Gwynneth Wong នាយិការអង្គការភ្លែនអន្តរជាតិប្រចាំនៅកម្ពុជា កាលពីព្រឹកថ្ងៃទី១១ ខែសីហា ឆ្នាំ២០២២ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការអគារមណ្ឌលសុខភាពឃុំអូរស្វាយ ដែលជាជំនួយរបស់ អង្គការភ្លែន ស្ថិតក្នុងស្រុកបុរីអូរស្វាយសែនជ័យ ខេត្តស្ទឹងត្រែង។
កម្មវិធីនេះមានការអញ្ជើញចូលរួមសំណាក់ លោកអភិបាលក្រុង ស្រុក ក្រុមប្រឹក្សា គណៈអភិបាលស្រុកបុរីអូរស្វាយសែនជ័យ កម្លាំងប្រដាប់អាវុធទាំងបីប្រភេទ លោក លោកស្រីប្រធានមន្ទីរអង្គភាពជុំវិញ សហការីអង្គការភ្លែន អាជ្ញាធរភូមិ-ឃុំ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករផងដែរ។
បន្ទាប់ពី លោក លី មីណា អភិបាលស្រុកបុរីអូរស្វាយសែនជ័យ មានមតិស្វាគមន៍ក្នុងអង្គពិធីរួចមក លោកស្រី Gwynneth Wong នាយិការអង្គការភ្លែនអន្តរជាតិប្រចាំនៅកម្ពុជា បានមានប្រសាសន៍ក្នុងអង្គពិធីថា÷ មណ្ឌលសុខភាពអូរស្វាយ ដែលបានសម្ពោធដាក់ឱ្យប្រើប្រាស់ជាផ្លូវការក្នុងឱកាសនេះនឹងដើរតួនាទីមួយដ៏សំខាន់ក្នុងផ្នែកសុខាភិបាល ការគាំពារលើមាតា កុមារនិងទារក សុខភាព អនាម័យ ទឹកស្អាត ការអភិវឌ្ឍជនបទ រួមទាំងការផ្តល់សេវាសាធារណៈជូនដល់ប្រជាពលរដ្ឋ ដែលរស់នៅក្នុងឃុំអូរស្វាយទាំងមូល ក៏ដូចតាមឃុំនានា ដែលនៅជិតមណ្ឌលសុខភាពមួយនេះ។
ក្នុងឱកាសនោះដែរ ឯកឧត្តម ដួង ពៅ បានមានប្រសាសន៍ថ្លែងអំណរអរគុណដល់ អង្គការភ្លែន ដែលបានផ្តល់ជូននូវអគារមណ្ឌលសុខភាពអូរស្វាយនេះ ដើម្បីចូលរួមលើកស្ទួយផ្នែកសុខាភិបាល យ៉ាងខ្លាំង ពិសេសបានមើលឃើញពីទុក្ខលំបាករបស់ប្រជាពលរដ្ឋដែលរស់នៅតំបន់ឆ្ងាយៗពិបាកទៅទទួលសេវាថែទាំសុខភាព និងបានយកចិត្តទុកដាក់លើវិស័យសុខាភិបាល សម្រាប់បងប្អូនប្រជាពលរដ្ឋ ព្រមទាំងបានខិតខំប្រឹងប្រែងស្វែងរកថវិកាមកជួយកសាងមណ្ឌលសុខភាពនៅឃុំអូរស្វាយនេះរួចរាល់ជាស្ថាពរនាឱកាសនេះ។
ទន្ទឹមនិងនោះ ឯកឧត្តម ដួង ពៅ បានគូសបញ្ជាក់ថាអគារមណ្ឌលសុខភាពអូរស្វាយ ដែលបានសម្ពោធដាក់ឱ្យប្រើប្រាស់នាពេលនេះ ជាសមិទ្ធផលថ្មីមួយទៀតសម្រាប់ស្រុកបុរីអូរស្វាយសែនជ័យ និង បានធ្វើឱ្យឃុំអូរស្វាយ ក៏ដូចជាស្រុកថ្មីមួយនេះ មានការផ្លាស់ប្តូរមុខមាត់ជាថ្មី៕
