ឧត្ដមសេនីយ៍ទោ សោម ស៊ុន ផ្សព្វផ្សាយសេចក្ដីណែនាំ ស្តីពីការរៀបចំឡើងវិញកន្លែងចត្តាឡីស័ក និងព្យាបាលជំងឺកូវីដ កម្រិតស្រាលនៅតាមបណ្ដាអង្គភាព ទូទាំងកងយោធពលខេមរភូមិន្ទ
ភ្នំពេញ៖ នៅទីបញ្ជាការតំបន់ប្រតិបត្តិការសឹករងកំពង់ធំ នៅព្រឹកថ្ងៃទី៨ ខែសីហា ឆ្នាំ២០២២ បានបើកកិច្ចប្រជុំផ្សព្វផ្សាយសេចក្ដីណែនាំលេខ០០៧/២០២២ សណន របស់អគ្គបញ្ជាការដ្ឋាននៃកងយោធពលខេមរភូមិន្ទ ស្តីពី ការរៀបចំ ឡើងវិញកន្លែងធ្វើចត្តាឡីស័ក និងព្យាបាលជំងឺកូវីដ-១៩កម្រិតស្រាល នៅតាមបណ្ដាអង្គភាពទូទាំងកងយោធពលខេម រភូមិន្ទ និងផ្សព្វផ្សាយប្រសាសន៍ណែនាំ របស់ឯកឧត្ដមឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធ ពលខេមរភូមិន្ទ មេបញ្ជាការកងទ័ពជើងគោក ព្រមទាំងបានចាត់ក្រុមគ្រូពេទ្យ ធ្វើតេស្ដរហ័សរកអង់ទីហ្សែនកូវីដ-១៩ ជូន យោធិន ចំណុះទីបញ្ជាការតំបន់ប្រតិបត្តិការសឹករងផងដែរ ដែលពិធីនេះប្រព្រឹត្តទៅក្រោមអធិបតីភាពឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ។
លោកវរសេនីយ៍ត្រី លី ស៊ីណា នាយផ្នែកគិលានដ្ឋាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បាន ឡើងអានសេចក្ដីណែនាំលេខ០០៧/២០២២ សណន របស់អគ្គបញ្ជាការដ្ឋាននៃកងយោធពលខេមរភូមិន្ទ និងផ្សព្វ ផ្សាយ អំពីវិធានការមួយចំនួន ក្នុងការការពារទប់ស្កាត់ការឆ្លងជំងឺកូវីដ-១៩ និងរបៀបព្យាបាលជំងឺកូវីដ-១៩កម្រិតស្រាល ជូនយោធិន និងការធ្វើចត្តាឡីស័ករបស់យោធិនម្នាក់ៗ ក្នុងករណីមានវិជ្ជមានកូវីដ-១៩ ។
ឧត្ដមសេនីយ៍ទោ សោម ស៊ុន បានមានប្រសាសន៍ថា បច្ចុប្បន្ននេះស្ថានភាពនៃការឆ្លងរាលដាលជាថ្មីទៀត នៃ ជំងឺកូវីដ-១៩ មានការ កើនឡើង តែមិនបណ្ដាលឲ្យយើងមានសភាពធ្ងន់ធ្ងរ ឬគ្រោះថ្នាក់ដល់អាយុជីវិត ដោយសារកង ទ័ពរបស់យើង និងក្រុមគ្រួសារបានចាក់ វ៉ាក់សាំង ដូសទី ៥បានគ្រប់ ៗគ្នា តែយោធិនគ្រប់រូបនិងក្រុមគ្រួសារត្រូវតែបន្ត អនុវត្តន៍នូវវិធានការ ការពារទប់ស្កាត់ការឆ្លងជំងឺកូវីដ-១៩ ដោយត្រូវអនុវត្ត តាមការណែនាំ របស់ក្រសួងសុខាភិបាល និងអនុវត្តឲ្យបានខ្ជាប់ខ្ជួន នូវវិធានការបីកុំ និងបីការពាររបស់សម្ដេចតេជោហ៊ុន សែន ។
ឧត្ដមសេនីយ៍ទោ សោម ស៊ុន បានប្រគល់ភារកិច្ចជូនគណៈកម្មការ ការពារទប់ស្កាត់ការឆ្លងជំងឺកូវីដ-១៩ រួម ជាមួយនិងក្រុមគ្រូពេទ្យ នៅផ្នែក សុខាភិបាល និងផ្នែកគិលានដ្ឋាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវសហការ ជាមួយស្ថាប័នពាក់ព័ន្ធ ដើម្បី រៀបចំកន្លែងធ្វើចត្តាឡីស័ក និងព្យាបាលជំងឺកូវីដ-១៩កម្រិតស្រាល ជូន យោធិន និងក្រុមគ្រួសារឡើងវិញ ដោយអនុវត្តឲ្យបានត្រឹមត្រូវតាមសេចក្តីណែនាំលេខ០០៧/២០២២ សណន របស់ អគ្គបញ្ជាការដ្ឋាន និងប្រសាសន៍ណែនាំរបស់ឯកឧត្ដមឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការ កងទ័ពជើងគោក ។
បន្ទាប់មកយោធិនគ្រប់រូបចំណុះទីបញ្ជាការតំបន់ប្រតិបត្តិការសឹករងកំពង់ធំ បានធ្វើតេស្តរហ័សដើម្បី រកអង់ ទីហ្សែនកូវីដ -១៩ ។ បើក្នុងករណី មានវិជ្ជមាន និងត្រូវរៀបចំការព្យាបាលកម្រិតស្រាល ជូនពួកគាត់នៅក្នុងគិលានដ្ឋាន ឬនៅតាមគេហដ្ឋានរៀងៗខ្លួន ដោយដាក់ឲ្យនៅដាច់ដោយឡែក ៕
