ស្វាយរៀង ៖ លោក លឹម សៀងហេង អភិបាលក្រុងបាវិតនិងលោក ណេប សារ៉ុន ប្រធានក្រុមប្រឹក្សាក្រុងបាវិត នៅព្រឹកថ្ងៃទី១១ខែសីហាឆ្នាំ២០២២បានបើកវេទិការសាធារណៈជួបជាមួយប្រជាពលរដ្ឋ ចំនួនសង្កាត់៣ គឺសង្កាត់បាវិត សង្កាត់ប្រាសាទ សង្កាត់បាទី ដើម្បីដោះស្រាយសំណូមពរដូចជាកង្វល់នានារបស់ប្រជាពលរដ្ឋនៅមូលដ្ឋាន។
ពិធីនេះបានប្រព្រឹត្តទៅនៅក្នុងបរិវេណវត្តដងទង់ ស្ថិតនៅក្នុងសង្កាត់ប្រាសាទ ក្រុងបាវិត ខេត្តស្វាយរៀង ដែលមានការចូលរួមពីមន្ត្រីដែលពាក់ព័ន្ធនិងប្រជាពលរដ្ឋជាច្រើននាក់ផងដែរ។
ថ្លែងនៅក្នុងឪកាសនោះលោកលឹម សៀងហេងអភិបាលក្រុងបាវិតបានសំណូមពរ ដល់ពលរដ្ឋទាំងអស់ ដែលរស់នៅក្នុងមូលដ្ឋានក្រុងបាវិត កុំសាងសង់សំណង់នៅលើចិញ្ចើមផ្លូវរបស់រដ្ឋ និងត្រូវបញ្ឈប់ការចោលសំរាមពាសវាលពាសកាលនៅទីសាធារណៈ ដើម្បីបរិស្ថានស្អាតនិងទីក្រុងមានសោភណ្ឌភាពល្អ។
លោកបានបញ្ជាក់ថា សំរាមគឺជាបញ្ហាប្រឈមរួមមួយ ដែលយើងទាំងអស់គ្នា ត្រូវយកចិត្តទុកដាក់ដោះស្រាយ មិនអាចខ្វះបាន នាពេលបច្ចុប្បន្ននេះ។ ក្រៅពីនេះ អាជ្ញាធរនៅមូលដ្ឋាន ត្រូវឆ្លើយតបឲ្យបានទាន់ពេលវេលាចំពោះគ្រោះមហន្តរាយផ្សេងៗដែលកើតឡើងនៅមូលដ្ឋាន មានដូចជា គ្រោះធម្មជាតិ ជំងឺដង្កាត់ផ្សេងៗ ជាពិសេស បញ្ហាសត្វពាហនៈរបស់ប្រជាពលរដ្ឋដែលចិញ្ចឹមហើយព្រលែងពាសវាលពាសកាល ដែលនាំឱ្យបង្កគ្រោះថ្នាក់ចរាចរណ៍។
លោកអភិបាលក្រុងបាវិតបានបន្តថា សមិទ្ធផលនិងការអភិវឌ្ឍមូលដ្ឋានទាំង ៥សង្កាត់នៅក្នុងក្រុងបាវិតមានការរីកចម្រើនជាបន្តបន្ទាប់ ក្រោមការដឹកនាំនិងយកចិត្តទុកដាក់ពីរាជរដ្ឋាភិបាលកម្ពុជាដែលមានសម្តេចតេជោ ហ៑ុន សែនជានាយករដ្ឋមន្ត្រី ដែលធ្វើឱ្យមូលដ្ឋានក្រុងបាវិតផ្លូវខ្លះប្រែក្លាយពីផ្លូវដី ស ទៅជាផ្លូវចាក់បេតុងនិងអ៊ុតកៅស៊ូជាដើម។
ជាមួយគ្នានេះ លោកបានអំពានាវ ដល់ប្រជាពលរដ្ឋទាំងអស់គ្នាត្រូវចូលរួមសហការ ចូលរួមជាមួយអាជ្ញាធរគ្រប់លំដាប់ថ្នាក់ដើម្បីសម្រេចបាននូវលទ្ធផលជាផ្លែផ្លាក៏ដូចជាជួយថែរក្សានូវសមិទ្ធផលផ្សេងៗដែលយើងមាននៅថ្ងៃនេះទុកប្រើប្រាស់បានយូអង្វែងទៅថ្ងៃក្រោយ។
សូមបញ្ជាក់ថានៅក្នុងវេទិកាសាធារណៈនេះដែរ ពលរដ្ឋបានលើកឡើងអំពីចំណុចសំខាន់ៗមានដូចជាបញ្ហាអគ្គិសនី ផ្លូវ បញ្ហាដីធ្លី និងសត្វពាហនៈ បញ្ហាសំបុត្រកំណើត ភូមិឃុំមានសុវត្ថិភាពជាដើម។
រាល់ការសំណូមពរនឹងការលើកឡើងរបស់បងប្អូនប្រជាពលរដ្ឋទាំង៣សង្កាត់នៃក្រុងបាវិតនេះ លោកអភិបាលក្រុងនិងមន្ត្រីដែលពាក់ព័ន្ធឡើងបកស្រាយ និងដោះស្រាយសំណូមពរ ទាំងនេះទទួលបានលទ្ធផលល្អប្រសើរផងដែរ៕
