ឧត្តមសេនីយ៍ត្រី ផេង ធី៖ កងទ័ពត្រូវមានសមត្ថភាព និងលក្ខណៈសម្បត្តិកាយសម្បទារឹងមាំគ្រប់គ្រាន់ ដើម្បីឆ្លើយតបចំពោះភារកិច្ចការពារជាតិមាតុភូមិ និងប្រជាជន

ភ្នំពេញ៖ មានប្រសាសន៍ នៅក្នុងពិធីបើកវគ្គហ្វឹកហ្វឺនបំប៉នទូទៅ ដល់នាយទាហាន នាយទាហានរង និងពលទាហាន នៅវរសេនាតូចថ្មើរជើងលេខ៥៣៤ នៅព្រឹកថ្ងៃទី៩ ខែសីហា ឆ្នាំ២០២២នេះ ឧត្តមសេនីយ៍ត្រី ផេង ធី មេបញ្ជាការរង នាយសេនាធិការ កងពលតូចថ្មើរជើងលេខ៥៣ បានសង្កត់ធ្ងន់ទៅលើ កងទ័ពត្រូវតែមានសមត្ថភាព និងសុខភាពរឹងមាំ ដើម្បីឆ្លើយតបទៅនឹងការពារជាតិមាតុភូមិ។

លោកបន្តថា ដើម្បីអនុវត្តតាមទិសដៅ និងផែនការប្រចាំឆ្នាំស្តីពីការងារហ្វឹកហ្វឺន សំដៅឲ្យនាយទាហាន នាយទាហានរង និងពលទាហានបង្កើតបាននូវគុណភាព និងសមត្ថភាពគ្រប់គ្រាន់ មានភាពឈ្លាសវៃ មានស្មារតីទទួលខុសត្រូវក្នុងការងារ ព្រមទាំងបំពេញតួនាទីភារកិច្ចរបស់ខ្លួនជាកងទ័ពស្រួច ជាសសរទ្រូង នៃប្រទេសជាតិ ចាំបាច់ត្រូវតែរឹងមាំស្វាហាប់ ដើម្បីឆ្លើយតបទៅនឹងភារកិច្ចការពារជាតិមាតុភូមិ នាដំណាក់កាលបច្ចុប្បន្ន និងមានសមត្ថភាពគ្រប់គ្រាន់ អនុវត្តតាមបទបញ្ជាថ្នាក់លើបានជោគជ័យ។

លោកក៏បាន ណែនាំសិក្ខាកាម ត្រូវរក្សាវត្តមាន និងសកម្មក្នុងការហ្វឹកហាត់ សំដៅពង្រឹងសមត្ថភាពរបស់ខ្លួន និងអង្គភាព ដើម្បីធ្វើជាគម្រូល្អសម្រាប់វគ្គហ្វឹកហ្វឺននេះ ក៏ដូចជាសម្រាប់អង្គភាពផងដែរ៕